ސަރުކާރުން ނިންމާ ކޮންމެ ނިންމުމަކީ ހެކީގެ މައްޗަށް ބިނާވެފައިވާ ނިންމުންތަކެއް: ރައީސް

ސަރުކާރުން ނިންމާ ކޮންމެ ޕޮލިސީ ނިންމުމަކީ ހެކީގެ މައްޗަށް ބިނާވެފައިވާ ނިންމުންތަކެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޤައުމީޔުނިވާސިޓީން އިންތިޒާމުކޮށްގެން ކުރިއަށްގެންދާ މިއަހަރުގެ ތެވެލި ބައިނަލްއަޤްވާމީ ކޮންފަރެންސް ފަށްޓަވައިދެއްވާ ވާހަކަފުޅު ދައްކަވަމުންނެވެ.

ދިވެހިރާއްޖޭގެ ޤައުމީ ޔުނިވަސިޓީން ކުރިއަށްގެންދާ ތެވެލި މަހާސިންތާއަކީ ރާއްޖޭގައި ކުރިއަށްގެންދާ އެންމެ ބޮޑު އެއް މަހާސިންތާއެވެ. 2017 ވަނަ އަހަރުން ފެށިގެން ކުރިއަށްގެންދާ ތެވެލި މަހާސިންތާ ބާއްވާ މިއީ 7 ވަނަ އަހަރެވެ.

ރައީސުލްޖުމްހޫރިއްޔާގެ ވާހަކަފުޅުގައި ސަރުކާރުން ނިންމާ ކޮންމެ ޕޮލިސީ ނިންމުމަކީ ހެކީގެ މައްޗަށް ބިނާވެފައިވާ ނިންމުންތަކެއް ކަމަށާއި އަދި ހަމަ އެހެންމެ ޕްރޮފެޝަނަލް ނިންމުންތަކެއްކަން ފާހަގަކުރެއްވިއެވެ. އަދި މިކަމުގައި ތަޢުލީމީ ފަރާތްތަކާއި ދިރާސާކުރާ ފަރާތްތަކާއި ޕޮލިސީ ނިންމުންތައް ނިންމާ ފަރާތްތަކާއި ޕްރައިވެޓް ސެކްޓަރާއި އަދި ޢާންމު ފަރާތްތަކުންވެސް އެކުގައި ގުޅިގެން މިމަގަށް މަސައްކަތް ކޮށްދެއްވުމަށް އެމަނިކުފާނު އެދިވަޑައިގެންނެވިއެވެ.

ރާއްޖޭގެ ތަރައްޤީގެ މޮޑެލް މި މުޖުތަމަޢަށް ފެތޭތޯ ބެލުމާއި މުސްތަޤުބަލުގެ ތަސައްވުރާއި ދިރާސާކުރުމުގެ ނިޒާމު ކުރިއެރުވުމާއެކު ރާއްޖޭގެ އަމިއްލަ ދިރާސާތައް ކުރިއެރުވުމުގެ މުހިންމުކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ. ހަމަ އެހެންމެ ދިރާސާކުރުމުގެ ބިންގަލުގެ މައްޗަށް ބިނާވެފައިވާ މުސްތަޤުބަލެއް ބިނާކުރުމަށް ޤައުމީ ރިސާޗް ކައުންސިލެއް އުފެއްދުމަށް ކުރެވޭ މަސައްކަތް ފާހަގަކުރައްވައި ރައީސުލްޖުމްހޫރިއްޔާ ވަނީ މި ސަރުކާރުން ރިސާޗް ކުރިއެރުވުމަށް ދެއްވާ އިސްކަން ފާހަގަ ކުރައްވާފައެވެ.

ރައީސުލްޖުމްހޫރިއްޔާގެ ވާހަކަފުޅު ނިންމަވާލައްވަމުން އެމަނިކުފާނު ވަނީ ދިރާސާކުރުން ކުރިއެރުވުމާއި އެކަމަށް އެއްބާރުލުންދިނުމާއި އަދި ސުވާލުކުރުމަށާއި ޢިލްމު ހޯދުމަށާއި ޤައުމު ކުރިއެރުވުމުގައި ހުރިހާ ފަރާތްތަކެއްގެ ބައިވެރިވުމާއި އެއްބާރުލެއްވުމަށް އެދިވަޑައިގަންނަވާފައެވެ. އަދި އެކުގައި މަސައްކަތްކޮށް، ބަދަލުވަމުންދާ ދުނިޔޭގައި ރާއްޖެއަށް އީޖާދީގޮތެއްގައި ފާގަތިކަމާއެކު ކުރިއަރައި ދެވޭނެކަމަށް ދެކެވަޑައިގަންނަވާކަމުގައި ވެސް އެމަނިކުފާނު ވިދާޅުވިއެވެ.

"އަޅުގަނޑުމެން މި އުފައްދަނީ ދިރާސާތަކުން ކުރިއަށް ގެންދާ މުސްތަޤްބަލެއްގެ ބިންގާއެއްގެ ގޮތުގައި ޤައުމީ ދިރާސާ ކައުންސިލެއް. މި އިސްނެގުމާއެކު، ޚާއްޞަކޮށް ތިމާވެށީގެ ދެމެހެއްޓެނިވިކަމާއި، އިޤްތިޞާދީ ތަރައްޤީއާއި، އިޖްތިމާޢީ ރައްކާތެރިކަން ފަދަ ދާއިރާތަކުން އަޅުގަނޑުމެންގެ އިސްލާހީ އެޖެންޑާއާ އެއްގޮތްވާ ގޮތުގެ މަތިން ރިސާރޗް ގްރާންޓްތައް ތަޢާރަފްކުރުމަކީ، ޢިލްމީ މުޖުތަމަޢަކަށް އަޅުގަނޑުމެން ކުރާ ވަޢުދުގެ ހެކިތަކެއް." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

މިއަހަރުގެ މަހާސިންތާއަކީ ރެކޯޑް ޢަދަދަކަށް ދިރާސީ ކަރުދާސް ހުށައަޅައިގެން ކުރިއަށްގެންދާ މަހާސިންތާއެކެވެ. މިއަދުން ފެށިގެން ދެ ދުވަހުގެ މުއްދަތަކަށް ކުރިއަށްގެންދާ މި މަހާސިންތާއަށް ޖުމްލަ 206 ދިރާސާ ކަރުދާސް ހުށައަޅާފައިވެއެވެ. އޭގެތެރޭގައި ބައިނަލްއަޤުވާމީ އެކި ފަރާތްތަކުން ހުށައެޅި 44 ކަރުދާސް ހިމެނެއެވެ.

މިއަހަރުގެ މަހާސިންތާއަށް 13 ދާއިރާއަކުން ކަރުދާސް ހުށައެޅުމަށްވަނީ ހުޅުވާލިއެވެ. ގެ ތެރޭގައި ޕަބްލިކް ހެލްތުގެ ދާއިރާއާއި، ޓީޗިންގެ ދާއިރާއާއި، ޓެކްނޮލޮޖީގެ ދާއިރާއާއި، އީޖާދީ އެކި އުފެއްދުންތަކުގެ ދާއިރާ ހިމެނެއެވެ.

މީގެއިތުރުން ދަނޑުވެރިކަމާއި މަސްވެރިކަމުގެ ދާއިރާއާއި، ތިމާވެށީގެ ދާއިރާއާއި، ޤާނޫނީ ދާއިރާއާއި، ފަންނިއްޔަތާ ގުޅޭ ދާއިރާއާއި، ފަތުރުވެރިކަމުގެ ދާއިރާއާއި، ސިއްޙީ ދާއިރާއާއި، ދެމެހެއްޓެނިވި ތަރައްޤީއާ ގުޅޭ ދާއިރާއާއި، މަންފާކުރަނިވި ނިންމުންތައް ނިންމުމުގައި ސައިންސްގެ ބޭނުންކުރުމާ ގުޅޭ ދާއިރާގެ އިތުރުން ކަނޑުތަކާއި ކަނޑުގެ ވަޞީލަތްތައް ބޭނުންކުރުމާގުޅޭ ދާއިރާ ހިމެނެއެވެ.

ޤައުމީ ޔުނިވަރސިޓީން ވިދާޅުވީ، މި މަހާސިންތާގެ އެންމެ ބޮޑު މަޤްސަދަކީ ދަރިވަރުންނާއި ދިރާސާކުރާ ފަރާތްތަކުގެ އިތުރުން ރާއްޖެއާއި ރާއްޖެއިން ބޭރުގެ އެކި ދާއިރާތަކުގެ ތަޖްރިބާކާރުންނަށް އެފަރާތްތަކުގެ ޢިލްމީ އަދި ދިރާސީ ހޯދުންތައް ހުށައަޅާ އެކަމުގައި މަޝްވަރާކޮށް ޚިޔާލުބަދަލުކުރުމަށް މަގުފަހިކުރުން ކަމަށެވެ.