މޯލްޑިވްސް ޓޫރިޒަމް އެވޯޑަށް ނަން ހުށަހެޅުމުގެ މުއްދަތު އިތުރުކޮށްފި

މޯލްޑިވްސް ޓޫރިޒަމް އެވޯޑަށް ނަން ހުށަހެޅުމުގެ މުއްދަތު އިތުރުކޮށްފިއެވެ. ކުރިން އެވޯޑަށް ނަން ހުށަހެޅުމުގެ ފުުރުސަތު ހުޅުވާލީ މި މަހުގެ 11 ވަނަ ދުވަހާއި ހަަމައަށެވެ.

ފަތުރުވެރިކަމާއި ބެހޭ ވުޒާރާއިން ވިދާޅުވީ މޯލްޑިވްސް ޓޫރިޒަމް އެވޯޑަށް ނަން ހުށަހެޅުމުގެ މުއްދަތު މި މަހުގެ 28 ވަނަ ދުވަހާ ހަމައަށް އިތުރުކޮށްފައިވާ ކަމަށެވެ.

އެވޯޑަށް ކުރިމަތިލުމަށް ހުޅުވާލާފައިވަނީ ރިސޯޓުތަކާއި، ހޮޓާތަކާއި، ގެސްޓުހައުސްތަކާއި، ސަފާރީތަކާއި، ޓްރެވެލް އެޖެންސީތަކަށެވެ. އެގޮތުން 5 ކެޓަގަރީއަކުން 23 އެވޯޑެއް ދިނުމަށް ފަތުރުވެރިކަމާއި ބެހޭ ވުޒާރާއިން ވަނީ ނިންމާފައެވެ.

އެވޯޑަށް އެޕްލިކޭޝަން ހުށަހަޅަން ޖެހެނީ އޮންލައިންކޮށެވެ. އެވޯޑު ދިނުމުގައި ބަލާނީ 1 ޖޫން 2023 އިން 31 މޭ 2024ގެ ނިޔަލަށްކޮށްފައިވާ މަސައްކަތްތަކަށް ކަމަށް ފަތުރުވެރިކަމާ ބެހޭ ވުޒާރާއިން ވިދާޅުވެއެވެ.

މިދިޔަ އަހަރު 5 ދާއިރާއަކުން 59 އެވޯޑަކަށް ފަތުރުވެރިކަމާއި ބެހޭ ވުޒާރާއިން ހުޅުވާލިއެވެ. އަދި އެފުރުސަތުގައި އެކި ކެޓަގަރީތަކުން 88 ފަރާތުން 225 އެޕްލިކޭޝަން ލިބުނެވެ. އޭގެތެރެއިން 31 ފަރާތަކަށްވަނީ އެވޯޑު ދީފައެވެ.

މޯލްޑިވްސް ޓޫރިޒަމް އެވޯޑް ދިނުމުގެ މައިގަނޑު މަޤްސަދަކީ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކާއި ކުންފުނިތަކުގެ އަގުވަޒަންކުރުމެވެ.