ފަސް މިލިޔަން ގަސް ޕްރޮގްރާމުގެ ދަށުން މިހާތަނަށް 4 ލައްކަ ގަސް ވަނީ އިންދިފައި: ވަޒީރު ޠާރިޤް
-
1.4 މިލިޔަން ގަސް އިންދަންވަނީ ޕްލެޖް ކުރެވިފައި
-
ފުވައްމުލަކުން 1 ލައްކަ ގަސް އިންދަން ވަނީ ޝައުގުވެރިކަން ފާޅުކޮށްފައި
ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ސަރުކާރުން ފަށާފައިވާ 5 މިލިއަން ގަސް އިންދުމުގެ ޕްރޮގްރާގެ ދަށުން މިހާތަނަށް 4 ލައްކަ ގަސް އިންދިފައިވާކަމަށް މޫސުމީ ބަދަލުތަކާއި، ތިމާވެށްޓާއި، ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.
ވަޒީރު ޠާރިޤް މިހެން ވިދާޅުވީ، ފުވައްމުލަކު ސިޓީގައި 5 މިލިޔަން ގަސް އިންދުމުގެ ޕްރޮގްރާމް ރަސްމީކޮށް ފައްޓަވައިދެއްވުމަށްފަހު، ޕީއެސްއެމް ނިއުސްއާއި ވާހަކަ ދައްކަވަމުންނެވެ.
މޫސުމީ ބަދަލުތަކާއި، ތިމާވެށްޓާއި، ހަކަތައާބެހޭ ވަޒީރު ޠާރިޤް އިބްރާހީމް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާފައިވާ 5 މިލިޔަން ގަސް އިންދުމުގެ ޕްރޮގްރާމް އެންމެ ފުޅާ ދާއިރާއެއްގައި ފެށިގެން މިދިޔައީ ފުވައްމުލަކު ސިޓީގައި ކަމަށެވެ. އެގޮތުން ފުވައްމުލަކު ސިޓީ ކައުންސިލާއި އެހެނިހެން މުއައްސަސާތަކުން 1 ލައްކައަށްވުރެ ގިނަ ގަސް އިންދުމަށް ޝައުޤުވެރިކަން ފާޅުކޮށްފައިވާކަމަށެވެ.
ފުވައްމުލަކަކީ ފެހިކަން ގަދަ ރަށެއްކަން ފާހަގަކުރައްވަމުން ކުރިއަށް އޮތް ތަނުގައިވެސް ފުވައްމުލަކު ރައްޔިތުންގެ އެދުމަކީ މި ފެހިކަން ދެމެހެއްޓުން ކަމަށް ވަޒީރު ވިދާޅުވިއެވެ. އަދި ތިމާވެށްޓާ ގުޅޭގޮތުން ބަލާއިރުވެސް ފުވައްމުލަކު ސިޓީއަކީ ޚާއްޞަ މުހިންމުކަމެއް ލިބިގެންވާ ރަށެއްކަން ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، 5 މިލިޔަން ގަސް އިންދުމުގެ ޕްރޮގްރާމްގެ ދަށުން މިހާތަނަށް 4 ލައްކަ ގަސް އިންދިފައިވާ ކަމަށެވެ.
"އަޅުގަނޑު ހަމަ ފާހަގަކޮށްލަން މިއަދުގެ މިހާތަނަށް 1.4 މިލިޔަން ގަސް މި ވަނީ ޕްލެޖްކޮށްފައި އެކި ފަރާތްތަކުން އިންދަން. އަދި މިހާތަނަށް ދިޔަ އިރު 4 ލައްކަ ގަސް އިންދިފައި މި ވަނީ މި ޕްރޮގްރާމްގެ ތެރެއިން. އެހެންވީމަ ރައީސުލްޖުމްހޫރިއްޔާގެ މި 5 މިލިޔަން ގަސް އިންދުމުގެ ޕްރޮގްރާމަކީ އަޅުގަނޑުމެންނަށް ހާސިލް ކުރެވޭނެ ލަނޑުދަނޑިއެއް" މޫސުމީ ބަދަލުތަކާއި ތިމާވެއްޓާ ބެހޭ ވަޒީރު ވިދާޅުވިއެވެ.
މޫސުމީ ބަދަލުތަކާއި، ތިމާވެށްޓާއި، ހަކަތައާބެހޭ ވަޒީރު ޠާރިޤް އިބްރާހީމް ވިދާޅުވީ، ރައީސުލްޖުމްހޫރިއްޔާ ފައްޓަވާފައިވާ މިޕްރޮގްރާމަކީ ޚާއްޞަ އިސްކަމެއް ދެއްވައިގެން ކުރިއަށް ގެންދަވާނެ ޕްރޮގްރާމެއް ކަމަށެވެ. އަދި ކުރިއަށް އޮތް 5 އަހަރު ތެރޭގައި ފުވައްމުލަކުގައި ރަށަށް ބޭނުންވާ އަދި މަދުވެފައިވާ ގަސްތައް އާލާކޮށް، މި ޕްރޮގްރާމް ކާމިޔާބުކަމާއެކު ކުރިއަށް ގެންދެވޭނެ ކަމަށް އުންމީދުކުރައްވާ ކަމަށް ވަޒީރު ވިދާޅުވިއެވެ.