އަތޮޅު ކައުންސިލްތަކުގެ އިންޓަރނަލް އޮޑިޓް ހެދުމުގެ ޤާބިލްކަން އިތުރުކުރަންޖެހޭ: ވަޒީރު

ކައުންސިލްތަކަށް ނޭނގިގެން ހެދޭ ގޯސްތައް އިޞްލާޙުކުރުމަށް އިންޓަރނަލް އޮޑިޓް ރަނގަޅުވާން ޖެހޭކަމަށާއި، އެހެންކަމުން އަތޮޅު ކައުންސިލްތަކުގެ އިންޓަރނަލް އޮޑިޓް ހެދުމުގެ ޤާބިލްކަން އިތުރުކުރުން މުހިންމުކަމަށް ސިޓީތަކާއި އިދާރީ ދާއިރާތަށް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

ވަޒީރު މިހެން ވިދާޅުވީ ދައުލަތުގެ ޕްރޮކިޔުމަންޓް ނިޒާމާއި ކައުންސިލުތަކުގެ ފައިސާގެ ކަންތައްތައް ހިންގާ ބެލެހެއްޓުމާއި އިދާރީ ގޮތުން ކައުންސިލުތައް ހިންގުން ހަރުދަނާކުރުމާ ގުޅޭ ތަމްރީނު ޕްރޮގްރާމް ފަށްޓަވައި ދެއްވައި ދެއްކެވި ވާހަކަފުޅުގައެވެ.

ސިޓީތަކާއި އިދާރީ ދާއިރާތަށް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ވިދާޅުވީ ރަށްރަށުގެ އިންޓަރނަލް އޮޑިޓް މިހާރަށްވުރެ އިތުރަށް ވަރުގަދަވާން ޖެހޭކަމަށެވެ. ނަމަވެސް ގަސްތުގައި ކައުންސިލްތަކުން ގޯހެއް ހައްދަވާނެ ކަމަށް ޤަބޫލުފުޅު ނުކުރައްވާ ވަޒީރު ވިދާޅުވިއެވެ.

ވަޒީރު ވިދާޅުވީ ނޭނގިގެން ހެދޭ ގޯސްތައް ހޯދާ އިޞްލާޙުކުރުމަށް އިންޓަރނަލް އޮޑިޓް ރަނގަޅުވާން ޖެހޭ ކަމަށެވެ. އެހެންކަމުން އަތޮޅު ކައުންސިލްތަކުގެ އިންޓަރނަލް އޮޑިޓް ހެދުމުގެ ޤާބިލްކަން އިތުރުކުރުމުގެ މުހިންމުކަން ސިޓީތަކާއި އިދާރީ ދާއިރާތަށް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް އުމަރު ފާހަގަކުރެއްވިއެވެ.

ސިޓީތަކާއި އިދާރީ ދާއިރާތަށް ހިންގުމާއި އާންމު މަސައްކަތްތަކާއި ބެހޭ ވުޒާރާއާއި އެލްޖީއޭ ގުޅިގެން އޮންލައިންކޮށް ހިންގާ ތަމްރީނު ޕްރޮގްރާގްއަކީ 3 ދުވަހުގެ ޕްރޮގްރާމްއެކެވެ. މި ޕްރޮގްރާމްގައި 40 ރަށެއްގެ ރަށު ކައުންސިލުންނާއި 5 އަތޮޅެއްގެ އަތޮޅު ކައުންސިލުން ހިމެނޭހެން ޖުމްލަ 170އަށް ވުރެ ގިނަ ފަރާތް ބައިވެރިވާކަމަށް އެ ވުޒާރާއިން ވިދާޅުވެއެވެ.

މި ޕްރޮގްރާމުގެ ސަބަބުން ކައުންސިލުތަކުގައި މަސައްކަތްކުރައްވާ މުވައްޒަފުންނަށް ގިނަގުނަ ފައިދާތަކެއް ލިބި ކައުންސިލުތަކުގެ އިދާރީ ހިންގުން އިތުރަށް ހަރުދަނާވާނެކަމަށް ސިޓީތަކާއި އިދާރީ ދާއިރާތަށް ހިންގުމާއި އާންމު މަސައްކަތްތަކާއި ބެހޭ ވުޒާރާއިން ވިދާޅުވެއެވެ.