ބާރުގަދަ ތޫފާން ޔާގީއާ ގުޅިގެން މިޔަންމާއިން މަރުވި މީހުންގެ ޢަދަދު 74އަށް އުފުލިއްޖެއެވެ. އޭޝިޔާ ބައްރުގައި މި އަހަރުގެ މިހާތަނަށް އުފެދުނު އެންމެ ބާރުގަދަ އަދި ނުރައްކާތެރި ތޫފާން ކަމުގައިވާ ޔާގީއާ ގުޅިގެން ހިނގި އެކި ހާދިސާތަކުގައި އިތުރު 89 މީހުން ގެއްލިފައިވެއެވެ. އެ މީހުން ހޯދަން މިޔަންމާގެ އިދާރާތަކުން ދަނީ މަސައްކަތް ކުރަމުންނެވެ.
ތޫފާން ޔާގީއާ ގުޅިގެން ހިނގި ފެންބޮޑުވުމާއި, ބިންގަނޑު ކެނޑުމާއި, ކިސަޑު ފޭބުމުގެ ހާދިސާތަކުގައި ވިއެޓްނާމާއި ތައިލެންޑުން ވެސް އެތަކެއް ސަތޭކަ ބަޔަކު ވަނީ މަރުވެފައެވެ. އެ ދެ ޤައުމަށް ވެސް ބޯކޮށް ވާރޭވެހި, ކޯރުތައް ފުރިގެން ބަންޑުންވުމާ އެކު ޢާންމުން ދިރިއުޅޭ ގިނަ ރަށްތަކެއްގައި ވަނީ ފެން ބޮޑުވެފައެވެ. އަދި, ބައެއް ސަރަޙައްދުތަކުގެ ބިންގަނޑު ކެނޑި, ކިސަޑު ފޭބުމުގެ ހާދިސާތައް ހިނގިއެވެ.
މިޔަންމާގެ ސަރަޙައްދުތަކަށް ތޫފާން ޔާގީ އަރާފައި ވަނީ ސެޕްޓެންބަރު 9ވަނަ ދުވަހުއެވެ. ތޫފާން ޔާގީގެ ސަބަބުން ޢާންމުން ދިރިއުޅޭ ގިނަ ރަށްތަކެއްގައި ފެންބޮޑުވެފައި ވަނީ, 2021 ވަނަ އަހަރުގެ ފެބުރުވަރީ މަހު އެ ޤައުމަށް ގެނައި އަސްކަރީ ބަޣާވާތާއި ގުޅިގެން ޤައުމުގެ މަސްރަޙު ހޫނުވެ, ފަގީރު ކަމުގެ ހާލަތު އެތަކެއް ގުނައަކަށް ގޯސްވެފައިވާ ދަނޑިވަޅެއްގައެވެ.
ފެންބޮޑުވުމުގެ އަަސަރު އެންމެ ބޮޑަށް ކޮށްފައިވާ ސަރަޙައްދުތަކުގެ ތެރޭގައި ވެރިރަށް ނޭޕީދޯގެ އިތުރުން މަންޑަލޭ, މަގްވޭ އަދި ބަގޯ ސަރަޙައްދުތައް ހިމެނެއެވެ. އޭގެ އިތުރުން, އެ ޤައުމުގެ ދެކުނުގައި އޮތް ޝާ, މޯ, ކަޔާ އަދި ކަޔީން ސްޓޭޓްގެ ގިނަ ސަރަޙައްދުތަކެއްގައި ވެސް ވަނީ ފެންބޮޑުވެފައެވެ. އިންސާނީ އެހީގެ ކަންކަން ވިލަރެސް ކުރާ އދގެ އިދާރާ (އޯސީއެޗްއޭ)ން ބުނީ, ފެންބޮޑުވުމާ ގުޅިގެން އެންމެ ބޮޑެތި ގެއްލުންތަކެއް ލިބިފައި ވަނީ މިޔަންމާގެ މެދުތެރޭގެ ސަރަޙައްދުތަކަށް ކަމުގައެވެ.
މިޔަންމާއިން އެންމެ ގިނަ ޢަދަދެއްގެ ބަޔަކު މަރުވެފައި ވަނީ ބޯކޮށް ވާރޭވެހި, ފެންބޮޑުވުމާ ގުޅިގެން ހިނގި ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި ކަމަށް ރިޕޯޓުތައް ބުނެއެވެ. ނަމަވެސް, އެ ޤައުމުގެ މަސްރަޙު އޮތް ގޮތުން, އެ ހާދިސާތަކާ ގުޅޭ ފުރިހަމަ މަޢުލޫމާތު ހޯދުމަށް ވަނީ ދަތިތަކެއް ކުރިމަތިވެފައެވެ. އެ ޤައުމުގެ ދަޢުލަތުގެ މީޑިޔާއިން ބުނީ, ފެންބޮޑުވުމާ ގުޅިގެން ފަސް ޑޭމެއް ހަލާކުވެފައިވާ ކަމަށާއި, 65,000އަށްވުރެ ގިނަ ގެ ހަލާކުވެފައިވާ ކަމުގައެވެ. އަދި, ފެންބޮޑުވުމާ ގުޅިގެން ގެދޮރު ގެއްލިފައިވާ މީހުންގެ ޢަދަދު ވަނީ 235,000އަށް އުފުލިފައެވެ.
55 މިލިޔަން މީހުންގެ އާބާދީއެއް އޮންނަ މިޔަންމާގެ ތިންބައިކުޅަ އެއް ބަޔަކީ ފަގީރު ހާލުގައި ދިރިއުޅޭ މީހުންނެވެ. އަދި, އިންސާނީ އެހީތެރިކަމަށް ޖެހިފައިވާ މީހުންނެވެ. ނަމަވެސް, މިޔަންމާގެ އަސްކަރިއްޔާއާއި އަރާކަން އާމީއާ ދެމެދު ހިނގަމުންދާ ހަނގުރާމައާ ގުޅިގެން, ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރު ކޮށްދިނުމަށް އޮތީ ހުރަސް އެޅިފައެވެ. އަދި, ސަލާމަތީ ސަބަބުތަކާ ގުޅިގެން, ރެޑް ކްރޮސް ފަދަ އިންސާނިއްޔަތަށް ޓަކައި މަސައްކަތް ކުރާ ބައިނަލްއަޤުވާމީ ޖަމުޢިއްޔާތަކަށް ވެސް އޮތީ ހުރަސްތައް ކުރިމަތިވެފައެވެ.
ތޫފާން ޔާގީއާ ގުޅިގެން ވިއެޓްނާމުން މަރުވި މީހުންގެ ޢަދަދު ވަނީ 254އަށް އުފުލިފައެވެ. ތޫފާނާ ގުޅިގެން ކުރި ވިއްސާރައިގައި ފެންބޮޑުވެފައިވާ ސަރަޙައްދުތަކުން ފެންގަނޑު ހިނދެން ފަށާފައިވީ ނަމަވެސް, ތޫފާނާ ގުޅިގެން ހިނގި ހާދިސާތަކުގައި ގެއްލުނު ކަމަށް ބެލެވޭ މީހުން ހޯދުމަށް އަދިވެސް ދަނީ މަސައްކަތް ކުރަމުންނެވެ.
މީގެ ހަފުތާއެއްހާ ދުވަސް ކުރިން ތޫފާން އަރާފައި ވަނީ ވިއެޓްނާމުގެ އިރުއުތުރުގެ ސަރަޙައްދުތަކަށެވެ. ތޫފާނާ ގުޅިގެން ބޮޑު ސަރަޙައްދެއްގައި ފެންބޮޑުވެ, ގިނަ ޢަދަދެއްގެ ނުރައްކާތެރި ހާދިސާތައް ހިނގިއެވެ. އޭގެ ތެރޭގައި ބުރިޖުތައް ވެއްޓުމާއި, ބިންގަނޑު ކެނޑުމާއި ކިސަޑު ފޭބުން ފަދަ ހާދިސާތައް ހިމެނެއެވެ. އެ ހާދިސާތަކުގައި އަނިޔާވި މީހުންގެ ޢަދަދު 820އަށް އުފުލިފައިވެއެވެ. އަދި އިތުރު 82 މީހަކު ގެއްލިފައިވާ ކަމަށް އެ ޤައުމުގެ ކާރިސާތަކާ ބެހޭ އިދާރާއިން ހާމަކުރިއެވެ.
ތޫފާން ޔާގީގެ އަސަރު ތައިލެންޑުގެ އުތުރުގައިވާ ސަރަޙައްދުތަކަށް ވެސް ކުރިއެވެ. މި ގޮތުން, އެ ޤައުމުގައި އުތުރުގައި އޮންނަ ޗިއަންގ މާއީއާއި ޗިއަންގ ރާއީ ޕުރޮވިންސުގެ ބޮޑު ސަރަޙައްދުތަކެއްގައި ފެންބޮޑުވެފައިވާއިރު, ބިންގަނޑު ކެނޑުމާއި ކިސަޑު ފޭބުމުގެ ހާދިސާތަކުގައި ބޮޑެތި ގެއްލުންތަކެއް ލިބުނެވެ. ތޫފާނާ ގުޅިގެން ހިނގި ހާދިސާތަކުގައި އެ ޤައުމުން 10 މީހުން މަރުވިއެވެ.