ޤާނޫނުއަސާސީ އިސްލާޙުކުރުން: ކަށަވަރުކޮށްދިނީ ރާއްޖޭގެ ސަލާމަތް؛ ޔަޤީންކޮށްދިނީ މެންބަރުންގެ ނަޒާހަތް

ދިވެހިރާއްޖޭގެ ޤާނޫނުއަސާސީއަށް މިދިޔަ ބުދަދުވަހު ގެނެވުނު އިސްލާޙުތަކާއެކު ދިވެހިރާއްޖޭގެ ސަރަހައްދުގެ ސަލާމަތާއި ރައްކާތެރިކަން ކަށަވަރުކުރެވި، ރައްޔިތުންގެ މަޖިލީހުގެ މެންބަރުންގެ ނަޒާހަތްތެރިކަން އިތުރަށް ޔަޤީން ކުރެވިގެންދާނެކަމަށް މަނަދޫ ދާއިރާގެ މެންބަރު ޙުސްނީ މުބާރަކް ވިދާޅުވެއްޖެއެވެ.

ރާއްޖޭގެ ޤާނޫނުއަސާސީއަށް މައިގަނޑު 3 އިސްލާޙެއް ހުށައަޅައި މަޖިލީހުން ފާސްކޮށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތަސްދީޤުކުރައްވާފައެވެ. ޤާނޫނުއަސާސީއަށް ގެނެސްފައިވާ މައިގަނޑު 3 އިސްލާހަކީ މަޖިލީހަށް މެންބަރު އިންތިޚާބުވާ ސިޔާސީ ޕާޓީ ދޫކޮށް އެހެން ޕާޓީއަކަށް ބަދަލުވެެއްޖެނަމަ ގޮނޑި ގެއްލޭ އިސްލާހާއި، ރާއްޖޭގެ ކަނޑުގެ ސަރަހައްދަށް އުނިކަން ލިބޭފަދަ ކަމެއް ކުރެވޭނީ މަޖިލީހުގެ ރުހުން ލިބިގެންކަން ބަޔާންކޮށް ހުށައެޅި އިސްލާހާއި، މަޖިލީހުގެ ރުހުން ނެތި ބޭރުގެ ފަރާތަކަށް އަސްކަރީ ބޭނުމަށް ރާއްޖޭގެ އެއްވެސް ތަނެއްގައި ނުތިބެވޭގޮތަށް ހުށައެޅި އިސްލާހެވެ.

ޤާނޫނުއަސާސީއަށް ގެނައި މި އިސްލާހުތަކާ ބެހޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން ރައްޔިތުންގެ މަޖިލީހުގެ މަނަދޫ ދާއިރާގެ މެންބަރު ޙުސްނީ މުބާރަކް ވިދާޅުވީ މިއިސްލާހުން މަޖިލީހުގެ މެންބަރުންގެ ޒިންމާތަކަށް އުނިކަން އަންނާނެކަމަށް ބުނެ އިދިކޮޅުންކުރަނީ ދޮގު ތުހުމަތުތަކެއް ކަމަށެވެ.

ޙުސްނީ ވިދާޅުވީ ވަކި ޕާޓީއެއް ދައްކައިގެން މަޖިލީހުގެ މެންބަރުކަމަށް ހޮވެނީ އެޕާޓީގެ ސިޔާސަތުތައް ތަންފީޒްކުރުމަށް ޤާނޫނު ހަދާ މަޖިލީހުގައި އެއްބާރުލުން ދިނުމަށް ކަމަށެވެ. އަދި ކޮންމެ ކެންޑިޑޭޓަކުވެސް އިސްތިހާރުކުރަނީ ނިސްބަތްވާ ޕާޓީގެ ސިޔާސަތުތައް ކަމަށާއި ރައްޔިތުން އެ ކެންޑިޑޭޓަކު ހޮވަނީ ޕާޓީގެ ސިޔާސަތުތައް ތަންފީޒްކުރާނެކަމުގެ އުންމީދުގައި ކަމަށެވެ. އެހެންކަމުން އިންތިޚާބުވުމަށްފަހު ކުއްލިއަކަށް ޕާޓީ ބަދަލުކޮށް، ޤަބޫލުކުރާ ސިޔާސަތުތަކާ ދެކޮޅަށް މަސައްކަތްކުރުމަކީ ރައްޔިތުން ކުރި އިތުބާރަށް ބޭއިންސާފުވުންކަން މެންބަރު ފާހަގަކުރެއްވިއެވެ.

މެންބަރު ހުސްނީ ވިދާޅުވީ އައު އިސްލާހުގެ ސަބަބުން ރައްޔިތުންކުރި އިތުބާރަށް ބޭއިންސާފުވުމުގެ އެއްވެސް ޖާގައެއް މިހާރު ނޯންނާނެކަމަށާއި މިއިސްލާހުން މަޖިލީހުގެ މެންބަރުންގެ މައްޗަށް ރައްޔިތުންކުރާ އިތުބާރު ޔަޤީންކޮށްދީފައިވާ ކަމަށެވެ.

އަދި އައު އިސްލާހުގައި ރާއްޖޭގެ ކަނޑުގެ ސަރަހައްދުގެ ސަލާމަތާއި ރައްކާތެރިކަން އިތުރަށް ކަށަވަރުކޮށްދީފިކަމަށްވެސް ޙުސްނީ މުބާރަކް ވިދާޅުވިއެވެ. އެގޮތުން ކަނޑުގެ ސަރަހައްދަށް އެއްވެސް ބަދަލެއް ނުވަތަ އުނިކަމެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައި މެންބަރުންގެ އަޤުލަބިއްޔަތުންކަމަށް މިހާރު ޤާނޫނުއަސާސީގައި ބަޔާންކޮށްފައިވާކަމަށް މެންބަރު ވިދާޅުވިއެވެ.

"ރާއްޖޭގެ މިނިވަންކަމާއި ސިޔާދަތަށް އަސަރުކުރާ އިސްލާހެއް ނޫން މިއީ. މަޖިލީހުގެ ޖުމްލަ މެންބަރުންގެ ހަތަރު ބައިކުޅަ ތިންބައި މެންބަރުންގެ އަޤުލަބިއްޔަތުން ރާއްޖޭގެ ކަނޑުގެ ސަރަހައްދަށް ބަދަލެއް މިގެނެވެނީ. ރާއްޖޭގެ މިނިވަންކަމަށް، ރާއްޖޭގެ ސަރަހައްދާ ގުޅޭގޮތުން އިތުރު ރައްކާތެރިކަމެއް ގެނައީ. މި އިސްލާޙު ފާސްކުރީ އެމްޑީޕީގެ މެންބަރުންގެވެސް ވޯޓާއެކު." ޙުސްނީ ވިދާޅުވިއެވެ.

ޙުސްނީ މުބާރަކް ވިދާޅުވީ ޤާނޫނުއަސާސީއަށް ގެނައި އިސްލާހުތަކަކީ ދިވެހިރާއްޖޭގެ ސިޔާސީ ހަމަޖެހުމަށްވެސް ވަރަށް މުހިންމު އިސްލާހުތަކެއް ކަމަށެވެ. އެގޮތުން މީގެ ކުރިން މަޖިލީހުގެ މެންބަރުން ގަނެގެން އެހެން ޕާޓީތަކަށް ބަދަލުކޮށް، މަޖިލީހުގެ މަސްލަހަތު ނަގާލާފައިހުރިކަން ޙުސްނީ ފާހަގަކުރެއްވިއެވެ. އަދި އެއީ މެންބަރުންގެ ނަޒާހަތްތެރިކަމާމެދު ސުވާލު އުފެދޭކަމެއް ކަމަށާއި އެހެންކަމުން އައު އިސްލާހުން މެންބަރުންގެ ނަޒާހާތްތެރިކަން ކަށަވަރުކުރެވޭނެކަމަށް މެންބަރު ވިދާޅުވިއެވެ.

"ފުރަތަމަ މަޖިލީހާ ހިސާބުން ފެށިގެން މެންބަރުންގެ ޓްރާންސްފަރ މާކެޓެއް ވަނީ އުފެދިފައި. ވޯޓު ހޯދަން ދިޔައީމަ ފުރަތަމަ ސުވާލަކީ ޕާޓީގައި ދެމި ހުންނާނަންތޯ. އެއީ ރައްޔިތުން ބޭނުންވޭ ޔަޤީންކަން ޕާޓީގައި ހުންނާނެކަމުގެ. ނަމަވެސް މިހާރު ނާޖާއިޒު މަންފާއެއް ހޯދުމަށް މެންބަރުން ޕާޓީ ބަދަލުކުރުމާއި އެމީހުންގެ ނަޒާހަތްތެރިކަމާމެދު ސުވާލު އުފެއްދޭނެ އެއްވެސް ޖާގައެއް ނެތް." ޙުސްނީ ވިދާޅުވިއެވެ.

ރާއްޖެ މިއަދު ޕްރޮގުރާމްގައި ވާހަކަދައްކަވަމުން 18 ވަނަ ރައްޔިތުންގެ މަޖިލީހު ޕީޖީ ލީޑަރު އަދި ވިލިމާލޭ ދާއިރާގެ ކުރީގެ ޕީޕީއެމް މެންބަރު އަޙްމަދު ނިހާން ޙުސައިން މަނިކު ވިދާޅުވީ މީގެ ކުރިން މެންބަރުން ޕާޓީ ބަދަލުކޮށްފައި ހުރުމުން ސަރުކާރުތައް ހިންގުމުގައި ދަތިތައް ދިމާވެފައިހުރި ކަމަށެވެ. އަދި ޕީޕީއެމްގެ މެޖޯރިޓީ އޮތް 18 ވަނަ މަޖިލީހުން އެންޓި ޑިފެކްޝަންގެ ޤާނޫނެއް ވުޖޫދުކުރީ އެހެންވެގެންކަމަށް ނިހާން ވިދާޅުވިއެވެ.

ނިހާން ވިދާޅުވީ އެއް ދުވަހުން ޕާޓީ ބަދަލުކޮށްފިނަމަ ގޮނޑި ގެއްލޭގޮތަށް ޤާނޫނުއަސާސީ އިސްލާހުކޮށްފައިވަނީ ކަމުގެ މުހިންމުކަމުން ކަމަށާއި މީގެ ކުރިންވެސް މިގޮތަށް ޤާނޫނުއަސާސީ އިސްލާހުކޮށްފައި އެބަހުރި ކަމަށެވެ.

"ޕީއެންސީގެ މެޖޯރިޓީ އޮތް މަޖިލީހުން ރައްޔިތުން ހޮވީ ރައީސް ޑރ. މުޙައްމަދު މުޢިއްޒުގެ ސިޔާސަތުތައް ތަންފީޒުކުރަން އިތުބާރާއެކީ. ޕާޓީ ބަދަލުކޮށް މަޖިލިސް ހަލަބޮލިވާން ފައްޓައިފިނަމަ ދައުލަތުގެ ސްޓެބިލިޓީ ގެއްލޭނެ. މަޝްރޫޢުތައް މަޑުޖެހެމުން އަންނާނީ. މީގެ ގެއްލުންވާނީ ރައްޔިތުންނަށް" ނިހާން ވިދާޅުވިއެވެ.

ޤާނޫނުއަސާސީއަށް ގެނައި އިސްލާހުތައް ރޭގެ ވަގުތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ތަޞްދީޤުކުރައްވާފައެވެ. އަދި ދިވެހި ސަރުކާރުގެ ގެޒެޓުގައި ޝާއިޢުކުރެވުމާއެކު މި އިސްލާހުތަކަށް މިހާރު ވަނީ ޢަމަލުކުރަން ފަށާފައެވެ.