ސިނަމާލެ ބްރިޖުގައި އޮތީ ޖުމްލަ 6 ލޭން؛ ލޭންތައް ބޭނުންކުރާނެ ގޮތް ކަނޑައެޅީ ސަރުކާރުން: ވަޒީރު މުއްޠަލިބް
ސިނަމާލެ ބްރިޖުގައި ޖުމްލަ އޮތީ 6 ލޭން ކަމަށާއި ލޭންތައް ބޭނުންކުރާނެ ގޮތް ކަނޑައެޅުމުގެ އިޚްތިޔާރު އޮތީ ސަރުކާރަށް ކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ބްރިޖުގެ ލޭނެއް މަދުކަމަށް ބުނެ ސޯޝަލް މީޑިއާގައިދަނީ ތަފާތު ވާހަކަތައް ދެކެވެމުންނެވެ. އެގޮތުން މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު 2015 ވަނަ އަހަރު ހައުސިން މިނިސްޓަރުގެ ހައިސިއްޔަތުން ދެއްކެވި ވާހަކަތަކުގެ އަސްލު އޮޅޭގޮތަށް ސޯޝަލް މީޑިއާގައި ދަނީ ދައުރު ކުރަމުންނެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި އިމާރާތްކުރުމާއި ބިނާރާ ބެހޭ ވަޒީރު ޑރ.މުއްޠަލިބު ވިދާޅުވީ ބްރިޖުގެ ލޭނުތަކުގެ އަދަދަށް ބަދަލެއް ނާންނަ ކަމަށެވެ. އެގޮތުން ބްރިޖުގައި އޮތީ ޖުމްލަ 6 ލޭން ކަމަށާއި، ލޭނުތައް ބޭނުން ކުރާނެ ގޮތް ކަނޑައަޅުމުގެ އިޚްތިޔާރު އޮތީ ސަރުކާރަށް ކަމަށެވެ.
ބްރިޖުގައި 4 ފުރޮޅުލީ އުޅަނދުތައް ދުއްވަން ޚާއްސަ ލޭނަކާއި، ސައިކަލު ދުއްވަން ދެކޮޅުގައި ލޭނެއް އޮވެއެވެ. މީގެ އިތުރުން ބައިސިކަލް ދުއްވުމަށާއި، ހިނގާފައި އުޅޭ މީހުންނަށް ޚާއްސަ ލޭނެއްގެ ވާހަކަ އޭރު ދެކެވުނު ނަމަވެސް، ބްރިޖުގެ ކުރެހުން ފުރަތަމަ ދައްކާލިއިރުވެސް އެއީ އެއްލޭނެކެވެ. އަދި ފަހުން ބްރިޖު ހަދައި ބޭނުން ކުރަން ފެށިއިރު، އެ ލޭނު ބޭނުން ކުރަނީ ޖޮގިން ކުރާ މީހުންނާއި ހިނގާ މީހުން އެކަނިއެވެ.
ދާދިފަހުން ޓީވީއަކަށް ދެއްވި ބަސްތީގަތުމެއްގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވީ އެ މަޝްރޫއުގެ މަސައްކަތް އޭރުގެ ސަރުކާރުން ހައުސިން މިނިސްޓްރީއާ ހަވާލުކުރީ 2014ވަނަ އަހަރުގެ ފަހުކޮޅުގައި ކަމަށާއި މަޝްރޫއު ކުރިއަށްގެންދިއުމުގައި ބެއްލެވީ ވީހާވެސް ފެންވަރު ރަނގަޅަށް ބަޖެޓުގެ ތެރެއިން ކަނޑައެޅުނު މުއްދަތުގެ ތެރޭގައި މަޝްރޫޢުގެ މަސައްކަތް ނިންމުމަށް ކަމަށެވެ.
ބްރިޖުގެ މަސައްކަތް ކުރިއަށްދާގޮތް ވަރަށް ގާތުން ބައްލަވަމުން ގެންދެވިކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ އެ މިނިސްޓްރީއާ ހަވާލުކުރި ފަހުން ލޭންގެ އަދަދަށް ބަދަލެއް ގެނެސްފައިނުވާނެ ކަމަށެވެ. އެގޮތުން އެއްވެސް އިރެއްގައި ލޭންގެ އަދަދު ބަދަލުވެފައި ނުވާކަން އެމަނިކުފާނު ފާހަގަކުރެއްވިއެވެ. އަދި އެމަނިކުފާނާއި ހަވާލުވިއިރުވެސް އޮތީ ކޮޅަކަށް ދެ ލޭން ކަމަށާއި، ހިނގާފައި އުޅޭ މީހުންނަށާއި ބައިސިކަލް ދުއްވާ މީހުންނަށް ކޮޅަކަށް ލޭނެއް އޮތްއިރު، އެ ލޭނު މިހާރުވެސް އޮތްކަން ފާހަގަކުރެއްވިއެވެ.
ރައީސް އިޝާރާތް ކުރެއްވި ލޭން ބޭނުން ކުރަނީ ހިނގާ މީހުންނަށް ޚާއްސަ ލޭންގެ ގޮތުގައެވެ. އެ ލޭންގައި ބައިސިކަލް ނުދުއްވުމަށް ފަހުން ވަނީ ހަމަޖައްސާފައެވެ.