ރަށްރަށުން ކަރަންޓު ކެނޑޭ ސަބަބުތަކުގެ ތެރޭގައި އިހުމާލުގެ ގިނަ މައްސަލަތަކެއް!

ރަށްރަށަށް ކަރަންޓުގެ މައްސަލަތައް ދިމާވަމުންދާ އެންމެ ބޮޑު ސަބަބަކީ މީގެކުރިން އިންޖީނުގެ ތަކުގެ މަސައްކަތްތައް އެންމެ ރަނގަޅުގޮތުގައި ބަލަހައްޓާފައިނުވާތީކަމަށް މޫސުމީ ބަދަލުތަކާއި ތިމަވެއްޓާއި ހަކަތައާބެހޭ ވުޒާރާއިން ވިދާޅުވެއްޖެއެވެ.

ހަކަތައާއި ބެހޭވުޒާރާއިން މިހެން ވިދާޅުވީ ބައެއް ރަށްތަކުން ކަރަންޓު ކެނޑުން ޢާއްމުވުމާއި ގުޅިގެން ބަލަންޖެހޭ ކަންކަން ބެލުމަށްފަހުގައެވެ.

އަތޮޅުތެރޭގެ ރަށްތަކުގެ ތެރެއިން ބޮޑު އިންސައްތައަކަށް ކަރަންޓުގެ ޚިދުމަތް ފޯރުކޮށްދެމުންދަނީ ފެނަކަ ކޯޕަރޭޝަނުންނެވެ. އެހެންކަމުން ކަރަންޓު ކެނޑުމުގެ މައްސަލަ މެދުވެރިވާ ގިނަ ރަށްތަކަކީ ފެނަކައިން ބަލަހައްޓަމުންދާ ރަށްތައްކަން ފާހަގަކޮށްލެވެއެވެ. އަދި އަސާސީ ޚިދުމަތަކާއި ގުޅިގެން ޢާއްމުންގެ ކަންބޮޑުވުން އެކަމަކާއި ގުޅިފައިވާ އެއް މައްސަލައަކީ ކަރަންޓު ކެނޑުމުގެ މައްސަލަތައްކަންވެސް ފާހަގަކޮށްލެވެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ވެރިކަމާއި ހަވާލުވުމަށްފަހު ރައްޔިތުންގެ ފަރާތުން ކުރިމަތިވި އެންމެ ބޮޑު ޝަކުވާއަކަށްވެސް ވެފައިވަނީ ކަރަންޓުގެ ޚިދުމަތް އެންމެ އެކަށީގެންވާ ގޮތެއްގައި ނުލިބުމުގެ މައްސަލައެވެ. އެހެންކަމުން ސަރުކާރުގެ އެންމެ މުހިއްމު އަމާޒަކަށްވީ ކަރަންޓުގެ މައްސަލައަށް ވަގުތީ އަވަސް ޙައްލުތަކެއް ގެނެސްދިނުމެވެ. އަދި މިކަމުގައި ދިމާވެގެން އުޅޭ އަސްލު މައްސަލަ ދެނެގަތުމަށް ބަލަންޖެހޭ ކަންކަން ބަލަން ފެށުމާއެކު ގިނަ އިންޖީނުގެތަކުގައި ހުރި މައްސަލަތައް ވަނީ ފާހަގަކުރެވިފައެވެ.

މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރުގެ ނައިބު ޑރ. މުއާވިޔަތު މުޙައްމަދު ވިދާޅުވީ ރަށްރަށުން ކަރަންޓު ކެނޑުމަށް ދިމާވާ މައްސަލަތައް ދެނެގަތުމަށް މިހާތަނަށް ބެލިބެލުމުން އެންމެ ބޮޑަށް ފާހަގަވީ އެއްކަމަކީ، އިންޖީނުގެތައް ބެލެހެއްޓުމުގައި އިހުމާލުވެފައިވާ މައްސަލަކަމަށެވެ. އެގޮތުން އިންޖީނުތަކަކީ ގަވާއިދުން ބަލަހައްޓާ އަދި އެއަށް ބޭނުންވާ އެކި ބައިތައް ވަކި ޚާއްސަ ޕްލޭނެއްގެ ދަށުން ހޯދައި ބަދަލުކުރަމުންދާންޖެހޭއިރު، ފެންވަރު ދަށް ސްޕެއަރޕާޓްސް ބޭނުންކޮށްފައިވާކަންވެސް މުއާވިޔަތު ފާހަގަކުރެއްވިއެވެ. ނަތީޖާއެއްގެ ގޮތުން އެތަކެތި އަވަހަށް ހަލާކުވެ، އިންޖީނުތައް ހުއްޓެން މެދުވެރިވާކަން ފާހަގަކުރެވިފައިވާކަމަށް މުއާވިޔަތު ވިދާޅުވިއެވެ. މީގެއިތުރުން ކަރަންޓު ގްރިޑުތަކުގައިވެސް މައްސަލަތައް ހުރިކަން މުއާވިޔަތު ފާހަގަކުރެއްވިއެވެ.

"އަދި އެބައުޅޭ ވަރަށް އެހެންކަހަލަ ކަމެއް. އެއީ ތަންކޮޅެއް އަވަސްއަވަހަށް ސްޕެއަރތައް ފެއިލްވުމުގެ މައްސަލަ. ފެނަކައިގެ އަސްލު ޖެނުއިން ކުންފުނީގެ އެއްޗިހި ބޭނުންކުރީމަ، 4 އަހަރު އަދި 5 އަހަރު ބޭނުންކުރެވޭ އެއްޗިހި ގަނެގެން އަޅުވާތާ 3 މަސް 4 މަސްތެރޭ ފެއިލްވާނަމަ ކުންފުނީގައި ނުހުންނާނެ އެކެޕޭސިޓީ މިވަރުގެ އަގު ބޮޑު އެއްޗެހި އިރުއިރުކޮޅާ އެޅުވުމުގެ ކެޕޭސިޓީ." ޑރ.މުޢާވިޔަތު ވިދާޅުވިއެވެ.

ރަނގަޅު ނޫން ސްޕެއަރތައް އަޅުވާފައި ހުރުމުން އިންޖީންތައް ފެއިލްވޭ

ޑރ.މުޢާވިޔަތު ވިދާޅުވީ ކަރަންޓު ކެނޑޭ މައްސަލަތައް ދެނެގަތުމަށް ކުރި މަސައްކަތަށްފަހު، މިހާރު ކުރިއަށްދަނީ މައްސަލަތައް ހައްލުކުރުމުގެ މަސައްކަތްކަމަށެވެ.

"ޖަނެރޭޓަރުތައް ބަހައްޓަންޖެހޭނީ ވަކި ތަރުތީބަކުން. މިސާލަކަށް 2 މެގަވޮޓް ޕީކް އަރާ ރަށެއްގައި، އެވަރުގެ 1 ޖެނަރޭޓަރު ބެހެއްޓީމަ، އެޖެނަރޭޓަރު ފެއިލްވާ ހިސާބުން އެރަށް ފެއިލްވީ. އެހެންވީމަ ރަށްރަށުގެ ލޯޑަށް ބަލާފައި އެރަށެއްގައި ޖަނަރޭޓަރު ބަހައްޓަންޖެހެނީ. ބައެއް ރަށްރަށުގައި 5 އަދި 6 އެއްވެސް ބަހައްޓަންޖެހިދާނެ. އިންޖިނިއަރިންގެ މިންގަނޑުތަކަށް ބަލާއިރު ވަރަށް ގިނަ ރަށްރަށްހުރީ މިންގަނޑަށް ނުފެތި." ޑރ.މުޢާވިޔަތު ވިދާޅުވިއެވެ.

ރަށްރަށުގެ ކަރަންޓު ޑިމާންޑަށް ބެލުމަށްފަހު ކެޕޭސިޓީ އިތުރު ކުރުމުގެ މަސައްކަތް މިހާރު ކުރަމުންދާކަން ސަރުކާރުން ފާހަގަކުރައްވައެވެ. އެގޮތުން ރަނގަޅު ކޮލިޓީގެ ސްޕެއަރތައް ހޯދުމާއި ގްރިޑްތަކުގެ ކެޕޭސިޓީ އިތުރުކުރުމުގެ މަޝްރޫޢުތަކާއި އިޔާދަކުރަނިވި ހަކަތައިގެ ދަށުން ކެޕޭސިޓީ އިތުރުކުރުމަށް ކުރެވޭ މަސައްކަތްތަކުގެ ތެރެއިން ކަރަންޓު މެދުކެނޑުމުގެ މައްސަލަތައް ކުރިމަތިނުވާނެގޮތަކަށް ކަންކަން ބައްޓަންކުރުމުގެ މަސައްކަތް ދަނީ ކުރަމުންނެވެ.