2034 ވަނަ އަހަރުގެ ފީފާ ވޯލްޑް ކަޕް ބޭއްވުމަށް ބިޑްކޮށްފައިވާ ސައުދީ އަރައްބިޔާއިން, އެ މުބާރާތުގެ މެޗުތައް ކުޅުމަށް ރިޔާދުގައި ބިނާކުރާ ސްޓޭޑިއަމްގެ ވީޑިއޯއެއް ދައްކާލައިފިއެވެ.
ކިންގް ސަލްމާން ސްޓޭޑިއަމްގެ ނަމުން ނަން ދީފައިވާ 92 ހާސް މީހުންގެ ޖާގައިގެ މި ސްޓޭޑިއަމް ފަރުމާ ކޮށްފައިވަނީ ހަނަފަސް ސަހަރާ ތެރޭގައި ބޮޑު ހިލަ ބޭނުން ކޮށްގެން ތައްޔާރުކޮށްފައިވާ އިމާރާތެއްގެ ގޮތުގައެވެ.
ސައުދީ އަރަބިއްޔާގެ ސްޕޯޓްސް މިނިސްޓްރީން މި ސްޓޭޑިއަމްގެ ވީޑީއޯ އާންމު ކުރުމަށްފަހު ބުނެފައިވަނީ މި ސްޓޭޑިއަމްގެ ހުރިހާ މަސައްކަތެއް 2029 ވަނަ އަހަރުގެ ފަހު ކުއާޓަރ ގައި ނިމޭނޭ ކަމަށެވެ. އަދި މި ސްޓޭޑިއަމަކީ ސައުދީ އަރަބިއްޔާގެ ފުޓްބޯޅަ ޓީމުގެ ބޭސް ކަމަށާއި މި ތަނުގައި އިންޑޯ ސްޕޯޓްސް ހޯލަކާއި އަދި އޮލިމްޕިކް ސައިޒުގެ ސްވިމިންގ ޕޫލަކާއިއެކު ސްޕޯޓްސް ކޮމްޕްލެކްސް އެއްވެސް ގާއިމު ކުރެވިގެންދާނެ ކަމަށެވެ.
2034 ވަނަ އަހަރުގެ ވޯލްޑް ކަޕް ބާއްވާނެ ގައުމެއް ފީފާއިން ރަސްމީކޮށް އަދި މިހާތަނަށް އިއުލާންކޮށްފައިނުވި ނަމަވެސް، ގިނަ ބަޔަކު ގަބޫލުކުރާ ގޮތުގައި މި މުބާރާތް ބޭއްވުމުގެ ފުރުސަތު އެންމެ ބޮޑު ސައުދީ އަރަބިއްޔާގައެވެ.
އަދި މި މުބާރާތް ބޭއްވުމަށް 2023 ވަނަ އަހަރުގެ ނިޔަލަށް ބިޑް ހުށައެޅުމަށް މުއްދަތު ދީފައިވާއިރު، ސައުދީ އަރަބިއްޔާ ނޫން އެހެން އެއްވެސް ގައުމަކުން މި މުބާރާތް ބޭއްވުމަށް ބިޑްކޮށްފައެއް ނުވެ އެވެ.
ވޯލްޑް ކަޕް ބޭއްވުމަށް ބިޑް ކުރުމަށްފަހު ސައުދީ އަރަބިއްޔާއިން ދަނީ ފުޓްބޯޅަ އަށް އިންތިހާއަށް ހޭދަ ކުރަމުންނެވެ. އެގޮތުން އެ ގައުމުގެ ލޯގު ޕްރޮމޯޓްކޮށް ވަރުގަދަ ކުރުމުގެ ގޮތުން ޔޫރަޕްގެ ނަން މަޝްހޫރު ކުޅުންތެރިންތަކެއް ބޮޑު މުސާރަ ދިނުމަށްފަހު ވަނީ ގެންގޮސް ދުނިޔޭގެ ސަމާލުކަން ސައުދީ ލީގަށް ހުއްޓުވާފަ އެވެ.
ސައުދީ އަރަބިއްޔާގެ ފުޓްބޯޅަ ފެޑަރޭޝަނުގެ ރައީސް ޔާރިސް އަލް މިސެހާލް ބުނެފައިވަނީ 2034 ވަނަ އަހަރުގެ ވޯލްޑް ކަޕަކީ ސައުދީ އަރަބިއްޔާއަށް އައިސްފައިވާ ތަރައްގީ ބެލުމަށް މުޅި ދުނިޔެއަށް ދެވޭ ދައުވަތެއް ކަމަށެވެ.