ނައިބު ރައީސް، ފުވައްމުލައް ސިޓީގައި ކުރިއަށްދިޔަ ހިޔަލަ ވީކެންޑް މާކެޓަށް ޒިޔާރަތްކުރައްވައިފި

ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަތީފް، ފުވައްމުލައް ސިޓީގައި ކުރިއަށްދިޔަ "ހިޔަލަ ވީކެންޑް މާކެޓް"އަށް ޒިޔާރަތްކުރައްވައިފިއެވެ.

މި މާކެޓް ކުރިއަށްގެންދިޔައީ ފުވައްމުލައް ސިޓީ، މުޙައްމަދު ޖަމާލުއްދީން ސްކޫލްގައެވެ.

މި މާކެޓަކީ ދިވެހި ކަނބަލުންގެ އުފެއްދުންތައް ވިއްކުމަށް ޚާއްސަކޮށްގެން، ބިޒްނަސް ސެންޓަރ ކޯޕަރޭޝަންއިން ހަފްތާ ބަންދުގައި ކުރިއަށްގެންދާ މާކެޓެކެވެ.

ފުވައްމުލަކުގައި ކުރިއަށްގެންދިޔަ ހިޔަލަ ވީކެންޑް މާކެޓަށް ވަޑައިގެން ރައީސުލްޖުމްހޫރިއްޔާގެ ނައިބު ވަނީ، ސްޓޯލްތަކަށް ޒިޔާރަތްކުރައްވާ، ރަށުގެ ކަނބަލުން ތައްޔާރުކޮށްފައިވާ އުފެއްދުންތައް ބައްލަވާލައްވާފައެވެ. އަދި ވިޔަފާރިތަކާ ގުޅޭ މަޢުލޫމާތު އެމަނިކުފާނު ވަނީ އޮޅުންފިލުއްވާފައެވެ.

ފުވައްމުލައް ސިޓީގައި ކުރިއަށްގެންދިޔަ ވީކެންޑް މަރކެޓްގައި 46 އަންހެން ވިޔަފާރިވެރިން ބައިވެރިވިއެވެ. މާރކެޓުގައި ލިބެން ހުރި ތަކެތީގެ ތެރޭގައި، ކާބޯތަކެތި، އަންނައުނާއި ގަހަނާ، ފަންނުވެރި މަސައްކަތްތައް، ސްކިން ކެއަރ، ހޯމްޑެކޯރ ހިމެނޭކަމަށް ބިޒްނަސް ސެންޓަރ ކޯޕަރޭޝަންއިން މަޢުލޫމާތުދެއެވެ.

2 ދުވަހަށް ކުރިއަށްގެންދިޔަ މި މާކެޓްގައި ފުވައްމުލަކަށް ޚާއްސަ، ކާބޯތަކެތީގެ ލުއިކާނާގެ ގިނަ ބާވަތްތަކެއް ވިއްކާފައިވެއެވެ.

ހިޔަލަ މާރކެޓަކީ 2021 ވަނަ އަހަރުން ފެށިގެން ކޮންމެ އަހަރަކު އަތޮޅުތެރޭގައި ބީސީސީގެ ފަރާތުން ބާއްވަމުން އަންނަ މާރކެޓެކެވެ. އެގޮތުން ހިޔަލަ އެކްސްޕޯގެ ނަމުގައި އެންމެ ފުރަތަމަ ހިޔަލަ މާރކެޓް ބޭއްވީ 2021 ވަނަ އަހަރު ހދ.ކުޅުދުފުއްށީގައެވެ. އަދި 2022 އަދި 2023 ވަނަ އަހަރުވެސް މި އެކްސްޕޯ ބޭއްވީ ހދ.ކުޅުދުފުށީގައެވެ.

ބީސީސީން މިހާރު މަސައްކަތްކުރަމުންދަނީ "ހިޔަލަ ވީކެންޑް މަރކެޓް" ފުޅާކޮށް އެކި ރަށްރަށުގައި ބޭއްވުމަށެވެ.