ޢާއިލީ ގުޅުން ދަމަހައްޓަން ޤައުމީ ފެންވަރުގައި މުހިއްމު މަސައްކަތަކެއް މިވަނީ ކުރަންޖެހިފައި: ޚުތުބާ

ޢާއިލީ ގުޅުން ދެމެހެއްޓުމަށް ކަމާބެހޭ އެންމެހާ ފަރާތްތައް ގުޅިގެން، ޤައުމީ ފެންވަރުގައި ގިނަގުނަ މަސައްކަތްތަކެއް ކުރުމަކީ މިއަދު ކުރާން ޖެހިފައިވާ ދީނީ އަދި އިޖުތިމާޢީ ބޮޑު މަސައްކަތެއްކަމަށް ހުކުރު ޙުތުބާގައި ވިދާޅުވެއްޖެއެވެ.

އިސްލާމީ ކަންތައްތަކާ ބެހޭ ވުޒާރާގެ ޑެޕިއުޓީ މިނިސްޓަރު އަލްޢުސްތާޛާ ޙައްވާ ލަތީފް ލިޔުއްވައި ރާއްޖޭގެ މިސްކިތްތަކުގައި މިއަދު އިއްވި ހުކުރު ޙުޠުބާގައި ވަނީ އާއިލީ ގުޅުން ދެމެހެއްޓުމުގެ މުހިންމުކަން ފާހަގަކުރައްވައި އެކަމަށް އަލިއަޅުއްވާލައްވާފައެވެ.

ހުކުރު ޚުތުބާގައި ވިދާޅުވީ ތާރީޚީ ގޮތުން ބަލާއިރު އިންސާނިއްޔަތު ދުށް ފުރަތަމަ ޖަމާޢަތަކީ ޢާއިލާކަމަށެވެ. އަދި ހަރުދަނާ މުޖުތަމަޢެއްގެ އަސާސަކީ ޢާއިލާތައްކަމަށައި އެހެންކަމުން ޢާއިލާއަކީ މުޖުތަމަޢުގެ ބިންގާކަމަށް ޚުތުބާގައި ވަނީ ވިދާޅުވެފައެވެ. އެ ބިންގާ ވަރުގަދަކޮށްގެން ނޫނީ މުޖުތަމަޢު ބާރުވެރިއެއް ނުކުރެވޭނެކަމަށާއި މިއަދު އިސްލާމީ އުންމަތް މި ވަނީ ބާރުވެރި، ޣީރަތްތެރި މުޖުތަމަޢަކަށް ނުހަނު ބޭނުންވެފައިކަމަށް ހުތުބާގައި ވަނީ ވިދާޅުވެފައެވެ.

ޚުތުބާގައި ވިދާޅުވީ ޢާއިލާގެ ފަރާތުން ރައްކާތެރިކަމާއި، އަޅައިލުމާއި، ލޯބި ނުލިބުމުގެ ސަބަބުން ޢާއިލީ ވެށްޓެއްގައި ދިރިއުޅުމުގެ ނަސީބުން މަޙުރޫމްވެފައިވާ އެތައް ކުޑަކުދީންނާއި، ދޮށީ ޢުމުރުގެ މީހުން މި ދިވެހި ފަސްގަނޑުގައި ސަރުކާރުގެބެލުމުގެ ދަށުން ހިންގަމުންދާ މަރުކަޒުތަކުގައި އެބަތިބިކަމަށެވެ. އެގޮތުން މިއީ ދީނީގޮތުންނާއި އިޖްތިމާޢީގޮތުން ބަލާއިރު، ކަންބޮޑުވާން ޖެހޭ ކަމެއްކަމަށާއި ޢާއިލީ ވެށްޓެއްގައި އުފާވެރިކަމާއެކު ދިރިއުޅުމަކީ ކޮންމެ ފަރުދަކަށް ވެސް ލިބިގެންވާ ޙައްޤެއްކަން ހުކުރު ޚުތުބާގައި ވަނީ ވިދާޅުވެފައެވެ.

ޚުތުބާގައި ވިދާޅުވީ ޢާއިލާގެ މެންބަރަކަށް ލިބެންޖެހޭ ހައްޤަކުން މަޙްރޫމުކުރުމަކީ އިންސާނީ ކުރިމަގަށް ނޭދެވޭ އެތައް އަސަރުތަކެއް ކުރާނެ ކަމެއްކަމަށެވެ. އަދި ޚާއްޞަކޮށް ޢުމުރުން ދުވަސްވީ ޢާއިލީ މީހުންނާއި، ޚާއްޞައެހީއަށް ބޭނުންވާ މީހުންނާއި ނަފުސާނީ މައްސަލަތައް ކުރިމަތިވެފައިވާ ފަރާތްތަކަށް އެފަރާތްތަކުގެ ޢާއިލާތަކުގެ އަޅާލުމެއް ނެތި މި ފަދަ މަރުކަޒުތަކުގައި ދިރިއުޅޭން ޖެހުމަކީ އެ ފަރާތްތަކުގެ ނަފްސާނީ ދުޅަހެޔޮކަން އިތުރަށް ގޯސްވުމަށް މަގުފަހިވާ ކަމެއްކަން ވަނީ ފާހަގަކޮށްފައެވެ.

އެހެންކަމުން، މި ކަންކަމާމެދު ފުންކޮށް ވިސްނައި، ޢާއިލީ ގުޅުން ވަރުގަދަކުރުމަށްޓަކައި ޢާއިލާގެ މެންބަރުންނަށް ޢާއިލީ ވެށްޓެއްގައި ދިރިއުޅުމުގެ ޙައްޤު ހޯދައިދިނުމަށް ޢާއިލާގެ ކޮންމެ ފަރުދަކުވެސް މަސައްކަތް ކުރަން ޖެހޭކަމަށް ހުކުރު ޚުތުބާގައި ވަނީ ވިދާޅުވެފައެވެ.

"ޢާއިލީ ގުޅުން ހަރުދަނާ ކުރުމަށްޓަކައި ޢާއިލާގެ މެންބަރުންގެ މެދުގައި އެއްބާރުލުމާއި އެއްބައިވަންތަކަން ޤާއިމުކުރާން ޖެހެ. ޢާއިލާގެ ހުރިހާ މެންބަރުން ގުޅިގެން ޢާއިލާ ހަރުދަނާކުރާން މަސައްކަތްކުރާން ޖެހެ. ޢާއިލާގެ ތެރޭގައި އިޙްތިރާމްކުރުމާއި އަގުވަޒަންކުރުން އޮންނާން ޖެހެއެވެ. ބިނާކުރަނިވި ފާޑުކިއުންތަކާއި ގުޅުންތައް ޤާއިމުކުރެވޭން ޖެހެ. އެކަކު އަނެކާގެ އަޑުއެހުމާއި އިޙްސާސްތަކާއި ބޭނުންތައް، އިޙްތިރާމާއެކު ހިއްސާކުރުމުގެ މާހައުލެއް އުފައްދަން ޖެހެއެވެ. ކެތްތެރިކަމާއި ތަޙައްމަލުކުރުން ކުރިއަށް ނެރޭން ޖެހޭ" ޚުތުބާގައި ވިދާޅުވިއެވެ.

ޚުތުބާގައި ވިދާޅުވީ ޢާއިލީ ޒިންމާގެ ތެރޭގައި މުޖުތަމަޢަށް ބޭނުންވާ ހުރިހައި ދާއިރާތަކަށް މީހުން ބިނާކުރުން ހިމެނޭކަމަށެވެ. އޭގެ ތެރޭގައި މުފައްކިރުންނާއި، އެދުރުންނާއި، ފަންނުވެރީންނާއި، މަސައްކަތްތެރީންނާއި، ފާރަވެރީން އުފެއްދުން ހިމެނޭކަމަށެވެ. އެގޮތުން ޢާއިލީ ގުޅުމުގެ ބޭނުމަކީ މި ފަދަ ޝަޚުޞިއްޔަތުތައް ބިނާކުރުންކަމަށާއި މި މަސްއޫލިއްޔަތު ފުރިހަމައަށް އަދާކުރެވޭނީ ޢާއިލީ ގުޅުން ހަރުދަނާ ކުރެވިގެންކަމަށް ޚުތުބާގައި ވަނީ ވިދާޅުވެފައެވެ.

ޢާއިލާއެއް ފެށިގެން އަންނަނީ މަތިވެރި ގުޅުމަކުންކަން ފާހަގަކޮށް ޚުތުބާގައި ވިދާޅުވީ މި ގުޅުންތައް ބަދަހިކޮށް ބާރުވެރިކުރުމަކީ ޢާއިލާގެ ކޮންމެ ފަރުދަކުވެސް އިސްވެ އަދާކުރާން ޖެހޭ ވާޖިބެއްކަމަށެވެ. އަދި އިންސާނީ ނަސްލު ހެޔޮގޮތުގައި ނެގެހެއްޓޭނީ ފާރަވެރި، އޯގާތެރި، ކެތްތެރި ޢާއިލާއެއްގެ ހިޔާވަހިކަން ލިބިގެންކަމަށާއި އިސްލާމްދީނުގައި އިންސާނީ ނަސްލަށް ވަރަށް ބޮޑު އަހައްމިޔަތެއް ދީފައިވާކަމަށެވެ.

އާއިލީ ގުޅުން ދެމެހެއްޓުމުގެ މުހިންމުކަމަށް ޚާއްސަކޮށްގެން ރާއްޖޭގެ މިސްކިތްތަކުގައި މިއަދު ހުކުރު ޚުތުބާ އިއްވާފައިވާއިރު، އިސްލާމީ ކަންތައްތަކާ ބެހޭ ވުޒާރާގެ ސޯޝަލް މީޑީއާގެ މަންސަތަކުން ޚުތުބާ ގެނެސްދީފައިވަނީ އިނގިރޭސި ސަބްޓައިޓަލްއާ އެކުގައެވެ.