ރާއްޖޭން ތައިލެންޑަށް ކަނޑައަޅާ ސަފީރަކަށް ފުވާދު އައްޔަން ކުރަން މަޖިލީހަށް ފޮނުވައިފި

ދިވެހިރާއްޖޭން ތައިލެންޑަށް ކަނޑައަޅުއްވާ ސަފީރުގެ މަގާމަށް އިލެކްޝަންސް ކޮމިޝަނުގެ ކުރީގެ ރައީސް ފުވާދު ތައުފީގު އައްޔަން ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ހުށަހަޅުއްވައިފިއެވެ.

ތައިލެންޑަށް ކަނޑައަޅުއްވާ ސަފީރުގެ މަގާމަށް ފުވާދު އައްޔަން ކުރެއްވުމަށް ހުށަހަޅުއްވާފައިވަނީ އިލެކްޝަންސް ކޮމިޝަނުގެ މެންބަރުކަމުގެ މުއްދަތު ހަމަވެފައިވަނިކޮށެވެ. މި މައްސަލަ ޚާރިޖީ ގުޅުންތަކުގެ ކޮމިޓީއަށް ވަނީ ފޮނުވާފައެވެ.

ފުވާދު ތައުފީޤު އެންމެ ފުރަތަމަ އިލެކްޝަންސް ކޮމިޝަނާ ގުޅިވަޑައިގަތީ 2008 ވަނަ އަހަރު، ކޮމިޝަންގެ މެންބަރެއްގެ ގޮތުގައެވެ. އެއް އަހަރު ދުވަހު ކޮމިޝަންގެ މެންބަރުކަމުގެ މަޤާމު ފުރުއްވުމަށްފަހު، 2009 ވަނަ އަހަރު ކޮމިޝަންގެ ރައީސްކަމަށް ފުވާދު އައްޔަންކުރެވުނެވެ.

2009 ވަނަ އަހަރުން ފެށިގެން 2014 ވަނަ އަހަރުގެ މާރިޗު މަހާ ހަމައަށް ކޮމިޝަންގެ ރައީސްކަމުގެ މަޤާމު ފުވާދު ފުރުއްވުމަށްފަހު ފުވާދު އިލެކްޝަންސް ކޮމިޝަނުން ވަކިވެވަޑައިގެންނެވިއެވެ. އަދި ދެވަނަ ފަހަރަށް އެ ކޮމިޝަނާ ގުޅިވަޑައިގެންނެވީ 2019ވަނަ އަހަރުއެވެ.

ފުވާދު ވަނީ އިލެކްޝަންސް ކޮމިޝަނުގެ ރައީސްގެ މަގާމުގައި ހުންނަވައިގެން ކާމިޔާބު މަސައްކަތްތަކެއް ކުރައްވާފައެވެ.

ފޮރިން ސާވިސް ޤާނޫނުގެ ދަށުން ރާއްޖޭން ބޭރު ޤައުމުތަކަށް ސަފީރުން އައްޔަން ކުރައްވަނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާއެވެ.