ތަސްލީމް ގެއްލުނު މައްސަލާގައި ޝައްކުކުރެވޭ ކަންތައްތަކެއް އެބަހުރި: ފުލުހުން
-
ތަސްލީމް ގެއްލިފައިވަނީ ހުކުރު ދުވަހު ހުވަފެންފުށި ދެކުނުން އޮންނަ ފަސްގަނޑަކަށް ދަތުރުދިޔަ ފަހުން
ގެއްލިގެން ހޯދަމުންދާ ތަސްލީމް މުހައްމަދުގެ މައްސަލާގައި ޝައްކުކުރެވޭ ކަންތައްތަކެއް ހުރުމުން އެކަމާއި ގުޅޭ ޖިނާޢީ ތަހުޤީޤެއް ފަށާފައިވާކަމަށް ފުލުހުން ވިދާޅުވެއްޖެއެވެ.
43 އަހަރުގެ ތަސްލީމް މުހައްމަދު ހޯދުމުގެ މަސައްކަތް ފުލުހުން ހޮނިހިރު ދުވަހު ފެށީ ކ.ހުވަފެންފުށީ ދެކުނުން އޮންނަ ފަސްގަނޑަކަށް ދަތުރުގޮސް އުޅެނިކޮށް އޭނާ ގެއްލިގެން ރިޕޯޓްކުރުމާއި ގުޅިގެނެެވެ.
ފުލުހުން ވިދާޅުވީ، ތަސްލީމް ގެއްލުނު މައްސަލާގައި ޝައްކުކުރެވޭ ކަންތައްތަކެއް ފާހަގަކުރެވިފައިވާ ކަމަށެވެ. އަދި އެކަމާއި ޖިނާޢީ ތަހުޤީޤު ފަށާފައިވާކަމަށްވެސް ފުލުހުން ވިދާޅުވެއެވެ.
ތަސްލީމް ހޯދުމުގެ މަސައްކަތްކުރަމުންދާއިރު، އެމްއެންޑީއެފްއިންވެސ އޭނާ ހޯދުމަށް ފަސްގަނޑު ވަށައިގެން އޮންނަ ކަނޑުގެ ސަރަހައްދު ބަލާފައެވެ.
މައުލޫމާތު ލިބިފައިވާ ގޮތުގައި ތަސްލީމް ފަސްގަނޑަށް ދަތުރު ދިޔައީ މިދިޔަ ހުކުރު ދުވަހު އިތުރު ބަޔަކާއެކުއެވެ. ނަމަވެސް އެކަމާއި ގުޅޭ އެއްވެސް މައުލޫމާތެއް ފުލުހުން ހާމަކޮށްފައެއް ނުވެއެވެ.
ތަސްލީމް ހޯދުމުގެ މަސައްކަތް ފުލުހުން ކުރަމުންދާއިރު، އޭނާއާގުޅޭ އެއްވެސް މަޢުލޫމާތެއް ލިބިފައިވާނަމަ އެކަން ލަސްނުކުރައްވާ ހިއްސާކުރެއްވުމަށް ފުލުހުން ވަނީ އިލްތިމާސްކުރައްވާފައެވެ. އަދި ބުރާސްފަތި އަދި ހުކުރު ދުވަހު އެ ފަސްގަނޑަށް އެއްވެސް ބަޔަކު ދަތުރުގޮސްފައިވާނަމަ އެކަން ހިންމަފުށި ޕޮލިސް ސްޓޭޝަންގެ ނަންބަރު (9794639) އަށް ގުޅުއްވައި ހިއްސާކޮށްދެއްވުމަށްވެސް ފުލުހުންގެ ޚިދުމަތުން ވަނީ އެދިފައެވެ.