މާލޭގެ ގެއަކަށް މީހަކު ވައްދައި ފޭރުނު 3 މީހުންގެ މައްޗަށް ކުށްސާބިތުވެ ޖަލަށްލުމަށް ހުކުމްކޮށްފި

މާލޭގެ ގެއަކަށް މީހަކު ވައްދައި ފޭރުނު މައްސަލައެއްގައި ހިމެނޭ 3 މީހުންގެ މައްޗަށް ކުށްސާބިތުވެ ޖަލަށްލުމަށް ހުކުމްކޮށްފިއެވެ.

ޕީޖީ އޮފީހުން މިމައްސަލައިގަ ދައުވާކުރީ މިދިޔަ ޖުލައި މަހުގެ 24 ވަނަ ދުވަހުގެ ވަގުތެއްގައި، މއ. މަސްފަން ގެއަށް ދިވެހި ފިރިހެނަކު ވައްދައި އޭނާއަށް ބިރުދައްކައި ފޭރުނު މައްސަލައިގައި ހައްޔަރުކޮށްފައިވާ 3 މީހެއްގެ މައްޗަށެވެ. މި މައްސަލައިގައި ހައްޔަރުކޮށްފައިވަނީ މއ. މަސްފަން، 43 އަހަރުގެ ޢާއިޝަތު އާއި މއ. މަސްފަން، އުމުރުން 27 އަހަރުގެ މުޙައްމަދު ރީހާން އަދި ސ. ހިތަދޫ، ސޯމާ، އުމުރުން 35 އަހަރުގެ ޝަފީޤު އިބްރާހީމެވެ.

މި މައްސަލައިގައި ތިން މީހުން ހައްޔަރުކުރީ ފިރިހެނަކު ގެއަށް ވައްދައި، އެމީހާއަށް ވަޅިން ބިރުދައްކައި ބަރަހާނަކޮށް، އަނިޔާކޮށް، އޭނާގެ މޯބައިލް ފޯނުއަތުލައި އޭނާގެ ބެންކު އެކައުންޓުން ފައިސާ ޓްރާންސްފަރކުރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމުން ފައިސާ ނަގާފައިވާ ކަމަށް ތުހުމަތުކުރެވޭތީއެވެ. މި މައްސަލައިގައި ތިން މީހުންގެ މައްޗަށް ތިން ދައުވާ އުފުލިއެވެ.

މި މައްސަލާގައި އުފުލާފައިވާ ދައުވާގެ ތެރެއިން އަނިޔާއެއް ދިނުމުގެ ކުށުގެ ދައުވާ ސާބިތުވެ 18 ދުވަހަށް ތިން މީހުން ޖަލަށް ލުމަށް އަދި އެނގިހުރެ ހުއްދަނޫން ގޮތުގައި މައުލޫމާތު ހޯދުމުގެ ކުށުގެ ދައުވާ ސާބިތުގެ 4 މަހާއި 24 ދުވަހަށް ޖަލަށްލުމަށް ކޯޓުން ވަނީ ހުކުމްކޮށްފައެވެ. އަދި އެތިން މީހުންގެ މައްޗަށް ދައުވާކޮށްފައިވާ ފޭރުމުގެ ކުށުގެ ދައުވާ ސާބިތުވެ 9 މަހާއި 18 ދުވަހަށް ތިން މީހުން ވެސް ޖަލަށްލުމަށް ވަނީ ހުކުމްކޮށްފައެވެ.

މި ހުކުމާއެކު ބަންދުގައި ހުރި މުއްދަތު ހުކުމުގެ މުއްދަތުން ކެނޑުމަށްފަހު ޢާއިޝަތު ތަންފީޒުކުރަންޖެހޭނީ 5 މަހާއި 24 ދުވަހުގެ ބަންދުގެ މުއްދަތެކެވެ. އަދި މުޙައްމަދު ރީޙާން 5 މަހާއި 23 ދުވަސް، ޝަފީޤު އިބްރާހިމް 8 މަހާއި 18 ދުވަހުގެ ޖަލު އަދަބު ތަންފީޒުކުރަންޖެހޭނެ ކަމަށް ކްރިމިނަލް ކޯޓުން ކުރި ހުކުމުގައި ވަނީ ބުނެފައެވެ.