"ދިވެހި ޤައުމިއްޔަތުގެ އިސްވަރު" ރައީސް އިފްތިތާޙްކޮށްދެއްވައިފި
-
ޤައުމިއްޔަތު ކޮލެޖު އިފްތިތާޙްކޮށްދެއްވީ ރައީސުލްޖުމްހޫރިއްޔާ
-
ޤައުމިއްޔަތު ކޮލެޖުގެ ކައުންސިލަށް ބޭފުޅުންތަކެއް އައްޔަންކޮށްފައިވޭ
ދިވެހި ޤައުމިއްޔަތުގެ ކޮލެޖު "ދިވެހި ޤައުމިއްޔަތުގެ އިސްވަރު" އިފްތިތާޙްކޮށްފިއެވެ.
ދިވެހި ޤައުމިއްޔަތުގެ އިސްވަރުގެ ނަމުގައި ޤައުމިއްޔަތުގެ އެކި ބަހާތައް ކިޔަވައިދޭ ކޮލެޖު އިފްތިތާޙްކޮށްދެއްވީ މިއަހަރުގެ ޤައުމީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ދިވެހި ޤައުމިއްޔަތާގުޅޭ ޢިލްމުތައް ކިޔަވައިދޭ ކޮލެޖެއް ޤާއިމްކުރައްވާނެކަމަށް ދިވެހިބަހާއި ސަގާފަތާއި ތަރިކައާބެހޭ ވުޒާރާއިން އިޢުލާނު ކުރައްވާފައިވަނީ މިއަހަރުގެ ޖެނުއަރީމަހުގެ ތެރޭގައެވެ.
ޤައުމީ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވަނީ ދިވެހި ޤައުމިއްޔަތުގެ އިސްވަރު ކޮލެޖު އެކުލެވިގެންވާ 5 ދާއިރާ އިފްތިތާޙްކޮށްފައެވެ. އެއީ ދިވެހިބަހާއި، ދިވެހި ތާރީޚާއި، ދިވެހި ސުމޭކާއި ދިވެހި ތަރިކައާއި ދިވެހި ފަންނެވެ. މި ދާއިރާތައް ހިމެނޭގޮތުން ކޮލެޖުގެ ކައުންސިލެއް އުފައްދާ ކޮންމެ ދާއިރާއަކަށް ޑީންއެއް ނުވަތަ އިސްވާރެއްވަނީ އައްޔަންކުރައްވާފައެވެ.
ޤައުމީ ދުވަހުގެ ރަސްމީ ޖަލްސާގައި ކޮލެޖުގެ ކައުންސިލްގައި ހިމެނޭ ބޭފުޅުންނަށް، އިސްވާރުކަން ވަނީ ހަވާލުކޮށްފައެވެ. މި ބޭފުޅުންނަށް އިސްވާރުކަމުގެ ލިޔުން ހަވާލުކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ.
ޤައުމިއްޔަތު ކޮލެޖުގެ އިސްވާރުން:
• ދިވެހިބަހުގެ އިސްވާރު - މަރްޔަމް ތައުފީޤާ
• ދިވެހި ތާރީޚުގެ އިސްވާރު - (ކަށިމާ) އަޙްމަދު ޝާކިރު
• ދިވެހި ތަރިކައިގެ އިސްވާރު - ޙަސަން ޒަރީރު
• ދިވެހި ސުމޭކުގެ އިސްވާރު - މުޙައްމަދު ޢަބްދުލްޤާދިރު
• ދިވެހި ފަންނުގެ އިސްވާރު - މަރްޔަމް ޢިޝާ ޢަޒީޒް
ޤައުމިއްޔަތުގެ ކޮލެޖާ ބެހޭގޮތުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހިމް ވިދާޅުވެފައިވަނީ ޤައުމިއްޔަތުގެ ކޮލެޖުގައި އެންމެ ފުރަތަމަ މާއްދާއަކަށް ކިޔަވައިދޭނީ ދިވެހި ތާރީޚު ކަމަށެވެ. އަދި އެހެން ކޮލެޖުތަކާ ޚިލާފަށް މި ކޮލެޖުގައި ތާރީޚު ކިޔަވައިދޭގޮތް ތަފާތުވާނެކަން ވަޒީރު ފާހަގަކުރައްވާފައިވެއެވެ.
އެގޮތުން، ތާރީޚު ކިޔަވައިދޭއިރު، އެކި ކަންކަން ދިވެހިންނާއި ގުޅޭގޮތަށް، ދިވެހިންގެ އަސްލުތަކާގުޅޭ މަޢުޟޫތަކަށް ކޮލެޖުގައި ކިޔަވައިދެވޭނެކަމަށް ވަޒީރު ވިދާޅުވެފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދިވެހި ޤައުމިއްޔަތު އަލުން އިޢާދަކުރުމުގެ މަޝްރޫޢުގެ ދަށުން ވަރަށް ގިނަ މަސައްކަތްތަކެއް ދިވެހިބަހާބެހޭ ވުޒާރާއިން އަންނަނީ ކުރައްވަމުންނެވެ. އެގޮތުން ކޮލެޖާއި ދިރާސާކުރާ މަރުކަޒެއް އުފެއްދެވުމުގެ އިތުރަށް ޤައުމީ ޗާޕުޚާނާ އަލުން އިޢާދަކުރެއްވުމާއި ދިވެހިބަހަށް ހޭލުންތެރިކުރުވުމުގެ ޕްރޮގުރާމްތައް ޤައުމީ ފެންވަރެއްގައި ފެށުމުގެ މަސައްކަތް ދަނީ ކުރައްވަމުންނެވެ.