ފްރެންޗް ލީގުގައި ރޭ އަމިއްލަ ދަނޑުގައި ޓުލޫޒް އަތުން 0-3 އިން މޮޅުވެ، ޕީއެސްޖީން ހަ ޕޮއިންޓްގެ ލީޑް ދެމެހެއްޓިއިރު، ބްރެސްޓް އަތުން 2-3 އިން މޮނާކޯ މޮޅުވެއްޖެއެވެ.
މި ނަތީޖާއާއެކު ޕީއެސްޖީ އެއްވަނައިގައި އޮތީ 12 މެޗުން 32 ޕޮއިންޓް ހަމަކޮށްގެންނެވެ. ދެވަނައިގައި އޮތް މޮނާކޯ އަށް 12 މެޗުން ލިބިފައިވަނީ 26 ޕޮއިންޓެވެ. ތިނެއްގައި އޮތް އޮލިމްޕިކް މާސޭ އަށް އެއްމެޗު މަދުން ކުޅެގެން 20 ޕޮއިންޓް ލިބިފައިވާއިރު، އޭގެ އެއްޕޮއިންޓް ފަހަތުން ހަތަރުވަނައިގައި އޮތީ ލިއްލެ އެވެ.
އެންމެ ފަހުގެ ލީގު ޗެމްޕިއަން، ޕީއެސްޖީން ރޭގެ މެޗުގައި ފަށައިގެން ރަނގަޅު ކުޅުމެއްދެއްކިނަމަވެސް، ޓުލޫޒްގެ ގޯލު ފޫއަޅުވާލަން ކުރި މަސައްކަތް ކާމިޔާބުވާގޮތްވީ ފުރަތަމަ ހާފުގެ ކުޅުން ނިމެން 10 މިނެޓަށްވެފައިވަނިކޮށެވެ. މެޗުގެ 35 ވަނަ މިނެޓުގައި ޕީއެސްޖީ އަށް މި ލަނޑުޖަހައިދިނީ ޕޯޗުގަލްގެ ޒުވާން މިޑްފީލްޑަރު، ޔާއޯ ނެވޭސް އެވެ. އެއްފަހަރުން ފޮނުވާލި ހަމަލާއަކުން ނެވޭސް މި ލަނޑުޖެހީ އެ ޓީމުގެ މޮރޮކޯ ޑިފެންޑަރު، އަޝްރަފް ހަކީމީ ނަގައިދިން ހުރަހެއްގެ އެހީގައެވެ.
އޭގެފަހުން، ދެވަނަ ހާފުގެ ކުރީކޮޅު ޕީއެސްޖީގެ ފްރާންސް މިޑްފީލްޑަރު، ވަރެން ޒަޔަރް-އެމެރީ ގޯލެއް ކާމިޔާބުކުރިނަމަވެސް، ވީއޭއާރް އިން ބެލުމަށްފަހު އޮފްސައިޑް ކަމަށް ނިންމައި، ރެފްރީ އެ ލަނޑު ގަބޫލެއްނުކުރިއެވެ.
މެޗުގެ 69 ވަނަ މިނެޓުގައި ޓުލޫޒް އަށް ނަތީޖާ އެއްވަރުކޮށްދޭން ލިބުނު އެންމެ ރަނގަޅު ފުރުޞަތުގައި އެ ޓީމުގެ ޒަކަރިއްޔާ އަބޫޚްލާލް ފޮނުވާލަން މަސައްކަތްކުރި ބޯޅަ ހުއްޓުވީ ޕީއެސްޖީގެ ޕޯޗުގީޒް މިޑްފީލްޑަރު، ވިޓީނިއާގެ ޓެކުލަކުންނެވެ. އޭގެ މިނެޓެއްފަހުން، ޝަވީ ބަބިކާ ގޯލާއި ކައިރިން ފޮނުވާލި ބޯޅަ ދިޔައީ މާމަތިންނެވެ.
މެޗު ނިމެން ހަ މިނެޓަށްވެފައިވަނިކޮށް، ޕީއެސްޖީގެ ދެވަނަ ލަނޑުޖަހައިދިނީ ލޫކަސް ބެރަލްޑޯ އެވެ. މިއީ ޓުލޫޒްގެ ކުޅުންތެރިން އަތުން ގެއްލުނު ބޯޅައެއް ހޯދައި، ގޯލަށް އަމާޒުކޮށް ފޮނުވާލި ބާރު ހަމަލާއަކުން ބެރަލްޑޯ ކާމިޔާބުކުރި ގޯލެކެވެ.
އަދި އޭގެފަހުން، މެޗުގެ އިތުރުވަގުތުގެ ފުރަތަމަ މިނެޓުގައި ޕީއެސްޖީގެ ތިންވަނަ ލަނޑުޖަހައިދިނީ ވިޓީނިއާ އެވެ. މިއީ އަވަސް ކައުންޓަރއެޓޭކެއްގައި އެ ޓީމުގެ ފްރާންސް ފޯވާޑް، ރަންޑަލް ކޯލޯ މުއާނީ ދިން ބޯޅައަކުން ވިޓީނިއާ ކާމިޔާބުކުރި ރީތި ގޯލެކެވެ. މި ދެ ކުޅުންތެރިންވެސް ކުޅެން ނިކުތީ ފަހު ހާފުގައެވެ.
ލީގުގައި ރޭ ކުޅުނު އަނެއް މެޗުގައި މޮނާކޯގެ ދަނޑުގައި ބްރެސްޓް އަތުން އެ ޓީމު މޮޅުވިއިރު، ފްރާންސްގެ 23 އަހަރުން ދަށުގެ ޓީމުގެ ވިންގް، މަގްނެސް އަކްލިއޫޝް ދެ ލަނޑުޖެހިއެވެ. މޮނާކޯގެ އަނެއް ލަނޑުޖަހައިދިނީ ރަޝިއާގެ މިޑްފީލްޑަރު، އަލެކްސެންޑާ ގޮލޮވިން އެވެ. ބްރެސްޓްގެ ލަނޑުތައް ޖަހައިދިނީ އަބްދުﷲ ސިމާ އާއި ލުޑޮވިކް އަޔޯކޭ އެވެ.