ރިކޯޑު ޢަދަދަކަށް ދިރާސާ ކަރުދާހާއެކު އެމްއެންޔޫގެ ތެވެލި ކޮންފަރެންސް މާދަމާ

ރިކޯޑު ޢަދަދަކަށް ދިރާސީ ކަރުދާހާއެކު ޤައުމީ ޔުނިވަރސިޓީގެ ތެވެލި ކޮންފަރެންސް މާދަމާ ފެށުމަށް ތައްޔާރުވެއްޖެއެވެ. ތެވެލި ކޮންފަރެންސަކީ ތަޢުލީމީ ދާއިރާގައި ރާއްޖޭގައި ބާއްވާ އެންމެ ބޮޑު ބައިނަލްއަޤުވާމީ މަހާސިންތާއެވެ.

ތެވެލި ކޮންފަރެންސްގެ މިއަހަރުގެ ތީމް އަމާޒުކޮށްފައިވަނީ "ބްރިޖިންގ ބައުންޑަރީސް: އެކްސްޕްލޯރިންގ ސިނަރޖީސް އެކްރޮސް ރިސަރޗް ޑިސިޕްލިންސް" މި ޝިޢާރަށެވެ. ދެ ދުވަހުގެ މުއްދަތަކަށް ކުރިއަށްގެންދާ މި ކޮންފަރެންސް ބޭއްވުމަށް ހަމަޖެހިފައިވަނީ މިމަހުގެ 19 އަދި 20 މި ދެ ދުވަހު ޤައުމީ ޔުނިވަރސިޓީގައެވެ.

އެމްއެންޔޫއިން ވިދާޅުވީ، މިއަހަރުގެ ކޮންފަރެންސަށް ޖުމްލަ 206 ދިރާސާ ކަރުދާސް ހުށައަޅާފައިވާކަމަށެވެ. މިއީ މި ކޮންފަރެންސްއަށް ރިކޯޑު ޢަދަދަކަށް ދިރާސާ ކަރުދާސް ހުށައެޅި އަހަރެއްގެ ގޮތުގައި ޤައުމީ ޔުނިވަރސިޓީން ފާހަގަކުރައްވައެވެ.

މީގެތެރޭގައި ބައިނަލްއަޤުވާމީ އެކި ފަރާތްތަކުން 44 ކަރުދާސް ހުށައަޅާފައިވާކަމަށް އެ ޔުނިވަރސިޓީން ވިދާޅުވެއެވެ. މީގެތެރޭގައި މުއްދަތު ހަމަވުމާ ހަމައަށް ހުށައަޅާފައިވާ 186 ކަރުދާސް ކޮނަފަރެންސްގައި ހުށައެޅުމުގެ ފުރުޞަތު ލިބިގެންދާނެކަމަށް އެމްއެންޔޫއިން ވިދާޅުވެއެވެ.

މަހާސިންތާގެ ކަރުދާސް ހުށައަޅާފައިވަނީ 13 ދާއިރާއަކުން!

މިއަހަރުގެ މަހާސިންތާއަށް 13 ދާއިރާއަކުން ކަރުދާސް ހުށައެޅުމަށްވަނީ ހުޅުވާލާފައެވެ. އޭގެ ތެރޭގައި ޕަބްލިކް ހެލްތުގެ ދާއިރާއާއި، ޓީޗިންގެ ދާއިރާއާއި، ޓެކްނޮލޮޖީގެ ދާއިރާއާއި، އީޖާދީ އެކި އުފެއްދުންތަކުގެ ދާއިރާ ހިމެނެއެވެ.

ހަމައެހެންމެ ދަނޑުވެރިކަމާއި މަސްވެރިކަމުގެ ދާއިރާއާއި، ތިމާވެށީގެ ދާއިރާއާއި، ޤާނޫނީ ދާއިރާއާއި، ފަންނިއްޔަތާ ގުޅޭ ދާއިރާއާއި، ފަތުރުވެރިކަމުގެ ދާއިރާއާއި، ސިއްޙީ ދާއިރާއާއި، ދެމެހެއްޓެނިވި ތަރައްޤީއާ ގުޅޭ ދާއިރާއާއި، މަންފާކުރަނިވި ނިންމުންތައް ނިންމުމުގައި ސައިންސްގެ ބޭނުންކުރުމާ ގުޅޭ ދާއިރާގެ އިތުރުން ކަނޑުތަކާއި ކަނޑުގެ ވަޞީލަތްތައް ބޭނުންކުރުމާގުޅޭ ދާއިރާ ހިމެނެއެވެ.

ޤައުމީ ޔުނިވަރސިޓީން ވިދާޅުވީ، މި މަހާސިންތާގެ އެންމެ ބޮޑު މަޤްސަދަކީ ދަރިވަރުންނާއި ދިރާސާކުރާ ފަރާތްތަކުގެ އިތުރުން ރާއްޖެއާއި ރާއްޖެއިން ބޭރުގެ އެކި ދާއިރާތަކުގެ ތަޖްރިބާކާރުންނަށް އެފަރާތްތަކުގެ ޢިލްމީ އަދި ދިރާސީ ހޯދުންތައް ހުށައަޅާ އެކަމުގައި މަޝްވަރާކޮށް ޚިޔާލުބަދަލުކުރުމަށް މަގުފަހިކުރުން ކަމަށެވެ.

މި މަހާސިންތާގައި ދިރާސާ ކަރުދާސް ހުށައެޅުމުގެ އިތުރުން ކީ ނޯޓު ސްޕީކަރުން ޚާއްސަ މަޢުޟޫތަކަށް ޢިލްމީގޮތުން އަލިއަޅުވާލާ ވާހަކަދެއްކުމަށްވެސް ވަނީ ހަމަޖެހިފައެވެ.

މިއަހަރުގެ މަހާސިންތާގައި ހުށައަޅާފައިވާ ކަރުދާސްތަކުގެ ތެރެއިން އެންމެ މޮޅު ކަރުދާސް ހޮވުމާއި، ވަޒީފާގެ ހަޔާތުގެ ކުރީކޮޅު ދިރާސާއަށް އިސްކަންދީގެ މަސައްކަތްކުރާ "ކެރިއަރ ރިސަރޗަރ" ހޮވުމަށްވަނީ ހަމަޖެހިފައެވެ.

ދިރާސާގެ ވެއްޓަކަށް އަހުލުވެރި މުޖުތަމަޢެއް ބިނާކުރުމަށް ތަޢުލީމީ އިދާރާތަކުންދަނީ މަސައްކަތްކުރަމުންނެވެ. މިގޮތުން ރާއްޖެއާއި ރާއްޖެއިން ބޭރުގެ އެކި ތަޖުރިބާކާރުންގެ ބައިވެރިވުމާއެކު ރާއްޖެއިން އެކި މަހާސިންތާތައް އަންނަނީ ބާއްވަމުންނެވެ. 2017 ވަނަ އަހަރުން ފެށިގެން ސިލްސިލާގޮތަކަށް ބާއްވަމުން އަންނަ މި މަހާސިންތާ ބާއްވާ މިއީ 7 ވަނަ ފަހަރެވެ.