ޒުވާނުން ބާރުވެރިކުރުވުމަށް ވޭތުވެދިޔަ 9 މަސްދުވަހު ސަރުކާރުން ނަމޫނާ މަސައްކަތްތަކެއް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރުން ޒުވާނުން ބިނާކުރުމަށާއި ޒުވާނުން ބާރުވެރިކުރުވުމަށް ޚާއްސަ އިސްކަމެއްދެއްވަކަމަށް ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ ސްޓޭޓް މިނިސްޓަރ ޢަލީ ޝަމްޢާން ވިދާޅުވެއްޖެއެވެ.

ވާޗުއަލް ކޮށް ބޭއްވި ތިންވަނަ ވޮއިސް އޮފް ގްލޯބަލް ސައުތު ސަމިޓް (ވީއޯޖީއެސްއެސް) ގައި ރާއްޖޭގެ ފަރާތުން ވާހަކަދައްކަވަމުން ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ ސްޓޭޓް މިނިސްޓަރ ޢަލީ ޝަމްޢާން ވިދާޅުވީ ޒުވާނުން ބާރުވެރިކުރުވުމަށް ވޭތުވެދިޔަ 9 މަސްދުވަހުގެ ތެރޭގައި ގިނަ މަސައްކަތްތަކެއް ސަރުކާރުން ކުރައްވާފައިވާކަމަށެވެ. އެގޮތުން ޤައުމުގެ ތަރައްޤީއާއި ގުޅުންހުރި އެކިކަންކަމުގައާއި ސަރުކާރުގެ ސިޔާސަތުތައް ކަނޑައެޅުމުގައި، ސީދާ ރައީސުލްޖުމްހޫރިއްޔާއަށް ލަފާދެއްވާ ބަޔަކަށް ޒުވާނުން ހެއްދުމަށް 'ޕްރެޒިޑެންޝަލް ޔޫތް އެޑްވައިޒަރީ ބޯޑް' އެކުލަވާލައްވާފައިވާކަން ފާހަގަކުރެއްވިއެވެ.

ޤައުމު ބިނާކުރުމަށް މަސައްކަތްކުރުމަށް ޒުވާނުން ނުކުންނަނީ ޢިލްމާއި ޤާބިލު ބަޔަކަށްވެގެންކަން ކަށަވަރުކުރެއްވުމަށް މަތީ ތަޢުލީމުގެ ފުރުސަތު ޒުވާނުންނަށް ފަހިކުރުމަށް ސަރުކާރުން ގިނަ މަސައްކަތްތަކެއް ކުރައްވަމުންދާކަންވެސް ސްޓޭޓް މިނިސްޓަރ ފާހަގަކުރެއްވިއެވެ. އެގޮތުން ފުރަތަމަ ޑިގްރީ އާ ހަމައަށް ހިލޭ ތަޢުލީމު ހާސިލު ކުރެވޭނެ ފުރުސަތު ފަހިކޮށްދިނުމާއި، ރާއްޖެއިން ބޭރުން ތަޢުލީމު ހާސިލު ކުރުމަށް ކުޑަ އިންޓްރެސްޓެއްގައި ތަޢުލީމީ ލޯނު ލިބޭނެ ގޮތް ސަރުކާރުން ފަހިކޮށްފައިވާކަން އޭނާ ފާހަގަކުރެއްވިއެވެ.

ޝަމްޢާން ވިދާޅުވީ، ރައީސް ޑރ. މުހައްމަދު މުއިއްޒުގެ ސަރުކާރުގެ މުހިންމު އެއް ތަސައްވުރަކީ ޒުވާނުންނަށް ބަސް ބުނުމުގެ ފުރުސަތު ދީ، ޒުވާނުންގެ އަޑުއަހާ އަދި ޒުވާނުން ބާރުވެރި ކުރުވުމުގެ ތަސައްވުރު ކަމަށެވެ.

މިސަމިޓުގައި ވާހަކަދައްކަވަމުން ސްޓޭޓް މިނިސްޓަރވަނީ އިންޑިއާގެ އިސްނެގުމާއެކު އިންޑިއާއިން ރިޔާސަތު ބެލެހެއްޓި ނިމިދިޔަ ޖީ20 ސަމިޓުގެ ކާމިޔާބީ ފާހަގަކުރައްވާފައެވެ. އެގޮތުން އެ ބައްދަލުވުމުގެ ސަބަބުން އެލިސްޓުގައި ނުހިމެނޭ ޤައުމުތަކަށް ލިބިގެންދިޔަ ކާމިޔާބީއެއްކަން އޭނާވަނީ ފާހަގަކުރައްވާއެވެ. ޚާއްސަކޮށް ދުނިޔޭގެ ދެކުނުގައި ހިމެނޭ ތަރައްޤީވަމުން އަންނަ ޤައުމުތަކަށް އެސަމިޓުގައި އިންޑިއާއިން އަދާކުރި ދައުރުގެ ސަބަބުން ސަމާލުކަން ލިބި ކުރިއެރުން ލިބިގެންދާނެކަން ސްޓޭޓް މިނިސްޓަރ ފާހަގަކުރެއްވިއެވެ.

ވީއޯޖީއެސްއެސްގައި ސްޓޭޓް މިނިސްޓަރވަނީ ސައުތް އޭޝިއާގެ ޤައުމުތަކަށް މިހާރު ކުރިމަތިވެފައިވާ ދަތިތަކަށް އަލިއަޅުއްވާލައްވާ އެކަމުގައި ގުޅިގެން މަސައްކަތްކުރެވިދާނެ ހައްލުތަކާއި ބެހޭގޮތުންވެސް ވާހަކަދައްކަވާފައެވެ. އަދި މިއަދުގެ ދުނިޔޭގައި ޒުވާނުންނަށް ހުރި ހުރަސްތައް ފާހަގަކޮށް ޒުވާނުން އިތުރަށް ބާރުވެރިކުރުވުމަށް ހުރި އެކި ފުރުސަތުތަކަށް އިންވެސްޓްކުރުމުގެ މުހިއްމުކަން ފާހަގަކުރެއްވިއެވެ. މި ސަމިޓުގައި ދެކުނު އޭޝިއާއަށް ނިސްބަތްވާ ޤައުމުތަކުގެ، ޔޫތް މިނިސްޓްރީތަކުގެ މިނިސްޓަރުންނާއި، އިސްވެރިންވަނީ ބައިވެރިވެވަޑައިގަންނަވާފައެވެ.