މިއަދު ރާއްޖެއަކީ އެއްވެސް ގައުމަކާއި ދެކޮޅު ގައުމެއް ނޫން

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދިވެހި ޒަޢާމަތާއި ހަވާލުވެވަޑައިގަތީ ރާއްޖޭގެ މިނިވަންކަމާއި އިސްތިގުލާލާއި ސިޔާދަތު ނުރައްކަލަށް ހުށަހެޅިފައި އޮތްވާކަން އެއީ ގިނަ ބަޔަކު ގަބޫލުކުރާ ހަގީގަތެކެވެ. ނިމިދިޔަ ސަރުކާރުން ގެންގުޅުނު ދޯހަޅި ސިޔާސަތުތަކުގެ ސަބަބުން އަމިއްލަ ބާރު ކަންކަމުގައި ކެނޑެމުން ގޮސް، ދާޚިލީ ކަންކަމުގައި ބޭރު މީހުންނަށް ބަސް ބުނުމުގެ ޖާގަ އޮތީ ތަން މިނަށް ހުޅުވިފައިކަންވެސް އެއީ އަޅުގަނޑުމެން ގަބޫލުކުރަންޖެހޭ ހަގީގަތެކެވެ. ދާޚިލީ މިނިވަންކަމަށް ބުރޫ އަރަމުން ގޮސް، އަސްކަރީ އަދި ދިފާޢީ ކަންކަމުގައި އެހެން ގައުމުތަކަށް ބަރޯސާވީ ގައުމުގެ މިނިވަންކަން ނުރައްކަލަށް ހުށަހެޅުނަސް ފަރުވާލެއް ނެތްކަމަށް ބަލައިގެންކަން ނިމިދިޔަ ސަރުކާރުގެ ސިޔާސަތުތަކުން ވަނީ ހާމަވެފައެވެ. ނަމަވެސް އެއީ ރައްޔިތުން ބަލައިގަންނަ ކަންކަން ނޫންކަން ހާމަކޮށްދެނީ ރިޔާސީ އިންތިޚާބުގެ ނަތީޖާއިންނެވެ. ރައްޔިތުން ސާފު ބަހުން ބުނީ "ފުދިއްޖެ"ކަމަށެވެެ.

2023 ނޮވެމްބަރ 17 ވަނަ ދުވަހު ރާއްޖޭގެ ރައީސުލްޖުމްހޫރިއްޔާކަމުގެ މަގާމާއި ރައީސް ޑރ. މުޙައްމަދު މުޢިއްޒު ހަވާލުވެވަޑައިގަތީ ގައުމުގެ މިނިވަންކަން ނުރައްކަލުން ސަލާމަތްކޮށް، އިސްތިގުލާލު ރައްކާތެރިކޮށް، ސިޔާދަތީ ބާރުވެރިކަން ކަށަވަރުކުރުމުގެ ވައުދުފުޅާއެކުއެވެ. އެ މަސައްކަތުގެ ދަށުން ހަރުދަނާ ޚާރިޖީ ސިޔާސަތުތަކެއް އެކުލަވާލާއި، ދިފާޢީ ގޮތުންނާއި އަސްކަރީގޮތުން ކުރިއެރުންތަކެއް ގައުމަށް ގެންނެވުމަށް ގިނަ މަސައްކަތްތަކެއް މިދިޔަ އަހަރެއްހާ ދުވަހުގެ ތެރޭގައި ވަނީ ކުރައްވާފައެވެ.

ޚާރިޖީ ގޮތުން ގެންގުޅުއްވާ ހަރުދަނާ ސިޔާސަތުތަކުގެ ސަބަބުން މިއަދު ރާއްޖެއަކީ އެއްވެސް ގައުމަކާއި ދެކޮޅު ގައުމެއް ނޫނެވެ. އަދި އެއްވެސް ގައުމެއްގެ "ޕަޕެޓެއް" ވެސް ނޫންކަން އެއީ ފެންނަން އޮތް ހަގީގަތެކެވެ. ބައިނަލްއަގުވާމީ މައިދާނުގައިވެސް ރާއްޖެއަކީ ބަސް ވިކޭ ގައުމެކެވެ. އެހެން ގައުމުތަކާއި ގުޅިގެން ބޮޑެތި މައްސަލަތައް ހައްލުކުރުމަށް އެންމެ ކުރީ ސަފުގައި ދަނީ މަސައްކަތް ކުރަމުންނެވެ. ނަމަވެސް އެއްވެސް ބައެއްގެ ދަށު ނުވެ، އަމިއްލަ މިނިވަންކަމާއެކު ބައިނަލްއަގުވާމީ މައިދާނުގައި ސަރުކާރުން ކުރާ މަސައްކަތުން ދައްކުވައިދެނީ މި ގައުމުގެ މިނިވަންކަމާއި އިސްތިގުލާލުގެ ވަރުގަދަކަންކަން ކަށަވަރެވެ. އިރެއްގައި ވަކި ބަޔަކު ބުނާ ގޮތް ނޫން ގޮތެއް ނުހެދުނަސް، މިއަދު އެ މަންޒަރު ބަދަލުވެއްޖެކަން ރައްޔިތުން ގަބޫލުކުރެއެވެ.

ހަރުދަނާ ޚާރިޖީ ސިޔާސަތެއްގެ އިތުރުން ދިފާޢީ ގޮތުންނާއި އަސްކަރީގޮތުން ތަރައްގީ ގެނައުމަށްވެސް މިއަދު ރާއްޖެއިން ކުރާ މަސައްކަތަކީ މިއިން ޒަމާނަކުވެސް ސަރުކާރަކުން ކުރި މަސައްކަތެއް ނޫނެވެ. ރާއްޖޭގެ ޚާއްޞަ އިޤްތިޞާދީ ސަރަހައްދު ބެލެހެއްޓުމަށް ބޭރު ސިފައިންތަކަކަށް ބަރޯސާވެފައި އޮންނަ އޮތުން ނިމުމަކަށް ގެންނެވީ މި ސަރުކާރުންނެވެ. މިއަދު ރާއްޖޭގެ ޚާއްސަ އިގްތިސާދީ ސަރަހައްދު ބަލަހައްޓަނީ ޒަމާނީ އެންމެ ފަހުގެ ވަސީލަތްތައް ބޭނުންކޮށްގެން، ދިވެހި ސިފައިންނެވެ. ކަނޑުގެ ސްޓްރެޓިޖިކް ސާރވޭތަކާއި އެހެނިހެން ހައްސާސް މަސައްކަތްތައްވެސް ކުރާނީ ދިވެހި ސިފައިންނެވެ. ބޭރު ބަޔަކަށް އެކަންކަން ދޫކޮށްލައިގެން، މިނިވަންކަން ނުރައްކަލަށް ހުށަހެޅިފައި އޮތްއޮތުން ނިމުމަކަށް ވަނީ ގެންނަވާފައެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ބޭނުންފުޅު ވަނީ ބަޔަކާއި އޮންނަ ގުޅުން ކަނޑާލާކަށް ނޫނެވެ. ނަމަވެސް ދިވެހިންގެ ކަންކަން ދިވެހީން އަމިއްލައަށް ކުރާކަން އެމަނިކުފާނު ދަނީ ތަކުރާރުކޮށް ވިދާޅުވަމުންނެވެ. އަދި އެކަމުގައި ބޭނުންވަނީ އެހީތެރިކަންކަމަށާއި، ދިވެހީންނަށް އެހީތެރިވެ، ގުޅިގެން މަސައްކަތްކުރަން ބޭނުންވާ ކޮންމެ ބަޔަކާއެކުވެސް މަސައްކަތް ކުރާނެކަން ރައީސް ޑރ. މުހައްމަދު މުއިއްޒުގެ ސަރުކާރުން އެ ގެންދަވަނީ ސާބިތުކޮށްދެއްވަމުންނެވެ. މި ކާމިޔާބީތައް ސަރުކާރުން ހޯއްދަވަން އެ ގެންދަވަނީ ރައީސް ޑރ. މުޙައްމަދު މުޢިއްޒު ވިދާޅުވެފައިވާ މިނިވަންކަމުގެ ރަތް ރޮނގަށް އިހްތިރާމު ކުރުމާއެކުއެވެ. ނިމިދިޔަ ސަރުކާރުގެ އަމަލުތަކަށް "ފުދިއްޖެ" އޭ ބުނެ، އެ ސަރުކާރަށް ރައްޔިތުން ނޫނެކޭ ބުނީ މިނިވަންކަމުގެ ރަތް ރޮނގު ހުރަސްކޮށް، މިނިވަންކަން ނުރައްކަލަށް ހުށަހެޅުމުންކަން މިއަދުވެސް ގިނަ ބަޔަކު ހަނދާން އެބަހުއްޓެވެ.