ތުރުކީއާއެކު ސޮއިކުރެވޭ ޕީޓީއޭގެ ތެރެއިން މަހުގެ 38 ބާވަތަކުން ޑިއުޓީ ކަނޑާލަނީ

ރާއްޖެއާއި ތުރުކީއާ ދެމެދު ޤާއިމްކުރެވޭ ޕްރިފަރެންޝަލް ޓްރޭޑް އެގްރިމެންޓުގެ ދަށުން، ކަންނެލި މަސް ހިމެނޭހެން ރާއްޖެއިން ބޭރުކުރާ 38 ބާވަތަކުން ޑިއުޓީ ކަނޑާލުމަށް ހުށަހެޅިފައިވާ ކަމަށް އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަފުޅުދައްކަވަމުންނެވެ.

ރާއްޖެއާއި ތުރުކީއާ ދެމެދު ކަނޑައެޅޭ ވަކި މުދާތަކެއްގެ ވިޔަފާރީގެ އެއްބަސްވުމެއް އެކުލަވާލުމުގެ މަސައްކަތް ފެށީ، މިދިޔަ އަހަރު ފަހުކޮޅު ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތުރުކީވިލާތަށް ކުރެއްވި ރަސްމީ ދަތުރުފުޅުގެ ތެރެއިން ކުރެއްވި މަޝްވަރާތަކަށް ފަހުއެވެ. އެގޮތުން ދެ ޤައުމު ދެމެދު ވިޔަފާރީގެ ގުޅުން ބަދަހިކުރުމަށް ސޮއިކުރެވުނު އެއްބަސްވުމުގެ ތެރެއިން ރާއްޖެއާއެކު ޕްރިފަރެންޝަލް ޓްރޭޑް އެގްރިމެންޓް (ޕީޓީއޭ)ގައި ސޮއިކުރުމުގެ މަޝްވަރާތައް މި އަހަރުގެ މާރިޗު މަހު ވަނީ ފަށާފައެވެ.

އެގޮތުން ކުރެވުނު މަޝްވަރާތަކުގެ ތެރެއިން 214 ބާވަތެއް ރާއްޖެއިން ހުށަހެޅިއިރު، އޭގެ ތެރެއިން 38 ބާވަތަކަށް ޑިއުޓީ ކަނޑާލުމަށް ހުށަހެޅުނު ކަމަށް ވަޒީރު ފާހަގަކުރެއްވިއެވެ. އަދި ބާކީ ބާވަތްތަކަށް ޑިއުޓީ ކުޑަކުރުމަށް ހުށަހެޅިފައިވާކަން ވަޒީރު ފާހަގަކުރެއްވިއެވެ.

ވިޔަފާރިއާ ބެހޭ ވަޒީރު ވިދާޅުވީ، ޑިއުޓީ އެއްކޮށް ކަނޑާލުމަށް ހުށަހެޅި ބާވަތްތަކަކީ ރާޢްޖެއިންވެސް ޚާއްސަ އިސްކަމެއްދިން ބާވަތްތައް ކަމަށެވެ. އަދި މިއީ މީގެ ކުރިން އެއްވެސް ވަރަކަށް ޑިއުޓީ އުނިކުރަން ލިބިފައިވާ ބާވަތްތަކެއް ނޫންކަމަށް ވަޒީރު ވިދާޅުވިއެވެ.

"އަޅުގަނޑުމެން އެންމެ އިސްކަންދޭ އައިޓަމްތަކުގެ ގޮތުގައި ހިމެނި އައިޓަމްތައް އެބަހުރި އޭގެ ތެރޭގައި އެބޭފުޅުންވެސް ހިމަނާފައި. މިސާލަކަށް ކަޅުބިލަ މަހާއި، ރީނދޫ އުރަހަ ކަންނެލި، އަދި ލޯބޮޑު ކަންނެލި ހިމެނޭ. އޭގެ އިތުރަށް ހިކިމަހުގެ ބާވަތްތަކުން ތައްޔާރުކުރާ އުފެއްދުންތައް ހިމެނޭ. " ސަޢީދު ވިދާޅުވިއެވެ.

ބައެއް ޤައުމުތަކުގެ ބޯޓުތަކުން ދާ އަޅައިގެން ބާނާ މަސް ޕްރޮސެސް ކުރުމުގެ މަސައްކަތް ތުރުކީގައި ހިންގާއިރު، މިބާވަތްތައް ޔޫރަޕް ސަރަހައްދުގެ ޤައުމުތަކަށް ބޭރުކުރުމުގައި ޓެރިފް ކަނޑާލުމާއި ދެކޮޅު ގިނަ ބަޔަކު ތިބިކަން ވަޒީރު ފާހަގަކުރެއްވިއެވެ. އަދި ތުރުކީގައިވެސް އެފަދަ ފަރާތްތަކެއް ތިބިއިރު މިއީ ލިބޭ ވަރަށް ބޮޑު ކުރިއެރުމެއް ކަމަށް ސަރުކާރުން ވަނީ ފާހަގަކުރައްވާފައެވެ.

ވިޔަފާރިއާ ބެހޭ ވަޒީރު ވިދާޅުވީ، މި އެއްބަސްވުމުގެ މަސައްކަތް މިހާރު ދާ ގޮތުން އަންނަ އަހަރު ކުރީކޮޅަށް އެއްބަސްވުމުގައި ސޮއިކޮށް ޢަމަލުކުރަން ފެށޭނެ ކަމަށެވެ. މި އެއްބަސްވުމުގެ މަސައްކަތް ބުރާސްފަތި ދުވަހު ނިންމާލާފައިވާއިރު އެއްބަސްވުމުގައި ސޮއިކޮށް ތަންފީޒުކުރެވޭނެ ކަމަށް ލަފާ ކުރެވެނީ މިއަހަރު ޑިސެމްބަރު މަހު ނުވަތަ އަންނަ އަހަރު ކުރީކޮޅުގައި ކަމަށް ވަޒީރު ސަޢީދު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ތުރުކީވިލާތަށް ކުރެއްވި ދަތުރުފުޅުގައިވަނީ ރާއްޖެއިން އެޤައުމަށް އެކްސްޕޯޓުކުރާ މަހުގެ ޓެރިފް ކުޑަކުރުމަށް ގިނަ މަޝްވަރާތަކެއް ކުރައްވާފައެވެ. މިއާއެކު ދެ ޤައުމު ދެމެދު މިހާރު ސޮއިކުރުމަށް މަސައްކަތް ކުރާ ޕީޓީއޭގެ ތެރެއިން އެކަން ކުރެވޭނެ ކަމަށް ސަރުކާރުން ވިދާޅުވެއެވެ.