ދިރާގު ޕޭގެ ޚިދުމަތް ދިނުމަށް، ދިރާގު ފިންޓެކަށް އެމްއެމްއޭއިން ލައިސެންސް ދީފި

ދިރާގު ޕޭގެ ޚިދުމަތްދިނުމަށް، ދިރާގު ފިންޓެކް ޕްރައިވެޓް ލިމިޓެޑްއަށް މޯލްޑިވްސް މަނިޓަރީ އޮތޯރިޓީއިން ލައިސެންސް ދޫކޮށްފިއެވެ. ދިރާގު ފިންޓެކް ޕްރައިވެޓް ލިމިޓެޑަކީ ދިރާގުގެ ދަށުން އުފައްދާފައިވާ ސަބްސިޑިއަރީ ކުންފުންޏެކެވެ.

މި ލައިސެންސް ދިރާގާއި ހަވާލުކޮށްދެއްވީ މަރުކަޒީ ބޭންކުގެ ފަރާތުން، ގަވަރުނަރު އަހުމަދު މުނައްވަރުއެވެ. އަދި ދިރާގުގެ ފަރާތުން ލައިސެންސް ހަވާލުވެވަޑައިގަތީ ދިރާގު ކުންފުނީގެ މެނޭޖިންގ ޑިރެކްޓަރ އަދި ދިރާގު ފިންޓެކްގެ ބޯޑު މެންބަރު އިސްމާޢިލް ރަޝީދެވެ.

ދިރާގު ފިންޓެކަށް އެމްއެމްއޭއިން ލައިސެންސް ދޫކޮށްފައިވަނީ ޤައުމީ ޕޭމަންޓް ސިސްޓަމްގެ ޤާނޫނުގެ ދަށުންނެވެ. އެ ޤާނޫނުގައި ވާގޮތުން ދިވެހިރާއްޖޭގައި ޕޭމެންޓް ޚިދުމަތެއް ދެވޭނީ އެކަމަށް ބޭނުންވާ ވަކި ޚާއްސަ ކުންފުންޏަކަށެވެ. ލައިސަންސް ދިނުމާ ގުޅިގެން، ދިރާގުން މިހާރު ދެމުން އަންނަ އިލެކްޓްރޯނިކް މަނީ އިޝޫކުރުމުގެ ޚިދުމަތް ދިރާގު ފިންޓެކް ޕްރައިވެޓް ލިމިޓެޑްގެ ދަށަށް ބަދަލުކުރާނެއެވެ.

ދިރާގު ފިންޓެކް މެދުވެރިކޮށް ދޭނެ މައިގަނޑު ޚިދުމަތަކީ ދިރާގު ޕޭ މެދުވެރިކޮށްދޭ އީ-ވޮލެޓްގެ ޚިދުމަތްތަކެވެ. އެ ޚިދުމަތަކީ ބޭންކް އެކައުންޓުން ވޮލެޓަށް ފައިސާ ޖަމާ ކޮށްގެން އެ ވޮލެޓް މެދުވެރިކޮށް ވިޔަފާރި ކުރުމާއި އަދި ބިލުތައް ދެކުމާއި ސަރުކާރުގެ ބައެއް ޚިދުމަތްތަކަށްވެސް ފައިސާ ދެއްކޭ ޚިދުމަތެކެވެ.