ވިއްސާރާގައި މާލޭގެ ބައެއް ގެތަކަށް 8 ލައްކަ ރުފިޔާއަށްވުރެ ބޮޑު ގެއްލުމެއް!

ހުޅަނގު މޫސުމުގެ ބާރުގަދަވެ މިދިޔަ ހަފްތާގައި ކުރި ވިއްސާރައިގައި މާލޭގެ 37 ގޭބިސީއަކަށް 8 ލައްކައަށްވުރެ ގިނަ ރުފިޔާގެ ގެއްލުންވެފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

ވިއްސާރައިގަ މާލެއިން 37 ގެއަކާއި 13 ރަށަކުން 77 ގެއަކަށް ވެފައިވާ ގެއްލުން ދެނެގަތުމަށް މިހާތަނަށް އެސެސްމަންޓު ހަދާފައިވާކަމަށް އެންޑީއެމްއޭއިން ވިދާޅުވެއެވެ.

މިދިޔަ ހަފްތާގައި މުޅި ރާއްޖެއަށް ކުރި ވިއްސާރައިގައި މާލެގެ އިތުރުން ބައެއް ރަށްރަށުގައި ފެންބޮޑުވުން ފަދަ ހާދިސާތައް ހިނގައިގެން ވަނީ ރިޕޯޓުކޮށްފައެވެ. އަދި ވައިގަދަވުމުގެ ސަބަބުން ފުރާޅުއެއްލާލުމުގެ ހާދިސާތަކެއްވެސް ހިނގާފައިވެއެވެ. އެކި އަތޮޅުތަކުގެ ބައެއް ރަށްތަކާއި ވެރިރަށް މާލެއަށްވެސް ވިއްސާރައިގައި ލިބުނު ގެއްލުން ދެނެގަތުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން އެސެސްމަންޓުތައް ހަދަން ފަށާފައިވާކަން އެއޮތޯރިޓީން ވަނީ ވިދާޅުވެފައެވެ.

އެންޑީއެމްއޭއިން ވިދާޅުވީ، ވިއްސާރައިގަ ގެއްލުންވި މާލޭގެ 41 ގޭބިސީ ފާހަގަކުރެވުނުކަމަށާއި އޭގެތެރެއިން 4 ގެއަކުން އެސެސްމަންޓު ހަދަން ބޭނުން ނުވާކަން އަންގަފައިވާތީ އެއޮތޯރިޓީން އެސެސްމަންޓު ހެދީ 37 ގޭބިސީއެއްގައިކަމަށެވެ. އެގޮތުން ޢިމާރާތަށާއި ގޭގައި ހިފާގެންގުޅޭ ތަކެއްޗަށް ލިބު ގެއްލުން ވަޒަންކުރިއިރު، އެ ގެބިސީތަކަށް 819،549 ރުފިޔާގެ ގެއްލުން ލިބިފައިވާކަމަށް އެންޑީއެމްއޭއިން ވިދާޅުވެއެވެ.

ރާއްޖެއަށް މިހާރު ކުރަމުންދާ ވިއްސާރާގައި މިއަދުގެ 14:00 އާ ހަމައަށް 13 ރަށެއްގެ 77 ގެއަކަށް ގެއްލުން ލިބި އެސެސްމަންޓް ފޯމް ވަނީ ހުށަހަޅާފަ. 3 ރަށެއްގެ ދަނޑުބިންތަކަށްވެސް ބޮޑެތި ގެއްލުން ލިބުން. މިހާރު ކުރެވެމުންދަނީ މިފޯމްތަކުގެ ގެއްލުންތައް ވަޒަންކުރުމުގެ މަސައްކަތް

— NDMA Maldives (@NDMAmv) August 19, 2024

ދިރިނޫޅެވޭވަރަށް ގެއްލުން ލިބިގެން މާލޭގެ 5 ގޭބިސީއަކުން 23 މީހަކަށް ވަގުތީ ބޯހިޔާވަހިކަން އެންޑީއެންއޭއިންވަނީ ފޯރުކޮށްދީފައެވެ. އަދި އެހުރިހާ އެންމެންގެ ދިރިއުޅުމުގެ ހާލަތުވެސް މިހާރު އާއްމު ހާލަތަށް ގެނެވިފައިވާކަމަށް އެއޮތޯރިޓީން ވިދާޅުވެއެވެ.

އެންޑީއެމްއޭއިން ވިދާޅުވީ ހޯމަދުވަހުގެ މެންދުރު 2 ޖެހުމާހަމައަށް 13 ރަށަކުން 77 ގެއަކަށް ގެއްލުން ލިބިގެން އެސެސްމަންޓު ފޯމު ހުށައަޅާފައިވާކަމަށެވެ. އަދި 3 ރަށެއްގެ ދަނޑުބިންތަކަށްވެސް ބޮޑެތި ގެއްލުން ލިބިފައިވާކަމަށް ރިޕޯޓުކޮށްފައިވާކަމަށެވެ. ރަށްރަށުން ލިބިފައިވާ ފޯމުތައް ބަލާ ގެއްލުން ވަޒަންކުރުމުގެ މަސައްކަތް މިހާރު ކުރަމުންދާކަމަށާއި ގެއްލުންލިބުނު ފަރާތްތަކަށް ވީއެންމެ އަވަހަކަށް މާލީ އެހީތެރިކަން ފޯރުކޮށްދިނުމަށް މަސައްކަތްކުރަމުންދާކަމަށްވެސް އެންޑީއެމްއޭއިން ވިދާޅުވެއެވެ.

ވޭތުވެދިޔަ ހަފްތާގައި މުޅި ރާއްޖެއަށް ވިއްސާރަވެ، ބޯކޮށްވާރޭވެހިފައިވާއިރު ވައިވެސް ގަދަވެ އޮރެންޖް އިންޒާރުވެސްވަނީ ނެރެފައެވެ. މޫސުމާ ބެހޭ ޤައުމީ އިދާރާއިން ވިދާޅުވީ، މިމަހުގެ 11 ވަނަ ދުވަހުން ފެށިގެން މިމަހުގެ 18 ވަނަ ދުވަހުގެ ނިޔަލަށް މުޅި ރާއްޖެއަށް 4449.7 މިލިލީޓަރުގެ ވާރޭ ވެހިފައިވާކަމަށެވެ. އަދި މާލެއަށް އެކަނި 202.5 މިލިލީޓަރުގެ ވާރޭވެހިފައިވާކަމަށް ރިކޯޑުކުރެވިފައިވާކަން އެއިދާރާއިން ފާހަގަކުރެއްވިއެވެ.