ފަވަރަައަށް އަހަރެއް: 5 މިލިއަން ޓްރާންސްސެކްޝަން، 15 ބިލިއަން ރުފިޔާ

މޯލްޑިވްސް އިންސްޓަންޓް ޕޭމަންޓް ސިސްޓަމް "ފަވަރަ" މެދުވެރިކޮށް ފާއިތުވި އެއް އަހަރު ދުވަހުގެ ތެރޭގައި 15 ބިލިއަން ރުފިޔާ ޓްރާންސްފާކޮށްފިއެވެ.

ރައްކާތެރި އަދި އަވަސް މާލީ މުއާމަލާތްތަކެއް ހިންގުމަށް އެމްއެމްއޭއިން ތަރައްޤީކޮށްފައިވާ "ފަވަރަ" އިފްތިތާހުކޮށްފައިވަނީ މިދިޔަ އަހަރު އޮގަސްޓްމަހުގެ 26 ވަނަ ދުވަހުއެވެ.

ފަވަރައިގެ ޚިދުމަތް ފެށިތާ އަހަރެއްވެފައިވާއިރު އެމްއެމްއޭއިން އާއްމުކޮށްފައިވާ ތަފާސްހިސާބުތައް ދައްކާގޮތުން މިދިޔަ އެއް އަހަރުތެރޭގައި 5 މިލިއަން ޓްރާންސެކްޝަން ފަވަރު މެދުވެރިކޮށް ހިންގާފައިވާކަމަށެވެ. އަދި އެއީ ޖުމްލަ 15 ބިލިޔަން ރުފިޔާކަމަށްވެސް އެމްއެމްއޭއިން ބުނެއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ތަރައްޤީކޮށްފައިވާ "ފަވަރަ"އަކީ ރައްކާތެރި އަދި އަވަސް މާލީ މުއާމަލާތްތަކެއް ހިންގުމަށް ތަރައްޤީކޮށްފައިވާ މޯލްޑިވްސް އިންސްޓަންޓް ޕޭމަންޓް ސިސްޓަމްއެކެވެ. މި ސިސްޓަމްގެ ދަށުން ބޭންކް އެކައުންޓެއް ނެތް ފަރާތްތަކާއި ރާއްޖޭގެ ކޮންމެ ބޭންކެއްގެ އެކައުންޓަކުންވެސް ފަސޭހަކަމާއެކު ބޭންކިންގ މުއާމަލާތްތައް ހިންގެއެވެ.

"ފަވަރަ" ޓްރާންސްފާއިން މަދު ސިކުންތުކޮޅެއްގެ ތެރޭގައި އެއް ބޭންކުން އަނެއް ބޭންކަށް ފައިސާ ޖަމާކުރެވޭނެއެވެ. އަދި "ފަވަރަ" ރިކުއެސްޓް މެދުވެރިކޮށް، އަމިއްލަ ފަރާތްތަކާއި ވިޔަފާރިތަކަށްވެސް ބިލް ފޮނުވައިގެން ފައިސާގެ މުއާމަލާތްތައް ހިންގޭނެއެވެ. މި ސިސްޓަމްގައި މިހާތަނަށް ބައިވެރިވެފައިވަނީ ރާއްޖޭގެ 2 ބޭންކަކާއި ބޭރުގެ 3 ބޭންކެއް ހިމެނޭހެން 5 ބޭންކަކުންނެވެ. އެއީ ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް، ސްޓޭޓް ބޭންކް އޮފް އިންޑިއާ، ބޭންކް އޮފް ސިލޯން އަދި މޮރިޝަސް ކޮމާޝަލް ބޭންކް ހިމެނެއެވެ.

ފަވަރަ އިންސްޓަންޓް ޕޭމަންޓް ސިސްޓަމުން ދޭ ޚިދުމަތްތަކުގެ ތެރޭގައި އިންސްޓަންޓް ޕޭމަންޓްސް، ރިކުއެސްޓް ޓު ޕޭ، ސްމާޓް އެޑްރެސިން އަދި އެކައުންޓް ވެރިފިކޭޝަންގެ މުއާމަލާތް ހިމެނެއެވެ.