ތަސްލީމް ހޯދުމަށް ފިނޮޅުގެ ވަށައިގެން ބޮޑު ސަރަހައްދެއް ބަލައިފި

ކ. ހުވަފެންފުށި ދެކުނުން ހިއްކާފައި އޮތް ފިނޮޅަށް ދަތުރުގޮސް އުޅެނިކޮށް ގެއްލުނު ތަސްލީމް މުޙައްމަދު ހޯދުމަށް ފިނޮޅު ވަށައިގެން ބޮޑު ސަރަހައްދެއް ބަލާފައިވާ ކަމަށާއި މިހާތަނަށް އޭނާ ފެނިފައި ނުވާ ކަމަށް އެމްއެންޑީއެފުން ވިދާޅުވެއްޖެއެވެ.

އުމުރުން 43 އަހަރުގެ ތަސްލީމް ގެއްލިގެން ފުލުހުންނަށް ރިޕޯޓްކޮށްފައިވަނީ، ހުކުރު ދުވަހުއެވެ. އޭނާ އެންމެފަހުން ފެނިފައިވަނީ އިއްޔެ ހެނދުނު 10 އަކާއި 11 އާ ދެމެދުކަމަށް އޭނާއާއެކު ދަތުރުދިޔަ މީހުންނާއި ހަވާލާދީ ފުލުހުން ވިދާޅުވެއެވެ.

ތަސްލީމް ހޯދުމުގެ މަސައްކަތް ފުލުހުން އިސްވެ ކުރަމުންދާއިރު، މިމަސައްކަތުގައި ޤައުމީ ދިފާޢީ ބާރުންވެސް ދަނީ ހަރަކާތްތެރިވަމުންނެވެ. އެގޮތުން އެމްއެންޑީއެފް މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއިން އެހީތެރިކަން ފޯރުކޮށްދެމުން އަންނަކަމަށް އެމްއެންޑީއެފުން ވިދާޅުވެއެވެ.

ތަސްލީމް ގެއްލިގެން އުޅޭކަމުގެ ރިޕޯޓް މޯލްޑިވްސް ޕޮލިސް ސަރވިސްއިން އެމްއެންޑީއެފަށް ދިނުމާއެކު އޭނާ ހޯދުމުގެ މަސައްކަތް ފަށާފައިވާ ކަމަށާއި، އެގޮތުން ފިނޮޅުގެ ވަށައިގެން 5000 އަކަ ފޫޓުގެ ސަރަހައްދެއް ސްނޯކަލް ކޮށްގެން ބަލާފައިވާ ކަމަށް އެމްއެންޑީއެފުން ވިދާޅުވިއެވެ. އަދި ކޯސްޓްގާޑުގެ ޑައިވަރުން ޑައިވްކޮށްގެން 3000 އަކަފޫޓު ބަލާފައިވާ ކަމަށްވެސް ވިދާޅުވިއެވެ.

އެމްއެންޑީއެފުން ވިދާޅުވީ މިހާތަނަށް ލިބިފައިވާ މަޢުލޫމާތަށް ބަލާއިރު ތަސްލީމް ގެއްލިފައިވަނީ މޫދަށްކަން ކަށަވަރު ކުރެވިފައި ނުވާތީ އޭނާ ހޯދުމުގެ އޮޕަރޭޝަން ލީޑްކުރައްވަނީ ދިވެހި ފުލުހުންގެ ޚިދުމަތުން ކަމަށެވެ.

ތަސްލީމް ހޯދުމުގެ މަސައްކަތް ކުރަމުންދާއިރު، އޭނާއާގުޅޭ އެއްވެސް މަޢުލޫމާތެއް ލިބިފައިވާނަމަ އެކަން ލަސްނުކުރައްވާ ހިއްސާކުރެއްވުމަށް ފުލުހުން ވަނީ އިލްތިމާސްކުރައްވާފައެވެ. އަދި ބުރާސްފަތި ދުވަހާއި ހުކުރު ދުވަހު އެ ފަސްގަނޑަށް އެއްވެސް ބަޔަކު ދަތުރުގޮސްފައިވާނަމަ އެކަން ހިންމަފުށި ޕޮލިސް ސްޓޭޝަންގެ ނަންބަރު (9794639) އަށް ގުޅުއްވައި ހިއްސާކޮށްދެއްވުމަށްވެސް ފުލުހުންގެ ޚިދުމަތުން ވަނީ އެދިވަޑައިގެންފައެވެ.