މިއީ ރާއްޖެ-އިންޑިއާ ގުޅުން އެންމެ ރަނގަޅަށް އޮތް ވަގުތު: ޚާރިޖީ ވަޒީރު

ރާއްޖެއާއި އިންޑިއާގެ ގުޅުމާގުޅޭގޮތުން ކޮންމެ ވާހަކައެއް ދެއްކިނަމަވެސް، މިއީ ދެޤައުމުގެ ގުޅުން އެންމެ ރަނގަޅަށް އޮތް ވަގުތުކަމަށް ޚާރިޖީ ވަޒީރު މޫސާ ޒަމީރު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖަޔަޝަންކަރު ރާއްޖެއަށް ކުރެއްވި ރަސްމީ ދަތުރުފުޅާގުޅޭގޮތުން ޕީއެސްއެމް ނިއުސްއަށް ދެއްވި އިންޓަރވިއުއެއްގައެވެ.

އިންޑިއާގެ ޚާރިޖީ ވަޒީރު ސުބްރަމާނިއަމް ޖަޔަޝަންކަރު ރާއްޖެއަށް ކުރެއްވި ތިން ދުވަހުގެ ރަސްމީ ދަތުރުފުޅު ވަނީ ނިންމަވާލައްވާފައެވެ. މި ދަތުރުފުޅުގައި ދެޤައުމުގެ ދެމެދު މުހިންމު ދާއިރާތަކުން މަޝްވަރާކުރެއްވިއެވެ.

މި ދަތުރުފުޅާގުޅޭގޮތުން އައްޑޫ ސިޓީ ގަން އިންޓަރނޭޝަނަލް އެއަރޕޯޓުގައި ހުންނަވާ ދެއްވި އިންޓަރވިއުގައި ޚާރިޖީ ވަޒީރު މޫސާ ޒަމީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިންޑިއާއަށްކުރެއްވި ދަތުރުފުޅާއި، އެމަނިކުފާނު އިންޑިއާއަށް ކުރެއްވި ދަތުރުފުޅުގެ އިތުރުން އިންޑިއާގެ ޚާރިޖީ ވަޒީރު ރާއްޖެއަށް ކުރެއްވި ދަތުރުފުޅުގެ ސަބަބުން ދެޤައުމުގެ ގުޅުން ވަރަށް ބޮޑަށް ބަދަހިވެފައިވާކަމަށެވެ. އަދި އިންޑިއާގެ ބޮޑުވަޒީރު އައު ދައުރަކަށް އިންތިޚާބުވެވަޑައިގަތުމާއި، އެޤައުމުގެ ޤާނޫނު ހަދާ މަޖިލިސް އެކުލަވާލުމަށްފަހު އެޤައުމުގެ ޚާރިޖީ ވަޒީރު ޤައުމުން ބޭރަށް ކުރެއްވި ފުރަތަމަ ދަތުރުފުޅު ކުރެއްވީ ރާއްޖެއަށްކަމުގައި ވަޒީރު މޫސާ ޒަމީރު ފާހަގަކުރެއްވިއެވެ.

އިންޑިއާގެ ބޮޑުވަޒީރުގެ ފަރާތްޕުޅުން މުހިންމު މެސެޖެއް ދެއްވިކަން ފާހަގަކުރައްވާ ޚާރިޖީ ވަޒީރު މޫސާ ޒަމީރު ވިދާޅުވީ، އެގޮތުން ރާއްޖެއާއެކު ގުޅިގެން މަސައްކަތްކުރައްވާނެކަމުގެ ޔަޤީންކަން ބޮޑުވަޒީރު މޯދީ ދެއްވާފައިވާކަމަށެވެ.

“ކޮންމެ ބަޔަކު ކޮންމެ ވާހަކައެެއް ދެއްކިނަމަވެސް މިއީ ދެޤައުމުގެ ގުޅުން އެންމެ ރަނގަޅަށް އޮތް ވަގުތު. އިރާދަކުރެއްވިއްޔާ މި ގުޅުން މިއަށްވުރެ ބޮޑަށް ބަދަހިކޮށް، ދެޤައުމުގެ ރައްޔިތުންނަށް ފައިދާ ހޯދައިދިނުމަށްޓަކައި ރައީސް މުޢިއްޒުގެ ލަފާގެ މަތިން އަޅުގަނޑުމެން މަސައްކަތް ކުރަމުން ގެންދާނަން.” ޚާރިޖީ ވަޒީރު މޫސާ ޒަމީރު ވިދާޅުވިއެވެ.

ޚާރިޖީ ވަޒީރު މޫސާ ޒަމީރު ވިދާޅުވީ އިންޑިއާއާއެކު އޮތް ގުޅުމުގެ ނަތީޖާ ފެންނަމުންދާކަމަށާއި، އިންޑިއާގެ އިތުރުން އެހެން ޤައުމުތަކާ ގުޅުން ބަދަހިވެ ރައްޔިތުންނަށް ފައިދާވާގޮތަށް ކަންކަން ރޭވެމުން އަންނަކަމަވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ޚާރިޖީ ސިޔާސަތަކީ ރައްޔިތުންނަށް އޭގެ އެންމެ ފައިދާ ކުރާނެ ސިޔާސަތުތަކެއްކަމަށްވެސް ވަޒީރު ވިދާޅުވިއެވެ.

ރާއްޖެއާއި އިންޑިއާގެ ގުޅުމަކީ ވަރަށް ތާރީޚީ ޒަމާންވީ ގުޅުމެއްކަމަށާއި ހުރިހާ ސަރުކާރާކާއެކުވެސް އިންޑިއާއިން މަސައްކަތްކުރާކަމަށް ވަޒީރު ވިދާޅުވިއެވެ. އަދި މީގެ ކުރިން އިންޑިއާއާއެކު ރާއްޖެއިންވެފައިވާ އެއްބަސްވުންތަކަށް ބަލައި ރައްޔިތުންނަށް ފައިދާވާނެގޮތަށް ލޯންތައް ރީއެލައިންކޮށް، ރައްޔިތުންނަށް ފައިދާވެނެގޮތަށް ޕްރޮޖެކްޓުތައް އަވަސްކުރެވެމުން ދާކަމަށްވެސް ވަޒީރު ވިދާޅުވިއެވެ. އެގޮތަށް އިންޑިއާއިންވެސް ރާއްޖެއާއެކު މަސައްކަތްކުރާތަން ފެނިވަޑައިގަންނަވާކަމަށް ޚާރިޖީ ވަޒީރު މޫސާ ޒަމީރު ވިދާޅުވިއެވެ.