ދިވެހިންނަށް ކަމުދާ ޓީވީ ޕްރޮގުރާމުތައް ދެނެގަތުމަށް ދިރާސާއެއް ހަދަނީ
-
ސަރވޭއަށްފަހު ރާއްޖޭގައި ހިންގާ ޗެނަލްތަކުގެ ރޭޓިން ލިސްޓު އެކުލަވާލެވޭނެ
-
ކުރިއަށް އޮތް 10 ހަފްތާގެ ތެރޭގައި ދިރާސާ ނިމޭނެ
ދިވެހިންނަށް ކަމުދާ ޓީވީ ޕްރޮގުރާމުތައް ދެނެގަތުމަށް "ބްރޯޑްކާސްޓް އޯޑިއަންސް ސަރވޭ"ގެ ނަމުގައި ޚާއްޞަ ދިރާސާއެއް ހެދުމުގެ މަސައްކަތް މިހާރު ފަށާފައިވާކަމަށް މޯލްޑިވްސް ބްރޯޑްކާސްޓިން ކޮމިޝަނުން ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި އިންޓަވިއުއެއްގައި ބްރޯޑްކާސްޓިން ކޮމިޝަންގެ ރައީސް މަރްޔަމް ވަޙީދާ ވިދާޅުވީ ބްރޯޑްކާސްޓް އޯޑިއަންސް ސަރވޭ ނިމުމުން ޢާންމު ގޮތެއްގައި ދިވެހިން އެންމެ ގިނައިން ބަލައި ޕްރޮގުރާމްތަކާއި ދިވެހިންނަށް އެންމެ ކަމުދާ ޕްރޮގުރާމްތައް ދެނެގަނެވޭނެ ކަމަށެވެ.
މަރްޔަމް ވަޙީދާ ވިދާޅުވީ ބްރޯޑްކާސްޓް އޯޑިއަންސް ސަރވޭގެ ސަބަބުން ޗެނަލް ރޭޓިން ލިސްޓު އެކުލަވާލުމަށް ބްރޯޑްކާސްޓިން ކޮމިޝަނުންކުރާ މަސައްކަތްތަކަށް ފަސޭހަވާނެ ކަމަށެވެ. އެގޮތުން މި ސަރވޭގައި ރީބްރޯޑްކާސްޓިން ނެޓްވަރކްތަކުގައި ޗެނަލް ބޭނުންކުރާ ނިސްބަތާއި އެހެނިހެން ޕްލެޓްފޯމްތަކުގައި ޗެނަލް ބޭނުންކުރާ ނިސްބަތް ބެލޭނެކަމަށް މަރްޔަމް ވަހީދާ ވިދާޅުވިއެވެ.
"މި ސަރވޭ ވާނީ ރާއްޖޭގައި މިހާރު ހަދާ ޕްރޮގުރާމްތަކުގެ ފެންވަރު ރަނގަޅުކުރުމަށް ލިބޭ ވަރަށް ބޮޑު ފުރުޞަތަކަށް. އެއީ ސިޔާސީ އިޖުތިމާޢީ ޕްރޮގުރާމެއް ނަމަވެސް، އެ ޕްރޮގުރާމްތައް ރަނގަޅުކުރުމަށްޓަކައި ރައްޔިތުން ދެކޭގޮތް ސަރވޭއިން އެނގޭނެ." މަރްޔަމް ވަޙީދާ ވިދާޅުވިއެވެ.
ބްރޯޑްކާސްޓް އޯޑިއަންސް ސަރވޭ ކުރުމަށް ބްރޯޑްކާސްޓިން ކޮމިޝަނުން ހަވާލުކޮށްފައިވަނީ ވިލާ ކޮލެޖުގެ އިންސްޓިޓިއުޓް ފޯ ރިސަރޗް އެންޑް އިނޮވޭޝަންނާއެވެ. ސަރވޭގެ މަސައްކަތް މިދިޔަ ހަފްތާގެ ތެރޭގައި ވިލާ ކޮލެޖުންވަނީ ފަށާފައެވެ. މި ސަރވޭ ނިންމުމަށް ކޮމިޝަނުންވަނީ 10 ހަފްތާގެ މުއްދަތެއް ވިލާ ކޮލެޖަށް ދީފައެވެ.
ބްރޯޑްކާސްޓިން ކޮމިޝަނުން މިހާރުވަނީ ޗެނަލް ރޭޓިން ލިސްޓު އެކުލަވާލުމުގެ އުޞޫލެއް ޢާންމުކޮށްފައެވެ. މިއީ ރާއްޖޭގައި ބްރޯޑްކާސްޓްކޮށް ހިންގާ ޓީވީ ޗެނަލްތަކުގެ ރޭޓިން ކަނޑައެޅުމަށްޓަކައި އެކުލަވާލާފައިވާ އުޞޫލެކެވެ. މި އުޞޫލުގައިވާ ގޮތުން ޓީވީ ޗެނަލް ރޭޓްކުރުމަށް އޯޑިއަންސް ސަރވޭއަކަށް ރިޢާޔަތްކުރަން ޖެހޭނެއެވެ. އެގޮތުން ޗެނަލް ރޭޓުކުރުމުގައި، ސަރވޭއިން އެ ޗެނަލަކަށް ލިބޭ މާކްސްއަށް ބަލާނެއެވެ.