އިޓާލިއަން ލީގުގައި ރޭ ކުޅުނު މެޗުގައި ރަށުން ބޭރުގައި ޕާމާ އަތުން 1-3 ގެ ނަތީޖާއަކުން މޮޅުވެ އެޓަލާންޓާ ތާވަލުގެ އެއްވަނައަށް ޖެހިލިއިރު، ހެލާސް ވެރޯނާގެ ދަނޑުގައި 0-5 ގެ ތަފާތު ބޮޑު ނަތީޖާއަކުން އިންޓަރ މިލާން މޮޅުވެއްޖެއެވެ.
ރޭގެ ނަތީޖާއާއެކު އެއްވަނައިގައި އުޅޭ އެޓަލާންޓާ އަށް ވަނީ 13 މެޗުން 28 ޕޮއިންޓް ލިބިފައެވެ. ހަމަ މިއަދަދަށް ޕޮއިންޓް ލިބިގެން ފައިދާގޯލްގެ ތަފާތުން ދެވަނައިގައި އިންޓަ އޮތްއިރު، އެއްމެޗު މަދުން ކުޅެގެން 26 ޕޮއިންޓާއެކު ތިނެއްގައި އޮތީ ނާޕޮލީ އެވެ. ހަތަރުވަނައިގައި އޮތް ފިއޮރެންޓީނާ އަށް ވެސް މިއަދަދަށް ޕޮއިންޓް ލިބިފައިވާއިރު، ނާޕޮލީ އަށް ކުރިލިބެނީ ގޯލްގެތަފާތުންނެވެ.
ޕާމާގެ ދަނޑުގައި ކުޅުނު މި މެޗު ފެށިގެން ހަތަރުވަނަ މިނެޓުގައި ކުރީން ލީޑްނެގީ އެޓަލާންޓާ އިންނެވެ. ރައޫލް ބެލަނޯވާ ނަގައިދިން ހުރަހަކުން މި ލަނޑުޖަހައިދިނީ މަޓެއޯ ރެޓޭގީ އެވެ. މިއީ މި ފަހަރުގެ ސީޒަނުގެ ލީގުގައި ރެޓޭގީ ޖެހި 12 ވަނަ ގޯލެވެ. ލީގުގެ ލަނޑުލިސްޓުގެ އެންމެ ކުރީގަ އުޅެނީ ވެސް އޭނާ އެވެ.
އޭގެ ފަސް މިނެޓުފަހުން، އެޓަލާންޓާގެ ނައިޖީރިއާ ވިންގް، އަޑެމޯލާ ލުކްމަން ގޯލެއް ކާމިޔާބުކުރިނަމަވެސް، ވީއޭއާރް އިން ބެލުމަށްފަހު އޮފްސައިޑް ކަމަށް ނިންމާ، ރެފްރީ އެ ލަނޑު ގަބޫލެއްނުކުރިއެވެ.
ފުރަތަމަ ހާފު ނިމުމުގެކުރީން، އެޓަލާންޓާގެ ދެވަނަ ލަނޑުޖަހައިދިނީ ބްރެޒިލްގެ ޑިފެންސިވް މިޑްފީލްޑަރު، އެޑާސަން އެވެ. މެޗުގެ 39 ވަނަ މިނެޓުގައި އޭނާ މި ލަނޑުޖެހީ މަޓެއޯ ރުގޭރީ ދިން ބޯޅައަކުންނެވެ. މި ހާފު ނިމުނީ 2-0 އިން އެޓަލާންޓާ ކުރީގަ އޮވެގެންނެވެ.
މެޗުގެ ދެވަނަ ދެވަނަ ހާފުގެ ކުޅުން ފެށިތާ ހަތަރުވަނަ މިނެޓުގައި ޕާމާ އިން ވަނީ ފަރަގުކުޑަކޮށްފައެވެ. ރުމޭނިއާގެ ވިންގް، ވަލެންޓިން މިހާއިލާ ދިން ބޯޅައަކުން މި ލަނޑު އެ ޓީމަށް ޖަހައިދިނީ މަޓެއޯ ކަންސެލިއެރީ އެވެ.
އެޓަލާންޓާ އަށް އަލުން ދެލަނޑުގެ ލީޑް ދަމަހައްޓައިދިނީ ލުކްމަން އެވެ. މެޗު ނިމެން 15 މިނެޓަށްވެފައިވަނިކޮށް ލުކްމަން މި ލަނޑުޖަހައިދިނީ ހުއާން ކުއަޑްރާޑޯ ނަގައިދިން ހުރަހަކުންނެވެ. މިއީ މި ފަހަރުގެ ލީގުގައި ލުކްމަން ކުޅުނު 10 މެޗުގައި ޖެހި ހަތްވަނަ ލަނޑެވެ. މީގެތެރެއިން، ނުވަ މެޗުގައި އޭނާ ވަނީ އެޓަލާންޓާގެ ފުރަތަމަ އެގާރައިގައި ހިމެނިގެން ކުޅެފައެވެ.
ލީގުގައި ރޭ ކުޅުނު އަނެއް މެޗުގައި ވެރޯނާގެ ދަނޑުގައި 0-5 އިން އިންޓަ މޮޅުވިއިރު، އެ ޓީމުގެ ހުރިހާ ލަނޑެއްވެސް ޖެހީ ފުރަތަމަ ހާފުގައެވެ. މީގެތެރެއިން، އެ ޓީމުގެ ދެ ލަނޑުޖަހައިދިނީ ފްރާންސްގެ ފޯވާޑް، މާކަސް ތުރާމް އެވެ. އެ ޓީމުގެ އަނެއް ލަނޑުތައް ޖަހައިދިނީ ވަކީން ކޮރެއާ، ސްޓެފަން ޑެ ވްރައި، ޔަން ބިސެކް އެވެ.