އުތުރު އެފްރިކާގައި އޮންނަ ކުޑަ ޢަރަބި ޤައުމެއް ކަމުގައިވާ ތޫނިސްގެ ރައީސް ޤަޔިސް ސަޢީދާ ދެކޮޅަށް އަޑު އުފުލުމަށް އެތަކެއް ހާސް ބަޔަކު މަގުތަކަށް ނިކުމެ މުޒާހަރާ ކުރަން ފަށައިފިއެވެ. މުޒާހަރާގެ ބައިވެރިން ތުހުމަތު ކުރާ ގޮތުގައި, އޮކްޓޫބަރު 6ވަނަ ދުވަހު އެ ޤައުމުގައި ބޭއްވުމަށް ތާވަލު ކޮށްފައިވާ ރިޔާސީ އިންތިޚާބަށް ނުފޫޒު ފޯރުވައި, ނަތީޖާ އޮޅުވައިލައްވަން ސަޢީދު ގެންދަވަނީ މަސައްކަތް ކުރަމުންނެވެ.
2021ވަނަ އަހަރުން ފެށިގެން ސަޢީދު ތޫނިސްގައި ވެރިކަން ކުރައްވަމުން ގެންދަވަނީ ރިޔާސީ ޤަރާރެއްގެ ބާރުގައެވެ. އޭނާއާ ދެކޮޅަށް އަޑު އުފުލަމުންދާ މީހުން ތުހުމަތު ކުރާ ގޮތުގައި ސަޢީދަކީ ޚުދުމުޚްތާރު ވެރިއެކެވެ. އަދި, ވެރިކަމުގެ ބާރުތައް ނަހަމަ ގޮތުގައި ހިއްޕަވައި, އޭނާ ގެންދަވަނީ އިދިކޮޅު ކެނޑިޑޭޓުން ހައްޔަރުކޮށް ޖަލަށް ލައްވަމުންނެވެ. "އެއްވެސް ބިރެއް, ބިރުވެރިކަމެއް ނެތް, މަގުތަކަކީ ރައްޔިތުންގެ ތަނެއް،" މުޒާހަރާގެ ބައިވެރިން ގޮވަމުން ދިޔައެވެ.
ސަޢީދާ ދެކޮޅަށް ތޫނިސްގެ ގިނަ ޢަދަދެއްގެ ޢާންމު ރައްޔިތުން ނިކުމެ މުޒާހަރާ ކުރަން ފަށާފައި މި ވަނީ, އޮކްޓޫބަރުގައި ބާއްވާ ރިޔާސީ އިންތިޚާބުގައި ވާދަ ކުރައްވަން ނަން ހުށަހަޅުއްވާފައިވާ ތިން ކެނޑިޑޭޓެއްގެ ކެނޑިޑެސީ, އެ ޤައުމުގެ އިންތިޚާބުތަކާ ބެހޭ އިދާރާއިން ބާޠިލު ކުރުމާ ގުޅިގެންނެވެ. ތިން ކެނޑިޑޭޓެއްގެ ކެނޑިޑެސީ ބާޠިލު ކޮށްފައި ވަނީ ޝަރުޠު ހަމަނުވާ ކަމަށް ކަނޑައަޅައެވެ.
އެ ތިން ކެނޑިޑޭޓުންގެ ފަރާތުން ވަނީ އެ މައްސަލަ ކޯޓަށް ހުށަަހަޅާފައެވެ. އަދި, އިންތިޚާބުތަކާ ގުޅޭ ކަންކަން ބެލުމުގެ އިހުތިސާސް އޮންނަ ކޯޓުން ވަނީ އެ ކެނޑިޑޭޓުންގެ ކެނޑިޑެސީ ރުޖޫއަ ކުރަން އިންތިޚާބުތަކާ ބެހޭ އިދާރާއަށް އަމުރު ކޮށްފައެވެ. ނަމަވެސް, އެ އިދާރާއިން ވަނީ ކޯޓުގެ ޙުކުމް ބޮލާލާޖަހައި, އެ ކަމަށް އިންކާރު ކޮށްފައެވެ.
ސަޢީދުގެ ވެރިކަމާ ދެކޮޅު ފަރާތްތަކުން ތުހުމަތު ކުރާ ގޮތުގައި, އޮކްޓޫބަރުގައި އޮތް ރިޔާސީ އިންތިޚާބުގައި ކުރި ހޯއްދަވަން އޭނާ ގެންދަވަނީ އިންތިޚާބުތަކާ ބެހޭ އިދާރާއަށް ނުފޫޒު ފޯރުވަމުންނެވެ. އެ ކޮމިޝަނުގައި ތިއްބެވީ އޭނާ ޢައްޔަން ކުރައްވާފައިވާ ބޭފުޅުންނެވެ. މީގެ އިތުރުން, އިދިކޮޅު ކެނޑިޑޭޓުންނަށް ބިރު ދެއްކުމަށް ސަޢީދު މަސައްކަތް ކުރައްވަމުން ގެންދަވާ ކަމަށް އިދިކޮޅުން ތުހުމަތު ކުރި ނަމަވެސް, އޭނާ ވަނީ މި ތުހުމަތުތައް ދޮގު ކުރައްވާފައެވެ. އޭނާ ވިދާޅުވީ, ޣައްދާރުންނާއި, ޚިޔާނާތުގެ އަމަލުތައް ހިންގާ މީހުންނާއި ކުލީ ސިފައިންނާ ދެކޮޅަށް އޭނާ ފިޔަވަޅުތައް އަޅުއްވަމުން ގެންދަވާ ކަމުގައެވެ.
އިންތިޚާބުތަކާ ބެހޭ އިދާރާއިން ތިން ކެނޑިޑޭޓެއްގެ ކެނޑިޑެސީ ބާޠިލު ކުރި ނަމަވެސް, ކުރިއަށް އޮތް އިންތިޚާބުގައި ސަޢީދަށް އިތުރު ދެ ކެނޑިޑޭޓަކާ ވާދަ ކުރައްވަން ޖެހިވަޑައިގަންނަވާނެއެވެ. އެއީ, ޛުހައިރު އަލް-މަޣުޛާވީއާއި އަޔާޝީ ޛާމިލެވެ. އޭގެ ތެރެއިން ޛާމިލު މި ވަގުތު ވެސް ހުންނެވީ ޖަލުގައެވެ. މީގެ 10 ވަރަކަށް ދުވަސް ކުރިން އޭނާ ޖަލަށް ލާފައި ވަނީ, އިންތިޚާބާ ބެހޭ ކޮމިޝަނަށް ހުށަހަޅުއްވާފައިވާ ލިޔެކިޔުންތަކުގައި ނުރަނގަޅު މަޢުލޫމާތާއި, ޞައްޙަ ނޫން ސޮއިތަކެއް ހިމަނާފައިވާ ކަމުގެ ތުހުމަތުގައެވެ. އޭނާއާ ދެކޮޅަށް 25 މައްސަލައެއްގެ ދަޢުވާ އުފުލާފައިވާއިރު, އިންތިޚާބުން އޭނާގެ ނަން އަނބުރާ ގެންދަވަން މަޖުބޫރުވެދާނެ ކަމަށް އޭނާގެ ޤާނޫނީ ވަކީލުން ޤަބޫލު ކުރައްވައެވެ.
މި ކަމާ ގުޅިގެން ސަޢީދުގެ ވެރިކަމާ ދެކޮޅަށް ފަށާފައިވާ މުޒާހަރާތަކުގެ ބައިވެރިން ދަނީ ޛަމީލްގެ އިތުރުން, ސަޢީދުގެ އަމުރަށް ހައްޔަރު ކޮށްފައިވާ ސިޔާސީ ކުށްވެރިންނާއި, ސިޔާސީ ޕާޓީތަކުގެ އެކްޓިވިސްޓުންގެ އިތުރުން ނޫސްވެރިން މިނިވަން ކުރަން ގޮވައިލަމުންނެވެ. "އަޅުގަނޑުމެން މަގުތަކަށް ނިކުމެ މި ތިބީ މިނިވަން ކަމާއި އަޅުގަނޑުމެންގެ ޙައްޤުތަކުގެ ދިފާޢުގައި. އެ ކަންކަމަށް އޮތް ހިރާސްތައް ބޮޑު. އިންތިޚާބުތަކާ ބެހޭ އިދާރާއިން ކޯޓުގެ އަމުރުތަކަށް އިޙުތިރާމު ކުރަން ޖެހޭނެ. އެހެން ނޫން ނަމަ, ކުރިއަށް އޮތް އިންތިޚާބަކީ ޑިމޮކުރަސީގެ ހަމަތަކުގެ ދަށުން ބާއްވާ އިންތިޚާބަކަށް ނުވާނެ،" މުޒާހަރާގެ ބައިވެރިއަކު ބުންޏެވެ.
2011ވަނަ އަހަރު ތޫނިސަށް ގެނައި އިންޤީލާބަށް ފަހު ޤާއިމު ކޮށްފައިވާ ޑިމޮކުރެޓިކް ވެރިކަން ސަޢީދުގެ ވެރިކަމުގައި ނެތިގެން ގޮސްފައިވާ ކަމަށް އޭނާގެ ވެރިކަމާ ދެކޮޅު ޕާޓީތަކުން ތުހުމަތު ކުރެއެވެ. ސަޢީދުގެ ސަރުކާރާ ދެކޮޅު ގިނަ ސިޔާސީ ޕާޓީތަކުގެ ވެރިން މި ވަގުތު ތިއްބެވީ އެކި ދަޢުވާތައް އުފުލައި ޖަލަށްލާފައި ކަން ފާހަގަ ކޮށްލަން ޖެހެއެވެ.