ކުރީގެ ޕީޖީ ޝަމީމަށް ހަމަލާދިންކަމުގެ ތުހުމަތުވާ 7 މީހުންގެ މައްޗަށް ދަޢުވާކޮށްފި

ކުރީގެ ޕްރޮސެކިއުޓަރ ޖެނެރަލް ޙުސައިން ޝަމީމަށް ޙަމަލާދިން މައްސަލާގައި ތުހުމާތުވާ މީހުންގެ މައްޗަށް ދަޢުވާ އުފުލައިފިއެވެ. ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ ޕްރޮސިކިއުޓަރ ޖެނެރަލްގެ މަޤާމުގައި ކުރިން ހުންނެވި އަލްއުސްތާޛް ޙުސައިން ޝަމީމަށް ނުރައްކާތެރި ހަތިޔާރު ބޭނުންކޮށްގެން ހަމަލާދީ ޒަޚަމްކޮށްލާފައިވާ މައްސަލާގައި 7 މީހެއްގެ މައްޗަށް ދަޢުވާކުރުމަށް ކްރިމިނަލް ކޯޓަށް ހުށައަޅަފައިވާކަމަށެވެ.

1. ރ. އަލިފުށި، ރިވެލި، މިދުޙަތު އާދަމް
2. ލ. ގަން، ތުނޑި، ޖަވާހިރުވިލާ، މުޙައްމަދު ޖަޒްލާން
3. ދަފްތަރު ނަންބަރު ދރ 2247، އަޙްމަދު މައިސާން ހާޝިމް
4. ލ. މާމެންދޫ، މުރިނގު، ރަޖުވާން ލަޠީފްއާއި،
5. ތ. ގާދިއްފުށި، މުސްތަރީގެ، ޝަމާލް ޙުސައިން
6. ތ. ދިޔަމިގިލި، ރުވާ، އަބާން ޢަބްދުލްހަންނާނު
7. އދ. މާމިގިލި، ކެމީހިޔާ، ޒަޔާން ނަޞީރު

ޕީޖީ އޮފީހުން ވިދާޅުވީ މި މައްސަލާގައި މި މީހުންގެ މައްޗަށް އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން ނުރައްކާތެރި ހަތިޔާރެއް ބޭނުންކޮށްގެން ޤަޞްދުގައި މީހަކު މަރާލަން އުޅުމުގެ ކުށުގެ ދަޢުވާއެވެ.

ފުލުހުން ވިދާޅުވީ މި މައްސަލާއާ ގުޅިގެން ހައްޔަރުކުރި 7 މީހުން ތިބީ މިހާރުވެސް ބަންދުގައިކަމަށެވެ.