އިޓާލިއަން ލީގުގައި ރޭ ކުޅުނު މެޗުގައި ރޮމެލޫ ލުކާކޫ ކާމިޔާބުކުރި ލަނޑުން އޭނާގެ ކުރީގެ ޓީމު ކަމަށްވާ އޭއެސް ރޯމާ 0-1 ގެ ނަތީޖާއަކުން ބަލިކޮށް، ނާޕޮލީ އަލުން އެއްވަނައަށް ޖެހިލައިފިއެވެ.
މި ނަތީޖާއާއެކު ނާޕޮލީ އެއްވަނައިގައި އޮތީ 13 މެޗުން 29 ޕޮއިންޓް ހަމަކޮށްގެންނެވެ. އޭގެ އެއްޕޮއިންޓް ފަހަތުން ދެވަނައިގައި އެޓަލާންޓާ އޮތްއިރު، އެ އަދަދަށް ޕޮއިންޓް ލިބިގެން ތިނެއްގައި އިންޓަ މިލާން އޮތީ ފައިދާގޯލްގެ ތަފާތުންނެވެ. ހަމަ އެ އަދަދަށް ޕޮއިންޓް ލިބިގެން ޖެހިގޯލްގެ ތަފާތުން ހަތަރުވަނައިގައި އޮތީ ފިއޮރެންޓީނާ އެވެ.
ނާޕޮލީގެ ޑިއޭގޯ އާރްމަންޑޯ މަރަޑޯނާ ސްޓޭޑިއަމްގައި ރޭ ކުޅުނު މި މެޗުގައި ފެނިގެންދިޔަ ހަމައެކަނި ލަނޑު، 54 ވަނަ މިނެޓުގައި އެ ޓީމަށް ލުކާކޫ ކާމިޔާބުކޮށްދިނީ ޖިއޮވާނީ ޑި ލޮރެންޒޯ ނަގައިދިން ހުރަހެއްގެ އެހީގައެވެ. މިއީ މި ފަހަރުގެ ސީޒަނުގެ ލީގުގައި އޭނާ ކުޅުނު 10 މެޗުގައި ޖެހި ފަސްވަނަ ގޯލެވެ.
ރޯމާ އަށް އެއްވަރުކޮށްދޭން ލިބުނު ފުރުޞަތުގައި އެ ޓީމުގެ ޔުކްރޭން ފޯވާޑް، އާޓެމް ޑޮވްބީކް ފޮނުވާލި ބޯޅަ އަމާޒުވީ ގޯލްގެ ހުރަސްދަނޑިއަށެވެ.
މިއީ ރޯމާގެ އައު ކޯޗު، ކްލައުޑިއޯ ރަނިއޭރީ އެ ޓީމާ ހަވާލުވިފަހުން ކުޅުނު ފުރަތަމަ މެޗެވެ. އޭނާ އަކީ މި ފަހަރުގެ ސީޒަނުގައި އެ ޓީމުގެ ކޯޗުކަން ކުރާ ތިންވަނަ ކޯޗެވެ.
މި މެޗުން ބަލިވެ، ރޯމާ އޮތީ ތާވަލްގެ 12 ވަނައިގައެވެ. މިހާތަނަށް ކުޅުނު 13 މެޗުން އެ ޓީމަށް ލިބިފައިވަނީ 13 ޕޮއިންޓެވެ. މިއާއެކު، ރެލިގޭޝަން ޒޯނާ އެ ޓީމާ ދެމެދު އޮތީ އެންމެ ހަތަރު ޕޮއިންޓްގެ ފަރަގެކެވެ.
ލީގުގައި ރޭ ކުޅުނު އެހެން މެޗުތަކަށް ބަލާއިރު، ރަށުން ބޭރުގައި ކޯމޯ އަތުން ފިއޮރެންޓީނާ މޮޅުވީ 0-2 އިންނެވެ. ޓޮރީނޯގެ ދަނޑުގައި 1-1 އިން މޮންޒާއާ އެއްވަރުވިއިރު، ލާޒިއޯ ވަނީ ރަށުން ބޭރުގައި ބޮލޯނިއާ އަތުން 2-0 އިން މޮޅުވެފައެވެ.