ހެޔޮ ބަހެއް ބުނުމަކީވެސް ޞަދަޤާތެއް: ޚުޠުބާ

ފާފައެއް ކުރެވުމަކީ، ދީނަށް ލޯބިކުރުމާއި، ދީނަށް ޚިދުމަތްކުރުމަށް ހުރަސްއެޅޭ ސަބަބެއް ނޫންކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ. މިއަދު ހުކުރު ޚުޠުބާގެ މަޢުޞޫއަކީ ދީނަށްޓަކައި ޚިދުމަތްކުރުމެވެ.

ޚުޠުބާގައި ވިދާޅުވީ ދީނަށް ޚިދުމަތްކުރުމަކީ، ބާއްޖަވެރިކަމުގެ އަސާސްކަމަށާއި، އެއީ ޙާޖަތްތައް ފުއްދާދީ، މޮޅިވެރިކަން ފިލުވާލަދޭ ޢަމަލެެއްކަމަށެވެ. ދީނަށް ޚިދުމަތްކުރުމަށް ގޮވާލާ ޚުޠުބާގައި ވިދާޅުވީ ހެޔޮ ބަހެއް ބުނުމަކީވެސް ޞަދަޤާތެއް ކަމަށެވެ. އަދި ހެޔޮ ކަންކަމަށް އަމުރުކޮށް ނުބައި ކަންތައް ނަހީކުރުމަކީ ނަޖާވާނޭ ޢަމަލެއް ކަމަށްވެސް ޚުޠުބާގައި ވިދާޅުވިއެވެ.

"ﷲގެ ދީނަށް ދަޢުވަތުދިނުމަކީ، ރަސޫލުންނާއި ނަބިއްޔުންގެ މަންހަޖެއް. ދާއިމީ ގޮތެއްގައި ކުރެވޭ މަދު ޢަމަލު، މެދުކެނޑުމާއެކު ކުރެވޭ ގިނަގުނަ ޢަމަލުތަކަށް ވުރެ ހެޔޮވެގެންވޭ" ޚުޠުބާގައި ވިދާޅުވިއެވެ.

ހުކުރު ޚުޠުބާގައި ވިދާޅުވީ ފާފައެއް ކުރެވުމަކީ، ދީނަށް ލޯބިކުރުމާއި، ދީނަށް ނަޞްރުދިނުމާއި، ދީނަށް ޣީރަތްތެރިވުމަށް ހުރަސްއެޅޭ ސަބަބެއް ނޫންކަމަށެވެ. ކުށްތަކުން އިންސާނުން ސަލާމަތްވެގެންނެއް ނުވާކަމަށާއި، ހިތާމައަކީ، ފާފަތަކުގެ ނާޖާއިޒު ފައިދާ ހޯދުމުގެ ފުރުޞަތު ޝައިޠާނާއަށް ދެވޭކަން ކަމަށް ޚުޠުބާގައި ވިދާޅުވިއެވެ. ފާފަތަކުގެ ސަބަބުން ދީންވެރިވެ އުޅުމުގެ ޤާބިލުކަން އަހަރެމެންގެ ކިބައިގައި ނެތިއްޖެކަމަށް ޝައިޠާނާ ވިސްނައިދޭނެކަމަށްވެސް ވިދާޅުވިއެވެ.

އަދި އެކަން އެ މަގުން ހިނގާ ނަމަ، ދީނަށް ނަޞްރުދޭނޭ ބަޔަކު ނުތިބޭނެ ކަމަށާއި ދީން ޤާއިމުވެ ނުވެސް އޮންނާނެ ކަމަށް ޙުޠުބާގައި ވިދާޅުވިއެވެ.

"ތިބާގެ މައްސަލައަކީ ފުޓުބޯޅަ ޓީމެއްހެން، ބައެއް ފަހަރު ކާމިޔާބުވެ، އަނެއްބައި ފަހަރު ނާކާމިޔާބުވާ ގޮތަށް އޮތް މައްސަލައެއް ނޫން. ތިބާއަށް މުހިންމީ، ވަގުތީ އުފަލާއި، ކެއުމާއި ބުއިމެއް ނޫނެވެ. އެއީ އެހެން ބައަކަށް މުހިންމުވާ ކަންކަން، އެބައިމީހުންނާ ބެހޭ ގޮތުން މާތް الله ވަޙީކުރައްވައިފައިވާ ބަސްފުޅެއްގެ މާނައިގައި ވޭ. "އަދި ކާފިރުވި މީހުން (ދުނިޔޭގެ ދިރުއުޅުމުގައި) އެއުރެން ފަސޭހަކަމާއި އަރާމު ލިބިގަނެ، ނަޢަމްސޫފި ކައިއުޅޭ ފަދައިން އެއުރެން ކައިއުޅެތެވެ. އަދި އެއުރެން ތިބެނިވި ތަނަކީ ނަރަކައޭ." ޚުޠުބާގައި ވިދާޅުވިއެވެ.

މާތް ﷲއަށް ކިޔަމަންގަތުމުގައި، އަހުރެމެންގެ ކިބައިގައި ހުރި ފަރުވާކުޑަކަމާއި، ކުރެވޭ ކުށްތަކަކީ ދީނަށް ޚިދުމަތްކުރުމަށް ހުރި ޢުޛުރެއް ނޫނެވެ. މި ބޮޑު މަސްއޫލިއްޔަތުން ރެކެން އޮތް ބަހަނާއެއް ނޫންކަމަށް ޚުޠުބާގައި ވިދާޅުވިއެވެ.

އަހަރެމެންގެ ވާޖިބަކީ މި ދީނަށް ޚިދުމަތްކުރުން ކަމަށާއި، ކުށާއި ފާފައިގެ ސަބަބުން، ދީނަށް ޢަމަލުކުރުމާއި، ދީން ދެކެވާ ލޯތްބާއި މުސްލިމުންނަށް ވާގިވެރިވުމަށް ބަދަލެއް ނާން ކަމަށް ވިދާޅުވެ ދީނަށް ޚިދުމަތްކުރުމަކީ އެންމެންގެ މަސްއޫލިއްޔަތެއްކަން ޚުޠުބާގައިވަނީ ހަނދާންކޮށްދީފައެވެ.