މިފަހަރުގެ ޔުއެފާ ނޭޝަންސް ލީގުގެ ކުއާޓާ ފައިނަލްގެ ގުރުއަތުލުން އިއްޔެ ބޭއްވިއިރު، އެންމެ ފަހުގެ ޗެމްޕިއަން، ސްޕެއިނާ ނެދަލެންޑްސް ބައްދަލުކުރަންޖެހޭއިރު، ޖަރުމަނާ އިޓަލީ ކުރިމަތިލާންޖެހިއްޖެއެވެ.
ނޭޝަންސް ލީގުގެ ކުރީގެ ޗެމްޕިއަނެއް ކަމަށްވާ، ފްރާންސުން ކްރޮއޭޝިއާ އާ ދެކޮޅަށް ނިކުންނައިރު، އެ މުބާރާތް އެންމެ ފުރަތަމަ ކާމިޔާބުކުރި ޕޯޗުގަލް ނިކުންނާނީ ޑެންމާކާ ދެކޮޅަށެވެ.
މި މުބާރާތުގެ ކުއާޓާ ފައިނަލްގެ މެޗުތައް އަންނަ އަހަރުގެ މާރިޗު މަހުގެ ތެރޭގައި ދެލެގަށް ބަހާލައިގެން ކުޅުމަށް ހަމަޖެހިފައިވާއިރު، ސެމީ ފައިނަލް މެޗުތަކަކީ ޖޫން މަހުގައި އެއްލެގުގެ މައްޗަށް ކުޅޭ މެޗުތަކެކެވެ. އަދި ތިންވަނަ ހޮވާ މެޗާއި، ފައިނަލް މެޗު ކުޅޭނީ ސެމީގެ މެޗުތައް ކުޅޭތާ އެއްދުވަސް ފަހުންނެވެ.
މި ފަހަރުގެ މުބާރާތުގެ ނޮކްއައުޓް ބުރުގެ ގުރުއަތުލުމާ ކުރިމަތިލިއިރު ޔޫރަޕްގެ ޗެމްޕިއަން، ސްޕެއިނާއި ޕޯޗުގަލް އަދި ޖަރުމަނުން މެޗަކުން ބަލިނުވެ އެއްވަނަ ޓީމުގެ ގޮތުގައި އެގްރޫޕްތަކުން އަނެއްބުރަށް ދަތުރުކުރިއިރު، ސީޑް ކުރެވުނު އަނެއް ޓީމަކީ ފްރާންސެވެ.
ނޭޝަންސް ލީގުގެ ކުރީގެ އެޑިޝަންގައި، ކޮންމެ ގްރޫޕަކުން އެންމެ މަތީގައި އޮތް ޓީމެއް އެކަނި ނޮކްއައުޓް ސްޓޭޖަށް ކޮލިފައިވެ، ސީދާ ސެމީ ފައިނަލަށް ދިޔައެވެ. އެކަމަކު، މި ފަހަރުގެ މުބާރާތުގައި ކޮންމެ ގްރޫޕަކުން ދެ ޓީމެއް ކުއާޓާ އަށް ދަތުރުކުރާގޮތަށް ބަދަލު ގެނެވުނެވެ.
ނޭޝަންސް ލީގުގެ ނޮކްއައުޓް މެޗުތަކުގެ ތާވަލު:
ކުއާޓާ ފައިނަލް 1: ނެދަލޭންޑްސް - ސްޕެއިން
ކުއާޓާ ފައިނަލް 2: ކްރޮއޭޝިއާ - ފްރާންސް
ކުއާޓާ ފައިނަލް 3: ޑެންމާކް - ޕޯޗުގަލް
ކުއާޓާ ފައިނަލް 4: އިޓަލީ - ޖަރުމަނުވިލާތް
ސެމީ ފައިނަލް 1: ކުއާޓާ ފައިނަލް ހަތަރުވަނަ މެޗުން މޮޅުވާ ޓީމު - ކުއާޓާ ފައިނަލް ތިންވަނަ މެޗުން މޮޅުވާ ޓީމު
ސެމީ ފައިނަލް 2: ކުއާޓާ ފައިނަލް އެއްވަނަ މެޗުން މޮޅުވާ ޓީމު - ކުއާޓާ ފައިނަލް ދެވަނަ މެޗުން މޮޅުވާ ޓީމު