މިހާރުވެސް 2048 މަޝްރޫޢު ދަނީކުރިއަށް، 1853 މަޝްރޫޢު ފަށަން ތައްޔާރުވެފައި

ޤައުމުގެ މާލީ ހާލަތު ދަށްއިރުވެސް، މުޅި ރާއްޖޭގައި ދެހާހަށްވުރެ ގިނަ މަޝްރޫޢުގެ މަސައްކަތް ހިނގަމުންދާކަމަށް އިޤުތިޞާދީ ތަރައްޤީއާއި ވިޔަފާރިއާއި ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމްނިއުސްގެ ރާއްޖޭމިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.

އިޤްތިޞާދީ ތަރައްޤީއާއި ވިޔަފާރީގެ ވަޒީރު މުޙައްމަދު ސަޢީދު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ފުރަތަމަ ރައްޔިތުންގެ މަޖިލީހުގައި އިއްވެވި ރިޔާސީ ބަޔާނުގައި، ޤައުމުގެ މާލީ ޙާލަތާއި އެ މަނިކުފާނު އަޅުއްވަން ގަސްތުކުރައްވާ ފިޔަވަޅުތައް ވަރަށް ތަފްޞީލުކޮށް ހާމަކުރައްވާފައިވާ ކަމަށެވެ. އެގޮތުން ދައުލަތުގެ ދަރަނިވެރިވެފައިވާ ކުންފުނިތަކުގެ މާލީ ހާލަތު ހަރުދަނާކުރުމުގެ މުހިންމުކަމާއި، އިޖްތިމާޢީ މައްސަލަތަކަށް ޙައްލު ހޯދުމާއެކު، ރާއްޖޭގެ އިޤްތިޞާދީ ފުދުންތެރިކަން އިތުރުކުރަން ޖެހޭކަން ރައީސް ހާމަކުރައްވާފައިވާކަން ވަޒީރު ފާހަގަކުރެއްވިއެވެ.

ރައީސް އަބަދުވެސް މަސައްކަތް ކުރައްވަމުން ގެންދަވަނީ ޤައުމުގެ ދަރަނި އިތުރުނުވާނެ ގޮތަށް ޚަރަދުތައް ބެލެހެއްޓުމަށްކަމަށައި، ރާއްޖެއިން ނަގާފައިވާ ދަރަނިތައް އަދާކުރުމާއެކު، ޤައުމުގައި ކުރިއަށްދާ ތަރައްޤީގެ މަޝްރޫޢުތަކަށް ބުރޫނާރާނެ ގޮތަކަށް ކަންކަން ރާވައި ހިންގުމަށް ރައީސް އިސްކަންދެއްވާކަމަށް އިޤްތިޞާދީ ވަޒީރު ވިދާޅުވިއެވެ.

ސަޢީދު ވިދާޅުވީ ޤައުމުގެ މާލީ ޙާލަތު ދަށްވެފައިވީ ނަމަވެސް، ޖުމްލަ 3,052 މަޝްރޫޢުގެ ތެރެއިން 2,048 މަޝްރޫޢުގެ މަސައްކަތް މެދުނުކެނޑި ރާއްޖޭގެ އެކި ކަންކޮޅުތަކުގައި ކުރިއަށްދާ ކަމަށެވެ. މީގެ އިތުރުން، 1,853 މަޝްރޫޢުގެ އެއްބަސްވުންތައް ވެވި، އެ މަސައްކަތްތައް ފެށުމަށް ތައްޔާރުވެފައިވާ ކަމަށްވެސް ވަޒީރު ހާމަކުރެއްވިއެވެ.

"މި ޕްރޮޖެކްޓްތަކުގެ ވާހަކަ ދައްކާއިރު 24 ގަޑިރު ތިލަފުށިން ފެށިގެން މާލެއަށް ގުޅާލާ ބްރިޖްގެ މަސައްކަތް ދަނީ ކުރަމުން. މިއަދު އެންމެ ޚާއްސަ ސަމާލުކަމެއް ދެއްވައިގެން އެންމެ ފުރަތަމަ ކުރެއްވީ ހުއްޓިފައި ހުރި ޓަރމިނަލަށް ޒިޔާރަތް ކުރުމާއި ބްރިޖްގެ މަސައްކަތް އަވަސްކުރުމަށް. މިވަގުތުވެސް 2048 ޕްރޮޖެކްޓެއްގެ ހުއްޓުމެއްނެތި ދަނީ ކުރަމުން. އެއީ 3052 ޕްރޮޖެކްޓް ތެރެއިން. އަދި އިތުރު 1853 ޕްރޮޖެކްޓެއްގެ މަސައްކަތް ވަނީ ކޮންޓްރެކްޓް ކުރެވިފައި" ވަޒީރު ވިދާޅުވިއެވެ.

އިޤްތިޞާދީ ތަރައްޤީއާއި ވިޔަފާރީގެ ވަޒީރު މުޙައްމަދު ސަޢީދު ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވެރިކަމުގެ ފާއިތުވި 9 މަސްދުވަހުގެ ތެރޭގައި އިޤްތިޞާދީ ގިނަ މަސައްކަތްތަކެއް ކުރެވިފައިވާ ކަމަށެވެ. މިގޮތުން، ޑިވެލޮޕްމަންޓް ބޭންކުގެ ލައިސަންސްގެ މަސައްކަތް ނިމި، ކައިރި މުސްތަޤުބަލެއްގައި އެ ލައިސަންސް ދޫކުރެވޭނެ ކަމަށް އެ މަނިކުފާނު ފާހަގަކުރެއްވިއެވެ. އަދި ފައިނޭންޝަލް ސެންޓަރުގެ ޤާނޫނު އެކުލަވާލުމުގެ މަސައްކަތް ނިމި، އެ ބިލު ރައްޔިތުންގެ މަޖިލީހުގެ ތަޅުމަށް ފޮނުވުމަށް ތައްޔާރުވެފައިވާ ކަމަށްވެސް ވަޒީރު ސަޢީދު ހާމަކުރެއްވިއެވެ.

މީގެ އިތުރުން ފުނަދޫގައި ރައްކާކުރެވިފައިވާ ތެޔޮ އެހެން ސަރަޙައްދަކަށް ބަދަލުކުރުމުގެ މަސައްކަތް މިހާރުކުރިއަށްދާކަމަށާއި، އިތުރުން، ރާއްޖޭގައި ފުރަތަމަ ފަހަރަށް އިކޮނޮމިކް ޒޯނެއް މި ފަސް އަހަރުގެ ތެރޭގައި ޤާއިމުކޮށް، އޭގެ މަސައްކަތް ފެށޭނެ ކަމަށްވެސް ވަޒީރު ވިދާޅުވިއެވެ. އަދި މޯލްޑިވްސް ގޭޓްވޭގެ މަސައްކަތްވެސް ކުރު މުއްދަތެއްގެ ތެރޭގައި ފެށިގެންދާނެ ކަމުގެ ޔަޤީންކަން ވަޒީރު ދެއްވިއެވެ.

މި މަޝްރޫޢުތަކަކީ ރާއްޖެއަށް ވަންނަ އާމްދަނީ އިތުރުކޮށް، އިޤްތިޞާދު ސިންދަފާތުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ އަހަމިއްޔަތުގެ ދަށުން ކުރިއަށްދާ މަސައްކަތްތަކެއްކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވިއެވެ.