މަސްވެރިކަމުން އާމްދަނީ އިތުރުކުރެވޭނީ ކޯޓާއާ އެއްވަރަށް މަސް ބާނައިގެން: ވަޒީރު ޝިޔާމް

ދައުލަތައް ވަންނަ އާމްދަނީ އިތުރުކުރެވޭނީ މަސްވެރިކަމުގެ ކަނޑައެޅޭ ކޯޓާއާ އެއްވަރަށް މަސްބޭނިގެން ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ "ޖީ-ސިކްސްޓީން ލައިކް މައިންޑެޑް ސްޓޭޓްސް އޮފް ދަ އިންޑިއަން އޯޝަން"ގެ 36 ވަނަ ސެޝަންގައި ބައިވެރިވެވަޑައިގަތުމަށްފަހު ޕީއެސްއެމް ނިއުސްއަށް ދެއްވި ބަސްތީގަތުމެއްގައެވެ.

މި ބައްދަލުވުމުގައި ބައިވެރިވެވަޑައިގެން ވަޒީރު އަޙްމަދު ޝިޔާމް ވަނީ ބައްދަލުވުމުގެ ބައިވެރިންނާއި މުޚާތަބުކުރައްވާ ވާހަކަފުޅުދައްކަވާފައެވެ. އެގޮތުން މިފަދަ ބައްދަލުވުންތަކުގައި ޤައުމުތަކުން ބައިވެރިވުމުން ދޭހަވަނީ ޤައުމުތަކުން ކަނޑުގެ ވަސީލަތްތައް ހިމާޔަތްކުރުމަށް ދޭ އަހަމީއްޔަތުކަން ކަމުގައި ވަޒީރު ފާހަގަކުރެއްވިއެވެ.

އެގޮތުން މިފަދަ ބައްދަލުވުމެއް ރާއްޖޭގައި ބޭއްވިގެންދާއިރު މީގެ ސަބަބުން އިންޑިއަން އޯޝަން ޓޫނާ ކޮމިޝަނުގައި ޤައުމުތަކުގެ އަޑު އިއްވުމަށް ބޭނުންވާ މުހިންމު މަޝްވަރާތައް މީގެ ތެރެއިން ކުރެވިގެންދާކަން ވަޒީރު ފާހަގަކުރެއްވިއެވެ.

މި ބައްދަލުވުމަށްފަހު ޕީއެސްއެމް ނިއުސްއާ ވާހަކަފުޅުދައްކަވަމުން ވަޒީރު އަޙްމަދު ޝިޔާމް ވިދާޅުވީ، މިފަދަ ބައްދަލުވުންތައް ރާއްޖެއަށް މުހިންމުވަނީ ދެމެހެއްޓެނިވި މަސްވެރިކަމުގައި ރާއްޖެއަކީ ކުޑަނަމަވެސް އަޑުގަދަ ޤައުމެއްކަމަށްވާތީ ކަމަށެވެ. އެހެންކަމުން މިފަދަ ބައްދަލުވުންތަކުގައި ރާއްޖެއިން ކުރާ މަސްވެރިކަމުން ނަމޫނާ ނަގަން ޖެހޭކަން ފާހަގަކުރެވިގެންދާކަމަށް ވަޒީރު ވިދާޅުވިއެވެ.

މަސްވެރިކަމާބެހޭ ވަޒީރު ފާހަގަކުރެއްވި ގޮތުގައި، މިބައްދަލުވުމުގެ ތެރެއިން އިންޑިއާ ކަނޑުގެ ސަރަޙައްދުގެ ޤައުމުތަކަށް މަސްވެރިކަމުގެ ކޯޓާ ކަނޑައެޅުމުގެ މަޝްވަރާތައް ކުރެވޭނެއެވެ. އެހެން ކަމުން ޤައުމުތަކުން ކޯޓާ ކަނޑައެޅުމުގައި އެބަޔަކު ކުރާ މަސްވެރިކަމަށް ރިޢާޔަތްކޮށް އިންސާފުވެރިކަމާއެކު މިކަން ވުމަކީ ރާއްޖެއިން އުއްމީދުކުރާ ގޮތް ކަމަށް ވަޒީރު ވިދާޅުވިއެވެ.

އިންޑިއާ ކަނޑުގެ ސަރަޙައްދުގައި މަސްވެރިކަމުގެ ކޯޓާ ކަނޑައަޅާއިރު މި ކޯޓާއާއި އެއްވަރަށް މަސްބޭނުމަކީ މުހިންމުކަމެއްގެ ގޮތުގައި ވަޒީރު ފާހަގަކުރެއްވިއެވެ. އެގޮތުން ކޯޓާ ހަމަ ނުކުރެވުމަކީ އޭގެ އުނދަގޫތައް ފަހުން ކުރިމަތިވާނެ ކަމެއްގެ ގޮތުގައި ވަޒީރު ފާހަގަކުރެއްވިއެވެ.

"އަޅުގަނޑުމެންނަށް ވަރަށް މުހިންމު ކަނޑައެޅޭ ކޯޓާ އޭގެ ބޭނުން އެންމެ ފުރިހަމަ ގޮތުގައި ހިިފިގެން ދިއުން. އަޅުގަނޑަށް ޤަބޫލުކުރެވޭ ގޮތުގައި ދައުލަތައް އަދި ޤައުމަށް ވަންނަ އާމްދަނީވެސް އިތުރުވެގެންދާނީ އަޅުގަނޑުމެންނަށް ލިބޭ ކޯޓާއާއި އެއްވަރަށް މަސްވެރިކަން ކުރެވިގެން އަދި އަޅުގަނޑުމެންނަށް ކޯޓާ އިތުރުކުރުމަށް މަސައްކަތް ކުރެވޭނީވެސް އެ މިންގަނޑަށް މަސްވެރިކަން ފުޅާވެގެން " ވަޒީރު ވިދާޅުވިއެވެ.

ރާއްޖެއަށް މަސްވެރިކަމުގެ ކަނޑައެޅިފައިވާ ކޯޓާއާއި އެއްވަރަށް މަސްނުބޭނި ދިއުމަކީ ސަރުކާރުގެ ކަންބޮޑުވުމެކެވެ. އެގޮތުން އިންޑިއަން އޯޝަން ޓޫނާ ކޮމިޝަނުން ބޮޑު ކަންނެލީގެ މަސްވެރިކަމަށް 47،000 ޓަނުގެ ކޯޓާއެއް ރާއްޖެއަށް ދީފައިވާއިރު، މިފަހަކަށް އައިސް ރާއްޖެއިން ބޭނެނީ 20،000 ޓަނު ކަމަށް މަސްވެރިކަމާބެހޭ ވުޒާރާއިން ވިދާޅުވެއެވެ.