އެއާޕޯޓުގައި ލަގެޖު އުފުލާ އުޅަނދެއް އެކްސިޑެންޓުވެ މީހަކު ނިޔާވެއްޖެ

ވެލާނާ އިންޓަރނޭޝަނަލް އެއާޕޯޓުގައި ލަގެޖް އުފުލާ އުޅަނދެއް އެކްސިޑެޓުވެ، މީހަކު ނިޔާވެއްޖެއެވެ.
ދުއްވާފައި ދިޔަ ލަގެޖް އުފުލާ އުޅަނދެއް، ލައިޓުތަކާއި ކެމެރާ ހަރުކޮށްފައިހުރި ސްޓްރަކްޗަރގެ ބުޑުގައި ޖެހިގެން ހިނގި މިއެކްސިޑެންޓުގައި ނިޔާވީ ލަގެޖު އުފުލާ އުޅަނދު ދުއްވި ޑްރައިވަރެވެ.

ފުލުހުން ވިދާޅުވީ، ސްޓްރަކްޗަރގައި އުޅަނދު ޖެހި އެކްސިޑެންޓު ހިނގާފައިވަނީ ދުއްވަން އިން މީހާއަށް ސިއްޙީ ޙާލަތެއް މެދުވެރިވެގެންކަމަށް ބެލެވޭކަމަށެވެ. މިޙާދިސާގައި ނިޔާވީ އުމުރުން 45 އަހަރު ދިވެހި ފިރިހެނެވެ. އެކްސިޑެންޓާއެކު މިހާ ވަގުތުން ކްލިނިކަށް ގެންގޮސް ފަރުވާދިނެވެ. އެހެންނަމަވެސް އޭރު އޭނާ ވަނީ ނިޔާވެފައެވެ.

މިއަދު ހެނދުނު 9:30 ހާއިރު ހިނގި މި ހާދިސާއާ ގުޅިގެން އޭނާގެ ހަށިގަނޑު ވަނީ އައިޖީއެމްއެޗަށް ގެންގޮސްފައެވެ. އެ ހޮސްޕިޓަލާ ހަވާލާދީ ފުލުހުން ވިދާޅުވީ އެނާގެ ހަށިގަނޑުގެ ބޭރުފުށުން އެއްވެސް ހާނީއްކައެއް ފެންނަން ނެތްކަމަށެވެ.

ފުލުހުން ވަނީ މިހާދިސާއާއި ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ.