ފަލަސްޠީނުގެ ޣައްޒާގައި ނިކަމެތިކޮށް ހާލުގައި ޖައްސާފައިވާ މީހުންނަށް އިންސާނީ އެހީތެރިކަން ފޯރުކޮށްދޭން މަސައްކަތް ކުރާ އދގެ މުވައްޒަފުން ދަތުރު ކުރަމުން ދިޔަ އުޅަނދުތަކެއް ހުއްޓުވައި, ޔަހޫދީ ފައުޖުގެ ހައްދުފަހަނަ އެޅި ސިފައިން އޭގައި ތިބި މުވަައްޒަފުންނަށް ބިރު ދައްކާފައިވާ ކަން އދން ހާމަ ކޮށްފިއެވެ. އެއީ އދގެ އުޅަނދުތަކެއް ކަން ސާފުކޮށް ފެންނަ ގޮތަށް އުޅަނދުތަކުގެ ބޭރުގައި ލިޔެފައިވާ އުޅަނދުތަކަށް ޔަހޫދީ ފައުޖުން ހުރަސް އަޅާފައި ވަނީ ޣައްޒާގެ އުތުރުގެ ސަރަޙައްދެއްގައެވެ.
އދގެ ތަރުޖަމާނު ސްޓިފަން ދުޖަރީކް ވިދާޅުވީ, ޔަހޫދީ ފައުޖުގެ އަނިޔާވެރި ސިފައިން ހުރަސް އަޅާފައި ވަނީ, ޕޯލިޔޯ ވެކްސިން ކެމްޕޭންގައި ހަރަކާތްތެރިވަމުން ދިޔަ އދގެ މުވައްޒަފުން ދަތުރު ކުރަމުން ދިޔަ އުޅަނދުތަކަކަށް ކަމުގައެވެ. އދއާއި ދުނިޔޭގެ ޞިއްޙަތާ ބެހޭ ޖަމުޢިއްޔާ (ޑަބްލިޔުއެޗްއޯ)ން ގުޅިގެން, ޣައްޒާގައި ވެކްސިން ކެމްޕޭނެއް ފަށާފައި ވަނީ ސެޕްޓެންބަރު 1ވަނަ ދުވަހުއެވެ. އެ ސަހަރުގައި ދިރިއުޅޭ 640,000އެއްހާ ކުޑަކުދިންނަށް ވެކްސިން ޖަހައިދިނުމުގެ ކެމްޕޭނެއް ފަށާފައި ވަނީ, 25 އަހަރަށް ފަހު އެ ސަހަރުން ޕޯލިޔޯ ޖެހިފައިވާ ތުއްތު ކުއްޖަކު ދެނެގަނެވުމުންނެވެ.
ދުޖަރީކް ވިދާޅުވީ, ޔަހޫދީ ފައުޖުގެ ހައްދުފަހަނަ އެޅި ސިފައިން އދގެ އުޅަނދުތައް ހުއްޓުވާފައި ވަނީ, އޭގައި ތިބި އދގެ ދެ މުވައްޒަފަކާ ސުވާލު ކުރަން ބޭނުންވާ ކަމަށް ބުނެ ކަމުގައެވެ. އަދި, ހާލަތު ކުއްލި ގޮތަކަށް ނުރައްކާވެ, ޔަހޫދީ ސިފައިން އދގެ މުވައްޒަފުންނާ ދިމާލަށް ހަތިޔާރު އަމާޒުކޮށް, ބިރު ދައްކާފައިވާ ކަމުގައެވެ. އދގެ އުޅަނދުތައް ހުއްޓުވުމުގެ ގޮތުން ޔަހޫދީ ފައުޖުން އަސްކަރީ ޓޭންކުފަހަރާއި ބުލްޑޯޒަރެއް ބޭނުންކޮށް އުޅަނދުތަކުގައި ޖައްސާފައިވާ ކަމުގައި ވެސް ދުޖަރީކް ވިދާޅުވިއެވެ.
"ޔަހޫދީ ސިފައިން ކުއްލިއަކަށް އދގެ އުޅަނދުތައް ވަށައިލައި ބަޑި ޖަހަން ފެށި. އެއަށް ފަހު, އަސްކަރީ ޓޭންކަކާއި ބުލްޑޯޒަރަކުން އުޅަނދުތަކުގެ ކުރިއާއި ފަހަތުގައި ޖައްސައި, އުޅަނދުތަކަށް ގެއްލުން ދިން. އެ ވަގުތު އދގެ މުވައްޒަފުން ތިބީ އުޅަނދުތަކުގެ ތެރޭގައި ތާށިވެފައި،" ދުޖަރީކް ވިދާޅުވިއެވެ.
މީގެ އިތުރުން, އުޅަނދުތަކުން ބޭރަށް ނިކުތުމަށް އދގެ މުވައްޒަފުން ކުރި މަސައްކަތްތަކަށް ޔަހޫދީ ފައުޖުގެ އަނިޔާވެރި ސިފައިން ހުރަސް އަޅާފައިވާ ކަމުގައި ވެސް ދުޖަރީކް ވިދާޅުވިއެވެ. މިއީ "ޣައްޒާގައި އިންސާނިއްޔަތަށް ޓަކައި މަސައްކަތް ކުރާ އިޖުތިމާޢީ ޚިދުމަތްތެރިންނަށް [ޔަހޫދީ ފައުޖުގެ ކިބައިން] އޮތް ނުރައްކާތެރިކަން ހާމަވެގެން ދިޔަ, ބަލައިގަންނަން ދަތި ހާދިސާއެއް"ގެ ގޮތުގައި އޭނާ ސިފަ ކުރެއްވިއެވެ.
ޔަހޫދީ ފައުޖުގެ ނިރުބަވެރި ސިފައިން ބާރުގެ ބޭނުންކޮށް, އދގެ އުޅަނދުތައް ހުއްޓުވައި, އދގެ ދެ މުވައްޒަފަކާ ސުވާލުކޮށް ބިރު ދައްކާފައިވާ ކަމުގައި ވެސް އޭނާ ވިދާޅުވިއެވެ. "އެ މީހުން މިނިވަން ކޮށްފައި ވަނީ ހަތް ގަޑިއިރު ފަހުން. މި ވަގުތު އދގެ އުޅަނދުތައް ވަނީ މައި މަރުކަޒަށް އެނބުރި ގޮސްފައި. އިސްރާއީލުގެ ސިފައިންގެ އަމަލުތަކާ ގުޅިގެން އދގެ މުވައްޒަފުންގެ ފުރާނައަށް ނުރައްކާވި،" އޭނާ ވިދާޅުވިއެވެ.
މިއީ, ޔަހޫދީ ފައުޖުގެ ނިރުބަވެރި ސިފައިން އދގެ މުވައްޒަފުންނަށް އަމާޒުކޮށް ޙަމަލާ ދީފައިވާ ފުރަތަމަ ފަހަރެއް ނޫނެވެ. މީގެ ދެ ހަފުތާއެއްހާ ދުވަސް ކުރިން ޔަހޫދީ ސިފައިން ވަނީ, އދގެ ދުނިޔޭގެ ކާބޯތަކެއްޗާ ބެހޭ ޕުރޮގުރާމް (ޑަބްލިޔުއެފްޕީ)ގެ މުވައްޒަފުންތަކެއް ދަތުރު ކުރަމުން ދިޔަ އުޅަނދަކަށް އަމާޒުކޮށް ބަޑި ޖަހާފައެވެ. އެ ހާދިސާއާ ގުޅިގެން ޣައްޒާގައި ހައިހޫނުގައި ޖައްސާފައިވާ މުސްލިމުންނަށް ކާބޯތަކެތި ފޯރުކޮށްދޭން ކުރަމުން ދިޔަ މަސައްކަތްތައް ޑަބްލިޔުއެފްޕީން ވަގުތީ ގޮތުން މެދުކަނޑައިލިއެވެ. އެ މަސައްކަތް އަލުން ފަށާފައި ވަނީ, އެ ފަދަ އަމަލެއް ތަކުރާރު ނުކުރާނެ ކަމުގެ ޔަގީން ކަން ޔަހޫދީ ފައުޖުން ދިނުމުންނެވެ.
އޭޕްރިލް މަހުގެ ތެރޭގައި ވެސް ޔަހޫދީ ފައުޖުން ވަނީ އެހީދޭ ޖަމުޢިއްޔާއަކަށް ނިސްބަތްވާ އުޅަނދުތަކެއް ހިމެނޭ ގާފިލާއަކަށް ނުރައްކާތެރި ވައިގެ ޙަމަލާތަކެއް ދީފައެވެ. ޣައްޒާގެ ރައްޔިތުންނަށް ކާބޯތަކެތި ފޯރުކޮށްދޭން މަސައްކަތް ކުރަމުން ދިޔަ ވަރލްޑް ސެންޓްރަލް ކިޗަންގެ ގާފިލާއަށް ތިން ފަހަރު ވައިގެ ޙަމަލާތައްދީ, ޔަހޫދީ ފައުޖުން ވަނީ އެ ޖަމުޢިއްޔާގެ ހަތް މުވައްޒަފުން ޝަހީދު ކޮށްލާފައެވެ.
މީގެ 10 މަސް ކުރިން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 41,020އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 94,925އަށް އުފުލިފައެވެ.