އެމްޓީސީސީގެ ސުޕަވައިޒަރުންނަށް ޚާއްސަކޮށްގެން މަހާސިންތާއެއް ބާއްވައިފި

ޢުމްރާނީ ތަރައްޤީގެ މަސައްކަތު ސައިޓްތަކުގައި ހަރަކާތްތެރިވާ އެމްޓީސީސީގެ ސުޕަވައިޒަރުންނަށް ޚާއްސަކޮށްގެން މަހާސިންތާއްއެއް ކުރިއަށް ގެންގޮސްފިއެވެ.

ދެ ދުވަހަށް ކުރިއަށް ގެންދިޔަ މި މަހާސިންތާއަކީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީގެ އެޗްއާރް ޑިވިޜަނުން ކުރިއަށްގެންދާ އަހަރީ މަހާސިންތާއެކެވެ. އެމްޓީސީސީން ވިދާޅުވީ މިއަހަރުގެ މަހާސިންތާގައި 107 ސައިޓްގެ ސުޕަވައިޒަރުން ބައިވެރިވިކަމަށެވެ. ސައިޓް ސުޕަވައިޒަރުންނަކީ ރާއްޖޭގެ ޢުމްރާނީ ތަރައްޤީގެ މަޝްރޫޢުތަކުގެ ޢަމަލީ މަސައްކަތް ކުރިއަށް ގެންދިއުމުގައި އެންމެ އިސްކޮށް ހަރަކާތްތެރިވާ މުވައްޒަފުންކަން އެކުންފުނިން ފާހަގަކުރެއެވެ.

"ސުޕަވައިޒަރުންގެ މަހާސިންތާ 2024" ނިންމުމުގެ ރަސްމިއްޔާތު ޝަރަފުވެރިކޮށްދެއްވާ ބައިވެރިންނަށް ސެޓްފިކެޓް ހަވާލުކޮށްދެއްވީ އެ ކުންފުނީގެއެގްޒެކެޓިވް މެނޭޖްމަންޓް ޓީމުގެ މެންބަރުންނާއި ޑިރެކްޓަރުންގެ ބޯޑުގެ އިސްވެރިންނެވެ. މި މަހާސިންތާއަކީ ސުޕަވައިޒަރުންނަށް އަމާޒުކޮށް ހިންގި މިފަދަ ތިންވަނަ މަހާސިންތާއެވެ.

މިއަހަރު ކުރިއަށްދިޔަ މަހާސިންތާގެ ބައިވެރިންނަށް މަޝްރޫޢުތައް ކުރިއަށްގެންދިއުމާ ގުޅޭގޮތުންނާއ،ި ލީޑަރޝިޕް އަދި ޓީމެއްގެ ގޮތުގައި ގުޅިގެން މަސައްކަތްކުރުމާއި ގުޅޭގޮތުން ސެޝަންތަކެއް ކުރިއަށް ގެންގޮސްފައިވެއެވެ. މި ސެޝަންތަކުގައ،ި މަޝްރޫޢުތައް ހިންގުމާއި ގުޅޭގޮތުން މުހިއްމު މަޢުލޫމާތުތަކެއް ހިއްސާކޮށްފައިވާކަމަށް އެމްޓީސީސީން ވިދާޅުވެއެވެ. އަދި އެމްޓީސީސީން ހިންގާ މަޝްރޫޢުތަކުގެ ކޮލިޓީރަނގަޅު ކުރުމާއ،ި ސަރުކާރުން ބޭނުންވާ އަވަސް މިނުގައި މަޝްރޫޢުތައް ކުރިއަށް ގެންދިއުމާއ،ި ޙަރަދު މެނޭޖުކުރުމާއ،ިމަޝްރޫޢުތައް ނިންމަން އޮންނަ ވަގުތުގެތެރޭ އެފިޝެންޓްކޮށް މަޝްރޫޢުތައް ނިންމުމާއި ގުޅޭގޮތުން ބައިވެރިން ހޭލުންތެރިކުރުވިއެވެ.

މީގެ އިތުރުން ކުންފުނީގެ މަޝްރޫއުތަކުގައި ބޭނުންކުރާ މެޝިނަރީ އާއި އުޅަނދުފަހަރު ބަލަހައްޓާ "ޕްރިވެންޓިވް މެއިޓެނެންސް"ގެ އިމުގުތެރެއިން ކުންފުންޏަށް އެންމެ ފައިދާވާގޮތަށް ވަސީލަތްތަކުގެ ބޭނުންކުރުމާއި ގުޅޭގޮތުންވެސް މަޝްވަރާ ކުރިކަން އެމްޓީސީސީން ފާހަގަކުރެއެވެ.

އެމްޓީސީސީއާއި ރައްޔިތުންނާއި އޮންނަ ގުޅުން އިތުރަށް ބަދަހިކުރެވޭނެ ގޮތްތަކާއ،ި ކުންފުނީގެ އިޖްތިމާޢީ ޒިންމާގެ ދަށުން ކުރިއަށް ގެންދެވޭ މަސައްކަތްތައް އޭގެ އެންމެ ފުރިހަމަ ގޮތުގައި ރައްޔިތުންނާއި ހަމައަށް ފޯރުކޮށްދިނުމުގެ މުހިއްމުކަމުގެ މައްޗަށްވެސް މި މިހާސިންތާގައި އަލި އަޅުވާލިއެވެ.

މިފަދަ ހޭލުންތެރިކަމުގެ ފޯރަމްތަކުގެ އިތުރުނ،ް ކުންފުނީގެ މުވައްޒަފުންގެ ކުރިއެރުމަށް ސްކޮލަރޝިޕްއާއި ޓްރޭނިންގ ފުރުސަތުތައްފަހިކޮށްދިނުމަކީ އެމްޓީސީސީން ވަރަށްބޮޑު އިސްކަމެއްދީގެން ކުރަމުން އަންނަ ކަމެއްކަން އެ ކުންފުނިން ފާހަގަކުރެއެވެ. އެގޮތުން ވޭތުވެދިޔަ އަހަރު 1603 މުވައްޒަފުންނަށް އެކިއެކި ދާއިރާއިން ޖުމުލަ 22،143 ގަޑިއިރުގެ ތަމްރީން ދީފައިވާކަމަށް އެމްޓީސީސީން ވިދާޅުވެއެވެ.