ފާއިތުވެދިޔަ ފަސް މަސްދުވަހުގެ ތެރޭގައި މާލެ ސަރަޙައްދުގައި ވިޔަފާރިކުރާ، 750 ތަނެއް އިންސްޕެކްޓް ކުރައްވައި، އޭގެ ތެރެއިން 20 ތަނަކާމެދު ފިޔަވަޅު އަޅުއްވާފައިވާ ކަމަށް އިކޮނޮމިކް މިނިސްޓްރީން ހާމަކުރައްވައިފިއެވެ.
އިއްޔެ ބޭއްވެވި ނޫސްވެރިންގެ ބައްދަލުވުމެއްގައި ރަޖިސްޓްރަރ އޮފް ކޮމްޕެނީސް މަރްޔަމް ވިސާމް ވިދާޅުވީ އެންމެ ގިނައިން އެމިނިސްޓްރީއަށް ހުށަހެޅޭ ޝަކުވާއަކީ ރީޓެއިލް ވިޔަފާރީގައި ބިދޭސީން ޙަރަކާތްތެރިވުމާއި ފޮޓޯގްރާފަރުންގެ ގޮތުގައި ބިދޭސީން ޙަރަކާތްތެރިވާ މައްސަލަތައްކަމަށެވެ.
ނޫސްވެރިންގެ ބައްދަލުވުމުގައި ހޯމް މިނިސްޓްރީގެ އެގްޒެކެޓިވް ކޯޑިނޭޓަރ ޢަބްދުﷲ ޝަރީފް ވިދާޅުވީ ބާޒާރުމަތީ މަގުމަތީގައި ޤަވާއިދާ ޚިލާފަށް ވިޔަފާރިކުރާ ފަރާތްތަކާމެދު ފިޔަވަޅުއަޅުއްވާކަމަށާއި އެހެން ހުންނަ މުދާ މިނިސްޓްރީގެ ބެއްލެވުމުގެ ދަށަށް ގެންދަވައި، ބައެއް ތަކެތި ނައްތާލައްވާފައިވާ ކަމަށް ޝަރީފް ވިދާޅުވިއެވެ.
މޯލްޑިވްސް އިމިގްރޭޝަންގެ މޮނިޓަރިންގ ޑިވިޝަންގެ ހެޑް، އަޙުމަދު ވަޙީދު ވިދާޅުވީ ކޭޝިއަރުންގެ ގޮތުގައި ބިދޭސީން ތިބުމާ ގުޅިގެން މިހާތަނަށް 56 ބިދޭސއަކު އިމިގްރޭޝަންގެ ބެލުމުގެ ދަށަށް ގެންނަވާފައިވާ ކަމަށާއި އެމީހުން މިހާރު އަނބުރާ ޤައުމަށް ފޮނުވާލެވިފައިވާ ކަމަށެވެ. މީގެއިތުރުން ވަޙީދު ވިދާޅުވީ ރޯދަމަހާ ދިމާކޮށް ބިދޭސީން ތަރުކާރީއާއި މޭވާ ރާއްޖެއަށް އެތެރެކޮށް ޤަވާއިދާ ޚިލާފަށް ވިޔަފާރިކުރަމުންދާކަން ފާހަގަކުރެވިފައިވާ ކަމަށެވެ.
ޗީފް އިންސްޕެކްޓަރ އޮފް ޕޮލިސް ފަތުޙުﷲ ވަޙީދު ވިދާޅުވީ މިހާރަކަށް އައިސް ދަންވަރު ގަޑީގައި ޤަވާޢިދާ ޚިލާފަށް ވިޔަފާރިކުރުން އިތުރުވެފައިވާ ކަމަށާއި އޭގެތެރޭގައި ދަންވަރުގެ ގަޑިތަކުގައި ބައެއް ގޭގޭގައި ހެދިކާ ފަދަ ތަކެތި ވިއްކުމާއި ޕާރުސަލްފަދަ ތަކެތި ވިއްކާކަން ފާހަގަކުރެވިފައިވާ ކަމަށެވެ.