ހިސާބާއި ސައިންސް ކިޔަވައިދޭ މުދައްރިސުން ތަމްރީން ކުރުމުގެ މަސައްކަތް ފަށައިފި

ސާނަވީ ގްރޭޑްތަކަށް ހިސާބާއި ސައިންސް ކިޔަވައިދޭ މުދައްރިސުންނަށް ޚާއްސަކޮށްގެން ޓްރެއިނިންގ އޮފް ޓްރެއިނަރސް މަސައްކަތު ބައްދަލުވުމެއް ފަށައިފިއެވެ.

މި މަސައްކަތު ބައްދަލުވުމަކީ، އެޓޯލް އެޑިޔުކޭޝަން ޑިވެލޮޕްމަންޓް ޕްރޮޖެކްޓް (އޭ.އީ.ޑީ.ޕީ)ގެ އެހީތެރިކަމާއެކު ނޭޝަނަލް އިންސްޓިޓިއުޓް އޮފް އެޑިޔުކޭޝަނުން ކުރިއަށްގެންދާ މަސައްކަތު ބައްދަލުވުމެކެވެ.

މި މަސައްކަތު ބައްދަލުވުމުގެ މައިގަނޑު މަޤްޞަދަކީ ކީ ސްޓޭޖް 3 އަދި 4 ގެ ހިސާބާއި ސައިންސް މާއްދާ ކިޔަވާ ދަރިވަރުންގެ ފެންވަރު މަތިކުރުމަށްޓަކައި، މި މާއްދާތައް އުނގަންނައިދެއްވާ ޓީޗަރުންނަށް ބޭނުންވާ ފަންނީ ގާބިލުކަމާއި ކިޔަވައިދިނުމުގެ ހުނަރާއި ޕެޑަގޮޖިކަލް ކޮންޓެންޓް ނޮލެޖް ތަރައްޤީކުރުމެވެ.

މި ތަމްރީން ޕްރޮގްރާމް ފެށުމުގެ ރަސްމިއްޔާތުގައި ތަޢުލީމާ ބެހޭ ވުޒާރާގެ ސްޓޭޓް މިނިސްޓަރ ހުސައިން ސަޢީދު މުޙައްމަދު ވިދާޅުވީ، ދުނިޔޭގެ ކުރިއަރާފައިވާ ޤައުމުތަކުގައި ހިސާބު މާއްދާއާއި ސައިންސް މާއްދާ އުނގަންނައިދިނުމަށްޓަކައި އިސްކަމެއް ދެއްވާކަމަށެވެ. އަދި އެކަމުގެ ސަބަބުން އެ ޤައުމުތަކުން ޓެކްނޮލަޖީއާއި ސައިންސްގެ ދާއިރާއިން ކުރިއަރަމުންދާކަން ސްޓޭޓް މިނިސްޓަރ ފާހަގަކުރެއްވިއެވެ.

އެހެންނަމަވެސް ރާއްޖޭގެ ސްކޫލްތަކުގައި ކިޔަވަމުންދާ ދަރިވަރުންގެ ތެރެއިން އެ މާއްދާ ކިޔަވަން ބޭނުންނުވާ ނުވަތަ ފޫހިވާ ދަރިވަރުން ތިބިކަން ސްޓޭޓް މިނިސްޓަރ ފާހަގަކުރެއްވިއެވެ. އެހެންކަމުން މި ތަމްރީން ޕްރޮގްރާމުން ލިބޭ މަޢުލޫމާތުގެ އަލީގައި ދަރިވަރުން މި މާއްދާތައް ކިޔަވަން ފޫހިވާ ސަބަބުތައް ދެނެގަނެ، ސައިންސާއި ހިސާބު މާއްދާއިން ދަރިވަރުން ހޯދާ ނަތިޖާ ރަނގަޅުކުރުމަށް މަސައްކަތް ކުރުމަށް އިލްތިމާސްކުރެއްވިއެވެ.

"ކުދިން އޯލެވެލް ހަދާއިރުގައި ހިސާބު ހަދާކުދިންގެ %60 ހަދަން ބޭނުންވަނީ ކޯ ޕޭޕަރ. އެކްސްޓެންޑަރޑް ހަދާނީ މަދު ކުދި ބައެއް." ސްޓޭޓް މިނިސްޓަރ ހުސައިން ސަޢީދު މުޙައްމަދު ވިދާޅުވިއެވެ.

ސާނަވީ ތައުލީމުގެ ފެންވަރު މަތިކުރުމަށްޓަކައި ކުރަމުންދާ މަސައްކަތްތަކުގެ ތެރެއިން ކުރިއަށްގެންދާ މި މަސައްކަތު ބައްދަލުވުމުގައި ސެކަންޑަރީ ސައިންސް މާއްދާތަކާއި ހިސާބު އުނގެނުމާއި އުނގަންނައިދިނުން އިތުރުކުރުމަށް ފޯރމަޓިވް އެސެސްމަންޓް ބޭނުންކުރުމާ ބެހޭ މަޢުލޫމާތު ހިއްސާކުރުމަށް ހަމަޖެހިފައިވާކަމަށް ތަޢުލީމީ ކަންތައްތަކާ ބެހޭ ވުޒާރާއިން ވިދާޅުވެއެވެ. އަދި އުނގެނުމުގައި ހުންނަ ފަރަގުތައް ދެނެގަނެ، ދަރިވަރުންގެ ކުރިއެރުމަށްޓަކައި "ޔޫސް އެސެސްމަންޓް ޑޭޓާ" ބޭނުންކުރާނެގޮތުގެ މަޢުލޫމާތު ހިއްސާކުރުމަށްވެސް ވަނީ ހަމަޖެހިފައެވެ.

މި މަސައްކަތު ބައްދަލުވުމުގައި މާލެއާއި އަތޮޅުތަކުގެ 114 ސްކޫލުން 228 ޓީޗަރުން ތަމްރީން ކުރުމަށް ހަމަޖެހިފައިވާކަމަށް ތަޢުލީމީ ކަންތައްތަކާ ބެހޭ ވުޒަރާއިން ވިދާޅުވެއެވެ. މީގެ ތެރޭގައި ކޮންމެ ސްކޫލަކުންވެސް ހިސާބު މާއްދާއާއި ސައިންސްގެ މައްދާތަކަށް ޓްރެއިނަރެއް ހިމެނޭހެން 2 ޓްރެއިނަރުން ތަމްރީނުވާނެކަމަށްވެސް އެ ވުޒާރާއިން ވިދާޅުވެއެވެ.

ތަޢުލީމާ ބެހޭ ވުޒާރާއިން ވިދާޅުވީ މި ތަމްރީނު ފުރިހަމަ ކުރުމަށްފަހު ޓްރެއިނަރުން މަސައްކަތްކުރައްވާ ސްކޫލުތަކާއި އަތޮޅުގެ އެހެން ސްކޫލުތަކުގައި މި މާއްދާތައް ކިޔަވައިދެއްވާ ޓީޗަރުންނަށް މި ތަމްރީން ފޯރުކޮށްދޭނެކަމަށެވެ. މި ޕްރޮގުރާމް ގެ ކޮންސަލްޓެންސީގެ މަސައްކަތްކޮށްފައިވަނީ ވިލާކޮލެޖުންނެވެ.

މި މަސައްކަތު ބައްދަލުވުން ކުރިއަށް ދާނީ ދެ ބުރަކަށް ބަހާލައިގެންނެވެ. އެގޮތުން ފުރަތަމަ ބުރު މިމަހުގެ 17 ވަނަ ދުވަހާ ހަމައަށް ކުރިއަށް ގެންދާއިރު ދެވަނަ ބުރު ކުރިއަށް ގެންދިޔުމަށް ހަމަޖެހިފައިވަނީ މިމަހުގެ 20 ވަނަ ދުވަހުން 24 ވަނަ ދުވަހަށެވެ.