ކަނޑުއޮތްގިރި އެމްއެންޑީއެފްގެ ދަށަށް؛ އެތަނުގެ އޮޕަރޭޝަންތައް ފެލިވަރަށް ބަދަލުކުރަނީ

މިފްކޯގެ ރަށެއް ކަމުގައިވާ ކ.ކަނޑުއޮތްގިރި ފިޝް ވިލެޖު އެމްއެންޑީއެފަށް ދިނުމަށް ކެބިނެޓުގެ މަޝްވަރާއިން ނިންމެވުމާގުޅިގެން އެރަށުގައި އެކުންފުނިން ކުރަމުންދިޔަ މަސައްކަތްތައް ވަގުތީގޮތުން ފެލިވަރަށް ބަދަލު ކުރުމުގެ މަސައްކަތް ފަށައިފިއެވެ.

އެގޮތުން މިފްކޯގެ މެނޭޖްމަންޓާއި އެމްއެންޑީއެފްގެ އިސް އޮފިޝަލުން ބުރާސްފަތިދުވަހުވަނީ ކަނޑުއޮތްގިރިއަށް ވަޑައިގެން ސައިޓް އިންސްޕެކްޝަނެއް ހައްދަވާފައެވެ.

ޖުމްލަ 4 ހެކްޓަރުގެ ކަނޑުއޮތްގިރިއަކީ މިވަގުތު މިފްކޯއިން އުފައްދާ ލައިފްސްޓައިލް ޕްރޮޑަކްޓްތަކުގެ މައިހަބެވެ. އޭގެ ތެރޭގައި ރެޑީ މޭޑް ނުވަތަ ތާޒާކަމާއެކު ވަގުތުން ގަނެގެން ކެވޭ ގިނަ ބާވަތްތަކުގެ އުފެއްދުންތައް ހިިމެނެއެވެ. އަދި އެ ފެސިލިޓީން މަސްވެރިންނަށްވެސް އައީ ޚިދުމަތް ދެމުންނެވެ. އޭގެ ތެރޭގައި ކަޅުބިލަމަހާއި ކަންނެލި މަސް ކިރުމާއި، މަސް ބަންދުކުރުމާއި، ލައިފްސްޓައިލް ޕްރޮޑަކްޓްތައް އުފެއްދުމުގެ އިތުރުން މަސްވެރިންނަށް އައީ އައިސް ދޫކުރަމުންނެވެ. ކަނޑުމަހާއި ކަންނެލި މަހުގެ ލޮއިންސް ބަންދުކުރުމުގެ މަސައްކަތްވެސް ކުރަމުން އައީ ކަނޑުއޮތްގިރީގައެވެ.

މިމަހުގެ 4 ވަނަ ދުވަހު ރައީސް އޮފީހުގައި ބޭއްވި ވަޒީރުންގެ މަޖިލީހުގެ ބައްދަލުވުމުން ނިންމެވީ، ކަނޑުއޮތްގިރީގައި މިފްކޯއިން ކުރަމުންދިޔަ މަސައްކަތަށް އެކަށީގެންވާ ބިމެއް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ކަނޑައެޅުމަށެވެ. އެނިންމެވުމާއި އެއްގޮތަށް ހުޅުމާލެއިން އެކަމަށް އެކަށީގެންވާ ވަރުގެ ބިމެއް ހޯދުމާއި ގުޅޭގޮތުން މިފްކޯއިންދަނީ އެޗްޑީސީއާއެކު މަޝްވަރާ ބައްދަލުވުންތައް ބާއްވަމުންނެވެ.

މިކަމާއި ގުޅޭގުތުން ވާހަކަ ދައްކަވަމުން މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު ވިދާޅުވީ، ކަނޑުއޮތްގިރިއަކީ ކަންނެލި މަސްވެރިކަމަށް ދިމާވާ ގޮންޖެހުންތަކަށް ހައްލެއް ގެނައުމަށް މަސައްކަތް ކުރެވިގެން ދިޔަ ފެސިލިޓީއެއް ކަމަށެވެ. ނަމަވެސް އެކަމަށް އެދެވޭ ހައްލެއް ދިގުމުއްދަތަކަށް މަސައްކަތްކޮށްގެންވެސް މިހާތަނަށް ނުގެނެވޭ ކަމަށެވެ.

"ވަރަށް ބޮޑު ހޭދައެއް ކުރެވިއްޖެ. އެކަމަކު މަސްވެރިންނަށް އަދި ކަންނެލި މަސްވެރިންނަށް ކަނޑުއޮތްގިރި ފަޅަކީވެސް އެދެވޭ ހައްލެއް ލިބުނު ފަޅަކަށް ނުވި. މި ބަދަލާއެކު ހުޅުމާލޭ ބަނދަރުން ކަންނެލި މަސްވެރިންނަށް ހައްލެ ލިބޭނެ ގޮތަށް މި ބަދަލު ގެނެވިފައި މިވަނީ " ވަޒީރު ވިދާޅުވިއެވެ.

މިފްކޯއިން އެމްއެންޑީއެފަށް ކަނޑުއޮތްގިރި ހަވާލުކޮށްފައިވާއިރު، އަންނަ ސެޕްޓެމްބަރު މަހުގެ 15 ގެ ކުރިން މުޅި ފެސިލިޓީ ބަދަލުކުރަންޖެހެއެވެ. އަދި މިކަމާގުޅިގެން އެކުންފުނިން އެންމެ ބޮޑު އިސްކަމެއްދީގެން މިހާރު ކުރިއަށް ގެންދަނީ ފެލިވަރުގައި ލައިފްސްޓައިލް އަދި ކަންނެލި މަހުގެ އުފެއްދުންތައް ޕްރޮސެސްކުރެވޭނެ ގޮތް ހަމަޖެއްސުމުގެ މަސައްކަތެވެ. އަދި އެއީ ވަގުތީ ހައްލެއް ނަމަވެސް އެކުންފުނިން އަމާޒު ހިފާފައި ހުރީ، ލިބިފައިހުރި އިންވެސްޓްމެންޓު ފުރުސަތުތަކުގެ ބޭނުން ހިފައި، ވީހާވެސް އަވަހަކަށް ހުޅުމާލެއިން އެމަސައްކަތް ކުރުމަށް އެކަށީގެންވާ ބިން ހޯދައިގެން ފުޅާދާއިރާއެއްގައި އެ ޚިދުމަތްތައް އަލުން ދިނުމެވެ.

ކަނޑުއޮތްގިރި ފެސިލިޓީއަށް ސައުދީ ފަންޑުގެ އިތުރުން އިސްލާމިކް ޑިވެލޮޕްމެންޓް ބޭންކު (އައިއެސްޑީބީ) ގެ ފަންޑުގެ ދަށުން 8 މިލިއަން ޑޮލަރުގެ އިންވެސްޓްމެންޓް ޕްލޭންކުރެވިފައިވާއިރު، އެ އިންވެސްޓްމެންޓް ކުރިއަށް ގެންދަން ހުޅުމާލެއިން ބިމެއް ހަމަޖެހިގެން ދިއުމަކީ ޚާއްސަ އަހައްމިއްޔަތުކަމެއް ދީގެން ކުރަންޖެހިފައިވާ މަސައްކަތެއްކަމަށް މިފްކޯއިންދެކެއެވެ.