އައިޖީއެމްއެޗުގެ ކިޔު ކުޑަކުރުމަށްޓަކައި މާލޭގެ 4 ސަރަޙައްދެއްގައި ސަރުކާރުގެ ކްލިނިކްތަކެއް

އައިޖީއެމް ހޮސްޕިޓަލަށް ޑޮކްޓަރަށް ދެއްކުމަށް ދާ މީހުންގެ ކިޔު ކުޑަކުރުމަށްޓަކައި އާއްމު ބަލިތަކަށް ޑޮކްޓަރަށް ދެއްކުމަށް 4 ޖެނެރަލް ޕްރެކްޓިސް ކްލިނިކް މާލޭގެ އެކި ސަރަހައްދުތަކުގައި ޤާއިމްކުރުމަށް ނިންމަވައިފިއެވެ.

މާލެ ސިޓީ ގްރޫޕް އޮފް ހޮސްޕިޓަލްސްގެ ދަށުން ހިންގާ ސަރުކާރުގެ މައި ހޮސްޕިޓަލް އައިޖީއެމްއެޗަކީ ރާއްޖޭގައިވެސް އެންމެ ގިނަ ބަޔަކު ޑޮކްޓަރަށް ދެއްކުމަށް ޒިޔާރަތްކުރާ ހޮސްޕިޓަލެވެ. އަދި ހިލޭ ބޭސްފަރުވާގެ ޚިދުމަތާއެކު އައިޖީއެމްއެޗް ފަދައިން ސަރުކާރުގެ އެެހެން ހޮސްޕިޓަލްތަކަށް އޮންނަ ޑިމާންޑުވެސް ވަނީ ވަރަށް ބޮޑަށް އިތުރުވެފައެވެ.

އައިޖީއެމްއެޗްގެ ތަފާސްހިސާބުތައް ދައްކާގޮތުން އިމަޖެންސީއާއި ޖެނެރަލް ޕްރެކްޓިސް ނުވަތަ އާންމު ބަލިތަކަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 150،000 އަށްވުރެ މަތީގައެވެ. އައިޖީއެމްއެޗްގައި އަދި އޯޕީޑީ ކޮންސަލްޓޭޝާންގެ ހިދުމަތް ހޯދުމަށް މީހުން ޒިޔާރަތްކޮށްފައިވާ އަދަދު އުޅެނީ 240000 ގައެވެ. އަދި ހުޅުމާލެ ހޮސްޕިޓަލަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 238،000 އަށްވުރެ މަތީގައެވެ.

އައިޖީއެމް ހޮސްޕިޓަލްގެ ޚިދުމަތްތަކާ ގުޅޭގޮތުން ނޫސްވެރިންނަށް މައުލޫމާތު ދެއްވަމުން މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވީ އައިޖީއެމްއެޗްގެ ޚިދުމަތްތައް ލުއިފަސޭހަކޮށް، އަވަސްކޮށް ފޯރުކޮށްދިނުމަށް މުހިއްމު ބަދަލުތަކެއް ގެންނަމުންދާކަމަށެވެ. އެގޮތުން ސަރުކާރު ހޮސްޕިޓަލުތަކުގެ ކިއު ދިގުވެ، ޑޮކްޓަރަށް ދެއްކުމަށް ހޭދަވާ ވަގުތު ކުޑަކުރުމަށް މާލޭގެ 4 ސަރަޙައްދެއްގައި ސަރުކާރުގެ ޖެނެރަލް ޕްރެކްޓިސް (ޖީޕީ) ނުވަތަ އާއްމު ބަލިތަކަށް ފަރުވާ ދިނުމަށް ކްލިނިކްތަކެއް ޤާއިމްކުރުމުގެ މަސައްކަތް ފަށާފައިވާކަމަށެވެ.

މި ކްލިނިކްތައް ޤާއިމްކުރުމުން ޖެނެރަލް ޕްރެކްޓިޝަނަރއަކަށް ކްލިނިކަށް ދެއްކުމަށް ފަހު، ޚާއްސަ ބަލީގެ ޑޮކްޓަރަށް ދައްކަންޖެހޭނަމަ އެ އިރުޝާދެއް ދިނުމާއި، އެކަންކަން ހަމަޖައްސާނީ އެ ކްލިނިކްގެ ފަރާތުން މާލޭ ގްރޫޕް އޮފް ހޮސްޕިޓަލްސްއިން ވިދާޅުވެއެވެ.

ސީއީއޯ އިބްރާހިމް އަބްދުއްރައްޒާގު ޙަލީމް ވިދާޅުވީ މިހާރު ޑޮކްޓަރަށް ދެއްކުމުގައި އިސްކުރަންޖެހޭ މުހިންމު ގޮތްތައް ގިނަ މީހުންނަށް ނޭނގޭކަމަށެވެ. އެގޮތުން ބައެއް ފަހަރު ދައްކަންޖެހޭ ސްޕެޝަލިސްޓް ނޫން ސްޕެޝަލިސްޓުންނަށް ދެއްކޭ ފަހަރު އަންނަކަމަށާއި، އެކަމުގެ ސަބަބުން ފަރުވާ ނުލިބި ދިގު މުއްދަތެއް ވެގެންދާކަން ސީއީއޯ ފާހަގަކުރެއްވިއެވެ. އެހެންކަމުން ޖެނެރަލް ޕްރެކްޓިސް ކްލިނިކްތަކާއެކު، އެ މައްސަލަ ހައްލުވެގެންދާނޭކަމަށް އޭނާ ވިދާޅުވިއެވެ.

"ވަރަށް އާދައިގެ ކުދި ކަންކަމުގައި ސްޕެޝަލިސްޓުންނަށް އެބަ ދައްކާ. މިގޮތަށް އަމިއްލައަށް ދައްކާއިރު ނުބައި ޑޮކްޓަރަށް އެބަ ދެއްކޭ. ޖީޕީ ކްލިނިކަށް ދެއްކީމަ ފަސޭހައިން އިނގޭނެ އެ ބައްޔަށް ދައްކަންވީ ކޮން ސްޕެޝަލިސްޓަކަށްކަން. އަދި ކްލިނިކުން އެ އެޕޮއިންޓްމަންޓް ސްޕެޝަލިސްޓަށް ހަމަޖައްސާނެ." މާލޭ ގްރޫޕް އޮފް ހޮސްޕިޓަލްސްގެ ސީއީއީ އިބްރާހީމް އަބްދުއްރައްޒާގު ޙަލީމް ވިދާޅުވިއެވެ.

ސީއީއޯ ވިދާޅުވީ މި ބަދަލުގެ ސަބަބުން އައިޖީއެމްއެޗްގެ ކިއުތަކަށް ވަރަށް ބޮޑަށް ލުއި ލިބޭނެކަމަށެވެ. އަދި އީ.އާފް ނުވަތަ އެމަޖެންސީ ޚިދުމަތްތައް ބާރު ބޮޑުނުވެ ޚިދުމަތް ދިނުމުގެ ނިޒާމަށް ހެޔޮ ބަދަލެއް ގެނެވޭނެކަމަށްވެސް ސީއީއޯ ވިދާޅުވިވެ.

ދަރުމަވަންތަ ހޮސްޕިޓަލްގެ ޑެޕިއުޓީ ޗީފް އެގްޒެކެޓިވް އޮފިސަރ ޑރ.ޝާހު މާހިރު ވިދާޅުވީ އައިޖީއެމްއެޗްގެ ސްޕެޝަލިސްޓް ޑޮކްޓަރުންގެ ކިއުތަކަށް ލުއިކުރުމަށް އެޕޮއިންޓްމަންޓް ސިސްޓަމަށްވެސް މުހިންމު ބަދަލުތަކެއް ގެންނަމުންދާކަމަށެވެ. އެގޮތުން ޖީޕީ ކްލިނިކާއެކު ކޮންމެހެން ސްޕެޝަލިސްޓް ޑޮކްޓަރުންނަށް ދައްކަންޖެހޭ މީހުން ދެނެގަނެވޭ ލުއިފަސޭހަ ނިޒާމުގެ އިތުރުން، އެޕޮއިންޓްމަންޓް ވަގުތާ ދުވަސް ދުރާލާ އިނގޭނެ ނިޒާމެއްވެސް ޤާއިމުކުރަމުންދާކަމަށް ޑރ.ޝާހު މާހިރު ވިދާޅުވިއެވެ.

"އެޕޮއިންޓްމަންޓް ސިސްޓަމަށް ދިޔައީމަ ދުރާލާ އިނގޭނެ ދައްކާ ދުވަހާ ގަޑިއާ ފަސޭހައިން. މިހާރު 3 ޑިޕަރޓްމަންޓެއްގައި އެބަ ޕްރެކްޓިސް ކުރަން. އޭރުން މެމޯ ހެއްދުމުގައި ޕޭޝަންޓުންނަށް ބޮޑު ލުޔެއް ލިބޭނެ." ދަރުމަވަންތަ ހޮސްޕިޓަލްގެ ޑެޕިއުޓީ ޗީފް އެގްޒެކެޓިވް އޮފިސަރ ޑރ.ޝާހު މާހިރު ވިދާޅުވިއެވެ.

ޖީޕީ ކްލިނިކްތައް ޤާއިމުކޮށް އަންނަ އަހަރުގެ ތެރޭގައި ޚިދުމަތް ފެށުމަށް ދަނީ މަސައްކަތް ކުރަމުންނެވެ. މިވަގުތު ހުޅުމާލެ ހޮސްޕިޓަލްއިން ހިންގާ ޖީޕީ ކްލިނިކެއް ހުޅުމާލެ ދެވަނަ ފިޔަވަހި ހިޔާ ޓަވަރު 16ގައި ހިންގަމުން އާދެއެވެ.