52 ގައުމަކުން ބައިވެރިވި ޤުރުއާން މުބާރާތަކުން 3 ވަނަ ޝާޔާއަށް

މެލޭޝިއާގައި ބޭއްވި ބައިނަލްއަޤްވާމީ ޤުރުއާން މުބާރާތުގައި ރާއްޖެ ތަމްސީލްކުރި ފާޠިމަތު ޝާޔާ ޒާހިރު 3 ވަނަ ހާސިލްކޮށްފިއެވެ.

ފާޠިމަތު ޝާޔާ ޒާހިރު 3 ވަނަ ހާސިލްކޮށްފައިވަނީ މެލޭޝިއާގެ ވެރިރަށް ކުއަލަލަމްޕޫރުގައި މި މަހުގެ 5 އިން 12 އަށް ކުރިއަށްގެންދިޔަ 64 ވަނަ "މެލޭޝިއަން އިންޓަނޭޝަނަލް އަލްގުރްއާން ރިސައިޓޭޝަން އެންޑް މެމޮރައިޒޭޝަން އެސެމްބްލީ" (އެމްޓީއެޗްކިއުއޭ) މުބާރާތުންނެވެ. ޝާޔާއަށް މި މުބާރާތުން 3 ވަނަ ލިބުނީ ހިފްޒު ބައިންނެވެ.

މި މުބާރާތުގައި 52 ގައުމަކުން 76 ބައިވެރިން ބައިވެރިވެފައިވެއެވެ.

މެލޭޝިޔާގައި ބޭއްވި ބައިނަލްއަޤުވާމީ ޤުރުއާން މުބާރާތުގައި ރާއްޖެ ތަމްސީލުކުރި ދަރިވަރު،ފާޠިމަތު ޝާޔާ ޒާހިރު މުބާރާތުން ތިންވަނަ ހޯދައިފި. މި އުފާވެރި މުނާސަބަތުގައި ޝާޔާއާއި އާއިލާއަށް ތަހުނިޔާއާއި ހެޔޮ ދުއާ ރައްދުކުރަން..މިއީ ރާއްޖެއަށް ލިބުނު ފަޚުރެއް. الحمد لله pic.twitter.com/GlW7KiiPl1

— Mohamed Shaheem Ali Saeed (@Mohamedshaheem1) October 12, 2024

ޝާޔާ މި ހޯދި ކާމިޔާބީއަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވަނީ މަރުބާ ވިދާޅުވެފައެވެ. ވަޒީރު ވިދާޅުވީ ޝާޔާ ހޯދި ކާމިޔާބީއަކީ ރާއްޖެއަށް ލިބުނު ފަޚުރެއްކަމަށެވެ.

ފާޠިމަތު ޝާޔާ ޒާހިރުއަކީ މިދިޔަ އަހަރުގެ އޭޕްރީލްގައި މިސްރުގައި ބޭއްވި ގުރުއާން މުބާރާތަކުން 2ވަނަ ހޯދާފައިވާ ދަރިވަރެކެވެ. އަދި މި އަހަރު ބޭއްވި ކީރިތި ޤުރްއާން ކިޔެވުމުގެ 36 ވަނަ ޤައުމީ މުބާރާތުން ހާފިޒުންގެ ބައިން އެއް ވަނަ ހާސިލްކޮށްފައި ވަނީވެސް ޝާޔާއެވެ.