ބޮގަރު ކައްކަނިކޮށް ޙައްޔަރުކުރި ދެމީހުންގެ ވަނަވަރު ޢާންމުކޮށްފި

ލ.ގަމުން މަސްތުވާތަކެއްޗާއި، ބޮގަރާއެކު ހުކުރު ދުވަހު ހައްޔަރު ކުރި ދެ މީހުންގެ ވަނަވަރު ފުލުހުން ޢާންމުކޮށްފިއެވެ.

މިމައްސާލަގައި ހައްޔަރުކޮށްފައިވަނީ ލ.ގަން، ތުނޑި، ވިލެޖު ޢަހްމަދު ޝުޖާޢު (42އ)އާއި، ލ.ގަން، ތުނޑި، ފަންހިޔަނި ޢަލީ ޝަރީފް (57އ)އެވެ. މި ދެމީހުން ހައްރުކޮށްފައިވަނީ އަޙްމަދު ޝުޖާޢުގެ ގެ ކަމަށްވާ ވިލެޖު ގެއިންނެވެ.

އެގޭގައި ބޮގަރު ކައްކާ ވިޔަފާރިކުރާ ކަމަށް ފުލުހުންނަށް ލިބުނު އިންޓެލިޖެންސް މައުލޫމާތަކާއި ގުޅިގެން ކޯޓު އަމުރެއްގެ ދަށުން އެ ގެ ބަލާ ފާސްކުރިއެވެ. އެގެއިން ފުލުހުން ވަނީ 24.42 ގްރާމުގެ ހެރޮއިން ކަމަށް ޝައްކުކުރެވޭ އެއްޗެއް ހޯދާފައެވެ. އަދި ބޮގަރުކަމަށް ޝައްކު ކުރެވޭ ދެ ރުނބައާއި 5 ލީޓަރު ފުޅިއެއް ވަނީ ފެނިފައެވެ. އަދި ބޮގަރު ކައްކަން ބޭނުންކުރާ ސާމާނު އެގެއިން ފެނުނުކަމަށް ފުލުހުން ވިދާޅުވިއެވެ.

މިމައްސަލަ އިތުރަށް ތަހުޤީޤު ކުރަމުންދާކަމަށް ފުލުހުން ވިދާޅުވިއެވެ.