ސަރުކާރަށް އަހަރެއް: ވެރިންނާއި ވަޒީރުންގެ ޚާއްސަ އިންޓަވިއުތަކާއެކު ޚާއްސަ ކަވަރޭޖެއް

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސަރުކާރަށް 1 އަހަރު ފުރުމާ ގުޅިގެން 14 ދުވަހުގެ ޚާއްސަ ކަވަރޭޖެއް މިއަދުން ފެށިގެން ޕީއެސްއެމްގެ ނިއުސް ޗެނަލް، ޕީއެސްއެމް ނިއުސްއިން ގެނެސްދޭން ފަށައިފިއެވެ.

"ހަފްތާ 52"ގެ ނަމުގައި ޕީއެސްއެމް ނިއުސްއިން ގެނެސްދޭ ކަވަރޭޖުގައި ސަރުކާރުގެ ހުރިހައި ވަޒީރުންނާއި ސަރުކާރު ހިއްސާވާ ބައެއް ކުންފުނިތަކުގެ ވެރިންނާއި ރައްޔިތުންގެ މަޖިލީހުގެ ބައެއް މެންބަރުންގެ އިންޓަވިއުތައް ގެނެސްދޭނެއެވެ.

އަދި ވޭތުވެދިޔަ 1 އަހަރު ދުވަހުގެ ތެރޭގައި ސަރުކާރަށް ލިބިފައިވާ ކާމިޔާބީތަކުގެ މަޢުލޫމާތު ވަރަށް ތަފްސީލުކޮށް ޕީއެސްއެމް ނިއުސްގެ ނޫސްވެރިން މެދުވެރިކޮށް ގެނެސްދޭނެއެވެ.

މީގެ އިތުރުން ކަވަރޭޖްގެ ތެރެއިން ސަރުކާރުގެ 22 ވުޒާރާއިން ކުރައްވާފައިވާ މަސައްކަތްތަކުގެ ތަފްސީލު ހިމެނޭ 22 ޕްރޮގުރާމް 14 ދުވަހުގެ ލައިވް ކަވަރޭޖްގެ ތެރެއިން ދެއްކުމަށް ވަނީ ހަމަޖެހިފައެވެ. އަދި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ސިޔާސަތުތަކަށް އަލިއަޅުވާލާއި ޕީއެސްއެމް ނިއުސްގެ ނޫސްވެރިން ތައްޔާރުކޮށްފައިވާ 6 ޑޮކިޔުމެންޓްރީއެއް ގެނެސްދޭނެއެވެ.

މި ޑޮކިޔުމެންޓްރީތަކުގައި ދިވެހިންގެ މިނިވަންކަން ދަމަހައްޓައި ދިވެހި ޤައުމިއްޔަތަށް ރައީސް ޑރ.މުޙައްމަދު މުޢިއްޒު ދެއްވާ އިސްކަމާއި މާލީ ޙާލަތު ރަނގަޅުކުރުމަށް ރައީސް އެޅުއްވި މުހިންމު ފިޔަވަޅުތަކާއި ގެދޮރުވެރިކަމުގެ ރަން ޒަމާނެއް ގެނެސްދެއްވުމަށް ރައީސް ކުރައްވަމުންގެންދަވާ މަސައްކަތްޕުޅުތައް ވަރަށް ތަފްސީލު ގޮތެއްގައި ގެނެސްދޭނެއެވެ.

ރައީސް ޑރ.މުޢިއްޒުގެ ސަރުކާރަށް އަހަރުވުމާ ގުޅިގެން ޕީއެސްއެމް ނިއުސްއިން ގެނެސްދޭ ޚާއްސަ ކަވަރޭޖުވާނީ ސަރުކާރުގެ ސިޔާސަތުތަކާއި ސަރުކާރުން ކުރައްވަމުންދާ މަސައްކަތްތަކުގެ މަޢުލޫމާތު ޢާންމު ރައްޔިތުންނަށް ފޯރުކޮށް ދިނުމަށް މިހާތަނަށް ޕީއެސްއެސްއެމްއިން ގެނެސްދޭ އެންމެ ބޮޑު އެއް ކަވަރޭޖަށެވެ.

މިއީ މިހާތަނަށް އެއް މުނާސަބަތަކާ ގުޅިގެން ސަރުކަރުގެ ހުރިހައި ވަޒީރުންގެ ޚާއްސަ އިންޓަވިއު މިގޮތަށް ގެނެސްދޭ ފުރަތަމަ ކަވަރޭޖެވެ. އަދި އެއް މުނާސަބަތަކާ ގުޅޭ އެންމެ ގިނަ އިންޓަވިއުތަކާއި ޕްރޮގުރާމްތައް ހިމަނައިގެން ގެނެސްދޭ ކަވަރޭޖެވެ.