މޯލްޑިވިއަންއާ ގުޅިގެން ފަތުރުވެރިކަން ކުރިއެރުވުމަށް މުހިންމު މަސައްކަތްތަކެއް ކުރެވޭނެ: ޝިއުރީ

ރާއްޖޭގެ ރަށްރަށުގެ ޚާއްޞަ ރީތިކަމާއި ތަފާތުކަން ދައްކުވައިދިނުމަށް ޤައުމީ އެއަރލައިން މޯލްޑިވިއަނާއެކު ފަތުރުވެރިކަމުގެ ސިނާޢަތަށް ފައިދާހުރި މަސައްކަތަކެއްކުރުމަށް މަގުފަހިވެގެންދާނެކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީ ސީއީއޯ އަދި އެމްޑީ އިބްރާހިމް ޝިއުރީ ވިދާޅުވެއްޖެއެވެ. ޝިއުރީ މިހެން ވިދާޅުވީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށް އެމްއެމްޕީއާރްސީން، ދިވެހިރާއްޖޭގެ ޤައުމީ އެއަރލައިން، މޯލްޑިވިއަނާއެކު މަސައްކަތްކުރުމަށް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަދައްކަމުންނެއެވެ.

މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަމުން އެމްއެމްޕީއާރުސީގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝިއުރީ ވިދާޅުވީ، މި އެއްބަސްވުމުގެ ސަބަބުން ފުޅާ ދާއިރާއެއްގައި ފަތުރުވެރިންނާ ހަމައަށް ވާސިލުވެ، ރާއްޖޭގެ ރަށްރަށުގެ ޚާއްޞަ ރީތިކަމާއި ތަފާތުކަން ދައްކުވައިދިނުމަށް މަގުފަހިވެގެންދާނެކަމަށެވެ.

"ދެފަރާތުން ގުޅިގެން މަސައްކަތްކޮށްގެން، ދެމެހެއްޓެނިވި ގޮތެއްގައި ފަތުރުވެރިކަން ކުރިއެރުވުމަށް މަގުފަހިވެގެންދާނެކަމުގެ ޔަޤީންކަން އެބައޮތް " އިބްރާހީމް ޝިއުރީ ވިދާޅުވިއެވެ.

މި ރަސްމިއްޔާތުގައި ވާހަކަދައްކަވަމުން މޯލްޑިވިއަންގެ މެނޭޖިން ޑިރެކްޓަރ އިބްރާހީމް އިޔާސް ވިދާޅުވީ މި އެއްބަސްވުމަކީ ދުނިޔޭގެ އެންމެ ބޮޑު ޓްރެވަލް ޑެސްޓިނޭޝަނެއްގެ ގޮތުގައި ރާއްޖޭގެ މަގާމު މަތިކުރުމަށް ކުރާ މަސައްކަތަށް ލިބުނު ވަރަށް ބޮޑު ކުރިއެރުމެއްކަމަށެވެ.

އިޔާސް ވިދާޅުވީ މި އެއްބަސްވުމުގެ ސަބަބުން ދަތުރުފަތުރުގެ ތަޖުރިބާތައް ގިނަވެ، ދެމެހެއްޓެނިވި ފަތުރުވެރިކަން ކުރިއަރުވައި، އިޤްތިޞާދީ ކުރިއެރުމަށް މަގުފަހިވެގެންދާނެކަމަށެވެ.

"އަޅުގަނޑުމެންގެ ވިސްނުން މި އެއްބަސްވުމުގެ ބޭރުން ފުޅާވެގެން އެބަދޭ. ވަކިން ޚާއްޞަކޮށް، އޭ330 މަރުކާގެ މަތިންދާބޯޓާއެކު، ޗައިނާއާއި، އެހެނިހެން އެކި ގައުމުތަކުން ސީދާ ގުޅުންތައް ޤާއިމުކުރުމުގެ ފުރުޞަތު ފަހިކޮށްދިނުމަކީ، އަޅުގަނޑުމެންނަށް ލިބޭ ވަރަށް ބޮޑު އުފަލެއް" އިބްރާހީމް އިޔާސް ވިދާޅުވިއެވެ.

އެމްއެމްޕީއާރުސީއިން ވިދާޅުވީ މި އެއްބަސްވުމަކީ ރާއްޖޭގެ ރީތިކަމާއި، މެހެމާންދާރީ، ދުނިޔޭގެ އެކި ކަންކޮޅުތަކުގެ ފަތުރުވެރިންނަށް ރާއްޖެ ދައްކައިދިނުމަށް ވެވުނު މުހިންމު އެއްބަސްވުމެއްކަމަށެވެ.

މި އެއްބަސްވުމުގައި އެމްއެމްޕީއާރުސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރު އަދި މެނޭޖިންގ ޑިރެކްޓަރު އިބްރާހީމް ޝިއުރީއެވެ. އަދި މޯލްޑިވިއަންގެ ފަރާތުން ސޮއިކުރެއްވީ އެކުންފުނީގެ މެނޭޖިން ޑިރެކްޓަރު އިބްރާހީމް އިޔާސްއެވެ.

މި އެއްބަސްވުމުގެ މަޤްޞަދަކީ، ފަތުރުވެރިންގެ މެދުގައި ދިވެހިރާއްޖެއާމެދު އޮންނަ ޝަޢުގުވެރިކަން އިތުރުކޮށް، އައު އަދި އުފެއްދުންތެރި މާކެޓިންގ ކެމްޕޭނުތަކާއި މުހިންމު އިސްނެގުންތައް ތަޢާރަފުކުރުމެވެ.

އެމްއެމްޕީއާރުސީ އާއި މޯލްޑިވިއަން ގުޅިގެން ކުރިއަށް ގެންދިއުމަށް ރާވާފައިވާ މަސައްކަތްތަކުގެ ތެރޭގައި، ބްރޭންޑެޑް އިޝްތިހާރުތަކާއި، ޕްރޮމޯޝަނަލް ހަރަކާތްތަކާއި ބައިނަލްއަޤްވާމީ ފެންވަރުގެ މާކެޓިންގ ކެމްޕޭނުތައް ހިމެނެއެވެ. އަދި ހަރަކާތްތައް ކުރިއަށްގެންދިޔުމުގައި ބިޒްނަސް ޓު ކޮންސިއުމާ މާކެޓިންގއަށް ހާއްސަ ސަމާލުކަމެއް ދޭނެކަމަށް އެމްއެމްޕީއާރުސީިން ވިދާޅުވިއެވެ.