ބިދޭސީންނާގުޅޭ އެއްވެސް ފީއެއް ބޮޑުކުރުމުގެ ވިސްނުމެއް ނެތް: ދާޚިލީ ވަޒީރު

ރާއްޖެއަށް ބިދޭސީން ގެނެސް، އެމީހުން ވަޒީފާދޭ ފަރާތްތަކުން ދިވެހި ދައުލަތަށް ދައްކަންޖެހޭ އެއްވެސް ފީއެއް ބޮޑުކުރުމުގެ ވިސްނުން ނުގެންގުޅުއްވާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ. ވަޒީރު މިހެން ވިދާޅުވީ ރާއްޖޭގައި ބިދޭސީންނަށް ވަޒީފާދީގެން އެމީހުން ގެންގުޅޭ ފަރާތްތަކާ ބައްދަލުކުރައްވާ ދެއްކެވި ވާހަކަފުޅުގައެވެ.

ވަޒީފާ އަދާކުރާ ބިދޭސީންނާ ގުޅިގެން ދައުލަތަށް ދައްކަންޖެހޭ ފީތަކާއި ޖޫރިމަނާގެ ޢަދަދު އެއްލައްކަ ރުފިޔާއަށްވުރެ މައްޗަށް އަރާފައިވާ ކުންފުނިތަކާއި މީހުންގެ ނަންތައް ދާޚިލީ ސަލާމަތާ ބެހޭ ވުޒާރާއިން ވަނީ ޢާންމުކޮށްފައެވެ. އަދި ފީދެއްކުމަށް ވަނީ މިމަހުގެ ނިޔަލަށް މުހުލަތެއް ދީފައެވެ.

ބިދޭސީން ރާއްޖެ އެތެރެކުރާ ކުންފުނިތަކާއި މީހުންނާ ބައްދަލުކުރައްވާ ވާހަކަފުޅުދައްކަވަމުން ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވީ ބިދޭސީންނާ ގުޅޭ ފީތައް ދެއްކުމަށް ސަރުކާރުން އެންގުމުން ބައެއް ފަރާތްތަކަށް ދަތިތައް ހުރިކަން ފާހަގަކުރެވޭކަމަށެވެ. ދާޚިލީ ސަލާމަތާ ބެހޭ ވުޒާރާއިން ޢާންމުކޮށްފައިވާ ލިސްޓުގައި ބައެއް ކުންފުނިތަކުން ދައްކަންޖެހޭ ފައިސާގެ އަދަދު މިލިޔަނުން މައްޗަށް އަރައެވެ.

ދާޚިލީ ސަލާމަތާބެހޭ ވަޒީރު ވަނީ ބައެއް ކުންފުނިތަކުން ބޮޑެތި ޢަދަދުތަކުން ފީ ދައްކަން ޖެހޭކަން ފާހަގަކުރައްވާ އެފަދަ ފަރާތްތަކުން އެއްބަސްވާނަމަ 12 މަސް ދުވަހަށް ބަހާލައިގެން ފީ ދެއްކޭނެ އިންތިޒާމް ހަމަޖައްސައިދެއްވާނެކަމަށް ވިދާޅުވެފައެވެ.

ވަޒީރު ވިދާޅުވީ ޤާނޫނާއި ގަވާއިދާ އެއްގޮތަށް ބިދޭސީން ގެންގުޅޭ ފަރާތްތަކުން ޢަމަލުކުރުމަކީ ގަވައިދާ ޚިލާފަށްއުޅޭ ބިދޭސީންގެ މައްސަލަ ހައްލުކުރުމަށް މުހިންމުކަމެއް ކަމަށެވެ. ވަޒީރުވަނީ ބިދޭސީންނާ ގުޅިގެން ދައްކަންޖެހޭ އެއްވެސް ފީއެއް ބޮޑު ނުކުރައްވާނެކަމަށްވެސް ވިދާޅުވެފައެވެ.

"ކޯޓާ ފީ، ވަރކް ވިޒާ ފީ ހިމެނޭހެން މިހާރު މިނެގޭ ފީތައް އިތުރުކުރުމުގެ އެއްވެސް ވިސްނުމެއް ސަރުކާރުގެ ނެތް." ދާޚިލީ ސަލާމަތާބެހޭ ވަޒީރު ޢަލީ އިޙްސާން ވިދާޅުވިއެވެ.

ވަޒީރު ވިދާޅުވީ ބިދޭސީންނާގުޅޭ ބައެއް ފީތައް، މަހުން މަހަށް ދެއްކުމުގެ ބަދަލުގައި ގިނަ މަސްތަކަށްވާ ފީ އެއްކޮށްލައިގެން ބަލްކްކޮށް ދެއްކޭނެ އިންތިޒާމް މިހާރު ހަމަޖައްސާފައިވާ ކަމަށެވެ. އެގޮތުން ބިދޭސީންނާގުޅޭ ފީތައް ދެއްކުމަށް އެކްސްޕެޓް ސިސްޓަމުން ބަލްކްކޮށް ފީ މިހާރު ދެއްކޭނެކަމަށް ވަޒީރު ވިދާޅުވިއެވެ.

ބިދޭސީން ރާއްޖެ ގެނެސް އެމީހުން ލައްވާ މަސައްކަތްކުރުވާ ފަރާތްތަކުން ދައްކަންޖެހޭ ވަރކް ޕާމިޓް އަދި ބިދޭސީންގެ ކޯޓާ ފީ ކޮންމެ ތިން އަހަރަކުން ބަދަލުކުރެވޭގޮތަށް ވަޒީފާއާބެހޭ ޤާނޫނަށް ގެނައި އިސްލާޙު މިހާރު މަޖިލީހުން ފާސްކޮށްފައެވެ. މި އިސްލާޙާއެކު ވަރކް ޕާމިޓް އަދި ބިދޭސީންގެ ކޯޓާ ފީ ބޮޑުކުރުމުގެ އިޚްތިޔާރު ކަމާބެހޭ އިދާރާއަށް ލިބޭނެއެވެ. ނަމަވެސް މިފީތައް ބޮޑުކުރުމުގެ ވިސްނުން ނުގެންގުޅުއްވާކަމަށް ސަރުކާރުން މިވަނީ ހާމަކުރައްވާފައެވެ.