އަބަދުވެސް އެދެނީ ދިވެހިންނަށް ނަޞްރާއި ނަސީބު: ނައިބު ރައީސް
-
ދިވެހިރާއްޖެ މިނިވަން ޤައުމެއްގެ ގޮތުގައި ލެހެއްޓެވުމަށް ނައިބު ރައީސް ދުޢާކުރެއްވި
އަބަދުވެސް އެދެނީ ދިވެހިންނަށާއި މިރާއްޖެއަށް ނަޞްރާއި ނަސީބު ލިބުންކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މިހެން ވިދާޅުވީ މިއަދު ފާހަގަކުރަމުންދާ ނަޞްރުގެ ދުވަހުގެ މުނާސަބަތުގައި ސޯޝަލް މީޑިޔާގައި ހިއްސާކުރެއްވި ޕޯސްޓުގައެވެ.
ސޯޝަލް މީޑިޔާގަިއ ހިއްސާކުރެއްވި ޕޯސްޓުގައި ނައިބު ރައީސް ވަނީ މާތް ﷲ މި ދިވެހިރާއްޖެ މިނިވަން އިސްލާމީ ޤައުމެއްގެ ގޮތުގައި އަބަދަށް ލެހެއްޓެވުމަށް އެދި ދުޢާކުރައްވާފައެވެ. އަދި ބޭރުގެ އެކިއެކި ނުރައްކާތަކުން ރާއްޖެއާއި ރާއްޖޭގެ ރައްޔިތުން ސަލާމަތްކުރެއްވުމަށާއި ރާއްޖެއަށް އަބަދުވެސް ނަޞްރާއި ނަޞީބު މިންވަރު ކުރެއްވުމަށް އެދި ދުޢާކުރެއްވިއެވެ.
ނަޞްރުގެ ދުވަހުގެ ހެޔޮ އެދުމާއި ތަހުނިޔާ އެންމެހާ ލޮބުވެތި ދިވެހި ރައްޔިތުންނަށް އަރިސްކުރަން. pic.twitter.com/ds8uf4nmKI
— Hussain Mohamed Latheef (@HucenSembe) November 2, 2024
ނަޞްރުގެ ދުވަސް ރާއްޖޭގައި ފާހަގަކުރަނީ 1988 ވަނަ އަހަރުގެ ނޮވެންބަރުމަހުގެ 3 ވަނަ ދުވަހު ދިވެހި 6 ޚާއިނުން ބޭރުގެ ނިރުބަވެރި ޖަމާޢަތަކާ ގުޅިގެން ރާއްޖޭގެ މައްޗަށް އަތްގަދަ ކުރުމަށް ދިން ޢުދުވާނީ ޙަމަލާއިން ދިވެހިންނަށް ނަޞްރު ލިބުން ފާހަގަކުރުމަށެވެ. މިދުވަހު ދިން ހަމަލާގައި 19 ދިވެހިން ޝަހީދުވިއެވެ. މީގެ ތެރޭގައި ސިފައިންގެ 8 ބޭކަލުންނާއި އާންމު ރައްޔިތުންގެ 11 މީހުން ހިމެނެއެވެ.