އަންހެނަކު ރަހީނުކޮށް ވަޅިން ބިރުދެއްކީ، އަދަބު ލުއިކޮށްދީފައިވާ މީހެއް

މާލޭގައި އަންހެނަކު ރަހީނުކޮށް، ވަޅިން ބިރުދައްކައި، ފުލުހުންނަށް އިންޒާރުދިން މީހަކީ، ނިމިދިޔަ ސަރުކާރުގައި ޖަލު އަދަބު ލުއިކޮށްދީ، މިނިވަންކޮށްފައިވާ މީހެއްކަން ހާމަވެއްޖެއެވެ.

މާލޭގައި އަންހެނަކު ރަހީނުކޮށް ވަޅިން ބިރުދެއްކީ މީގެ ދެ އަހަރެއްހާ ދުވަސް ކުރިން ޖަލު އަދަބުދީ ލުއިދީފައިވާ ށ. މިލަންދޫ، ހެޕީލޭންޑް އަހުމަދު އަޚްތަރުއެވެ. އަޙްމަދު އަޚްތަރަކީ މީގެކުރިން ޖިނާއީ ކުށެއް ސާބިތުވެ ޖަލު ޙުކުމެއް ތަންފީޛުކޮށްފައިވާ މީހެކެވެ.

2022 ވަނަ އަހަރުގެ ޖެނުއަރީމަހުގެ 1 ވަނަ ދުވަހުން ފެށިގެން 2023 ވަނަ އަހަރުގެ ނޮވެމްބަރުމަހުގެ 16 ވަނަ ދުވަހާއި ހަމައަށް އެމްޑީޕީ ސަރުކާރުން ހުކުމް ލުއިކޮށް 434 ކުށްވެރިން ވަނީ ޖަލުން މިނިވަންކޮށްފައިކަމަށް ދާޚިލީ ސަލާމަތާބެހޭ ވުޒާރާއިން ވިދާޅުވެފައިވެއެވެ. ރޭ އަންހެނަކު ރަހީނުކޮށް ވަޅިން ބިރުދައްކައި، ފުލުހުންނަށް އިންޒާރު ދީފައިވާ އަޚްތަރަކީ، ކުރީ ސަރުކާރުން އަދަބު ލުއިކޮށްދިން މީހުންގެތެރޭގައި ހިމެނޭ މީހެކެވެ. މައުލޫމާތު ލިބިފައިވާ ގޮތުގައި އަޚްތަރަށްވަނީ، މާފުދިނުމާއި އަދަބު ލުއިކޮށްދިނުމުގެ ޤާނޫނުން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، 2022 ވަނަ އަހަރުގެ ސެޕްޓެމްބަރު މަހުގެ 2 ވަނަ ދުވަހު ހުކުމް ލުއިކޮށްދީފައއެވެ. މި ލުޔާއެކު، ވަކި ޝަރުޠުތަކަކާ އެއްގޮތްވާ ގޮތުގެ މަތިން އޭނާ ހުރީ ދޫކޮށްލާފައެވެ.

ފުލުހުން ވިދާޅުވީ ދިވެހި ފިރިހެނަކު ގެއެއްގެ ތެރޭގައި އަންހެނަކު ބަންދުކޮށްގެން އަނިޔާކުރާކަށް ބުނެ ލިބުނު ރިޕޯޓަކާއި ގުޅިގެން ފުލުހުން ހަރަކާތްތެރިވިކަމަށެވެ. އަދި އަންހެން މީހާ ސަލާމަތްކުރަން ފުލުހުން މަސައްކަތްކުރުމުން އަންހެން މީހާގެ ކަރުގައި ވަޅި ޖައްސައިގެން ފުލުހުންނަށް ބިރު ދެއްކިކަމަށްވެސް ފުލުހުން ވިދާޅުވިއެވެ.

ފުލުހުން ވިދާޅުވީ އަންހެން މީހާގެ ކަރުގައި ވަޅި ޖައްސައިގެން ސައިކަލެއްގައި އަރުވައިގެން ފިލަން އުޅުމުން ބާރުގެ ބޭނުންކޮށްގެން އަންހެން މީހާ ސަލާމަތްކޮށްފައިވާކަމަށެވެ.

ފުލުހުން ވިދާޅުވީ އަންހެން މީހާއަށް އައިޖީއެމްއެޗްގައި ފަރުވާ ދީފައިވާކަމަށާއި، އޭނާގެ ހާލު ރަނގަޅުކަމަށެވެ. އަދި ވޅިން ބިރުދެއްކި ފިރިހެން މީހާއަށް އޭޑީކޭ ހޮސްޕިޓަލުގައި ފަރުވާދެމުން އަންނަކަމަށާއި، އޭނާގެ ހާލުވެސް ރަނގަޅުކަމަށް ފުލުހުން ވިދާޅުވިއެވެ.

އަންހެން މީހާގެ ކަރުގައި ވަޅި އެޅިފައިނުވި ނަމަވެސް އަންހެން މީހާ އަށް ނަފްސާނީ ގޮތުން އެއްވެސް ގެއްލުމެއް ލިބިފައިވޭތޯ ބަލަމުންދާކަމަށް ފުލުހުން ވަނީ ވިދާޅުވެފައެވެ.

ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން ހިއްސާކޮށްފައިވާ ތަފާސް ހިސާބުތަކުން ދައްކާގޮތުގައި ހުކުމަށް ނުވަތަ ބަންދަށް ލުއި ދިނުމަށްފަހު ދޫކޮށްލާފައިވާ މީހުންގެ ތެރޭގައި ކްލެމެންސީއާ އަފްއާމުގެ ދަށުން ދޫކޮށްލާފައިވާ މީހުންނާއި ޕެރޯލްގެ ދަށުން ދޫކޮށްލާފައިވާ މީހުންނާއި ގޭބަންދަށް ބަދަލުކޮށްފައިވާ މީހުން ހިމެނެއެވެ.

ތަފާސް ހިސާބުތަކުން ދައްކާގޮތުން މިދިޔަ އަހަރުގެ ނޮވެމްބަރުމަހުގެ 16 ވަނަ ދުވަހާއި ހަމައަށް ކްލެމެންސީއާއި އަފުއާމުގެ ދަށުން 290 މީހަކު ވަނީ ދޫކޮށްލާފައެވެ. މީގެ ތެރޭގައި އެންމެ ގިނައީ މަސްތުވާތަކެތީގެ މައްސަލަތަކުގައި ބަންދުކޮށްފައި ތިބި މީހުންނެވެ. އެގޮތުން، މަސްތުވާތަކެތީގެ މައްސަލަތަކުގައި ޖަލުގައިއ ބަންދުކޮށްފައި ތިބި 249 މީހަކަށް މައާފުދީ ދޫކޮށްލާފައިވާކަމަށް ދާޚީލީ ސަލާމަތާބެހޭ ވުޒާރާގެ ހިސާބުތަކުން ދައްކައެވެ.

ފާއިތުވި އަހަރު ގިނަ އަދަދެއްގެ ކުށްވެރިން މިނިވަންކުރި ނަމަވެސް، އެކަށީގެންވާ ބެލެހެއްޓުމުގެ ނިޒާމެއް ޤާއިމުކުރެވިފައި ނެތުމުގެ ސަބަބުން، މާލެ ސަރަހައްދުގައި ކުށްކުރުމުގެ މިންވަރު އިތުރުވެފައިވާކަމަށް ދިވެހި ފުލުހުންގެ ޚިދުމަތުން ވަނީ ވިދާޅުވެފައެވެ. މީގެ އިތުރުން، ފުލުހުންގެ އަސާސީ ވަސީލަތްތައް ތަރައްޤީކުރުމަށް ކުރިން އެކަށީގެންވާ ރޭވުންތެރި މަސައްކަތްތަކެއް ކުރެވިފައި ނެތުމުގެ ސަބަބުންވެސް ދަތިތަކެއް އެބަހުރިކަން ފުލުހުން ފާހަގަކުރައްވައެވެ.

މި ކަންބޮޑުވުންތަކަށް އަމާޒުކޮށް، ފުލުހުން އެންމެ ފަހުން ޢާންމުކުރި އެކްޝަން ޕްލޭންގައި، ނުރައްކާތެރި ކުށްތަކާ ދެކޮޅަށް ޚާއްޞަ މަސައްކަތްތަކެއް ކުރުމަށް ވަނީ ނިންމާފައެވެ. މިގޮތުން، މަސްތުވާތަކެއްޗާއި ގޭންގު ޙަރަކާތްތަކާ ދެކޮޅަށް މަސައްކަތްކުރުމަށްޓަކައި، ފުލުހުންގެ އިދާރާގެ ތެރޭގައި ޚާއްޞަ ޑިޕާޓްމަންޓެއް އުފެއްދުމަށްވެސް ވަނީ ކަނޑައަޅާފައެވެ.