އިނގިރޭސި ޕްރިމިއަރ ލީގުގައި މިއަދު ހަވީރު ރަށުން ބޭރުގައި ލެސްޓާ ސިޓީ އަތުން 1-2 ގެ ނަތީޖާއަކުން ޗެލްސީ މޮޅުވެއްޖެއެވެ.
މިއީ ޗެލްސީގެ ކޯޗު، އެންޒޯ މަރެސްކާ، އޭނާގެ ކުރީގެ ޓީމާ ދެކޮޅަށް ކުޅުނު ފުރަތަމަ މެޗެވެ. އަދި މިއީ މިދިޔަ އޮކްޓޫބަރު މަހުގެ ތެރޭގައި ނިއުކާސަލް ޔުނައިޓެޑް އަތުން މޮޅުވިފަހުން ޗެލްސީ މޮޅުވި ފުރަތަމަ މެޗެވެ. އެ ޓީމު އެންމެ ފަހުން ކުޅުނު ދެ މެޗުގައި އާސެނަލް އާއި މެންޗެސްޓާ ޔުނައިޓެޑާ ވަނީ އެއްވަރުވެފައެވެ.
މި ނަތީޖާއާއެކު ޗެލްސީ އަދިވެސް އޮތީ ތާވަލްގެ ތިންވަނައިގައެވެ. އެ ޓީމާއި އެންމެ ކުރީގައި އުޅޭ ލިވަޕޫލާ ދެމެދު ހަ ޕޮއިންޓްގެ ފަރަގެއް އެބައޮތެވެ. ލިވަޕޫލް އެއްވަނައިގައި އޮތީ 11 މެޗުން 28 ޕޮއިންޓް ހޯދައިގެންނެވެ. ދެވަނައިގައި އޮތް މެންޗެސްޓާ ސިޓީ އަށް 11 މެޗުން ލިބިފައިވަނީ 23 ޕޮއިންޓެވެ. އޭގެ އެއްޕޮއިންޓް ފަހަތުން ތިނެއްގައި ޗެލްސީ އޮތްއިރު، ހަމަ މިއަދަދަށް ޕޮއިންޓް ލިބިގެން ޖެހިގޯލްގެ ތަފާތުން ހަތަރުވަނައިގައި އޮތީ އާސެނަލެވެ.
ކިންގޕަވާ ސްޓޭޑިއަމްގައި ކުޅުނު މި މެޗު ފެށިގެން ޗެލްސީން ޑޮމިނޭޓްކޮށްފައިވާއިރު، 15 ވަނަ މިނެޓުގައި އެ ޓީމުން ލީޑްނެގީ ނިކޮލަސް ޖެކްސަން ކާމިޔާބުކުރި ގޯލުންނެވެ. މިއީ އެ ޓީމުގެ ކެޕްޓަން، އެންޒޯ ފެނާންޑޭޒް ދިން ބޯޅައަކުން ޖެކްސަން ކާމިޔާބުކުރި ގޯލެކެވެ.
މެޗުގެ 29 ވަނަ މިނެޓުގައި ޗެލްސީގެ ލީޑް ފުޅާކޮށްދޭން ނޮނީ މަޑުއޭކޭ ލިބުނު ފުރުޞަތެއްގައި ފޮނުވާލި ބޯޅަ ލެސްޓާގެ ގޯލްކީޕަރު، މެޑްސް ހާމެންސަން މަތަކުރިއިރު، އޭގެ ތިން މިނެޓުފަހުން މާކް ކުކުރޭޔާ ނަގައިދިން ހުރަހަކުން މަޑުއޭކޭ ގޯލެއް ކާމިޔާބުކޮށްދިން ނަމަވެސް، އޮފްސައިޑް ކަމަށް ނިންމާ ރެފްރީ އެ ލަނޑު ގަބޫލެއްނުކުރިއެވެ.
ދެވަނަ ހާފުގެ ކުރީކޮޅު، ޗެލްސީގެ އިނގިރޭސި މިޑްފީލްޑަރު، ކޯލް ޕާމާ ފޮނުވާލި ހަމަލާ ގޯލަށް ވަންނަން ދަނިކޮށް މަޑުއޭކޭގެ ގައިގަ ޖެހިފައި ބޯޅައިގެ މިސްރާބު ވަނީ ބަދަލުވެފައެވެ.
މި މެޗުގައި ޗެލްސީން ޖެހި ދެވަނަ ލަނޑު، 75 ވަނަ މިނެޓުގައި ކާމިޔާބުކޮށްދިނީ އެންޒޯ ފެނާންޑޭޒް އެވެ. މިއީ ޖެކްސަން ބޮލުން ފޮނުވާލި ބޯޅައެއް ލެސްޓާގެ ގޯލްކީޕަރު، މެޑްސް ހާމެންސަން މަތަކުރުމުން ދެވަނަ ފަހަރަށް އެ ބޯޅަ އެންޒޯ ބޮލުން ފޮނުވާލައިގެން ކާމިޔާބުކުރި ގޯލެކެވެ.
މިއީ މިދިޔަ ފެބުރުއަރީ މަހުގައި ކްރިސްޓަލް ޕެލަސް ކޮޅަށް ލަނޑުޖެހި ފަހުން ޗެލްސީ އަށް އޭނާ ޖަހައިދިން ފުރަތަމަ ގޯލެވެ.
ލެސްޓާގެ ހަމައެކަނި ލަނޑު، މެޗުގެ އިތުރުވަގުތުގެ ފަސްވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ޖޯޑަން އަޔޫ އެވެ. މިއީ ޕެނަލްޓީއޭރިޔާ ތެރެއިން ލެސްޓާގެ ބޮބީ ޑެ ކޯޑޮވާ-ރީޑް އަށް ޗެލްސީގެ ރޮމިއޯ ލާވިއާ ކުރި ފައުލަކަށް ރެފްރީ ދިން ޕެނަލްޓީއެކެވެ.
ލީގުގައި ޗެލްސީ އަށް ދެން އޮތީ އަންނަ ޑިސެންބަރު މަހުގެ އެއްވަނަ ދުވަހު އަމިއްލަ ދަނޑުގައި އެސްޓަން ވިލާއާ ދެކޮޅަށް ކުޅެން ޖެހޭ މެޗެވެ. އޭގެކުރީން، މި މަހުގެ 28 ވަނަ ދުވަހު ޔުއެފާ ކޮންފަރެންސް ލީގުގައި ރަށުން ބޭރުގައި އެ ޓީމުން ނިކުންނާނީ ޖަރުމަނުގެ އެފްސީ ހެއިންޑެންހައިމްއާ ދެކޮޅަށެވެ.