"ސިޔާސަތުތައް ބައްޓަން ކުރަނީ އަމާން، ރައްކާތެރި، އެންމެ ޝާމިލުވާ އުފާވެރި މުޖުތަމަޢެއް ބިނާކުރަން"

ސަރުކާރުގެ އަމާޒަކީ އެންމެނަށް ބޭނުންވާ އަމާންކަމާއި، ރައްކާތެރިކަން ފޯރުކޮށްދީ، އެއްވެސް މީހަކު ބާކީނުކޮށް އުފާވެރި މުޖުތަމަޢެއް ބިނާކުރުންކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢައިޝަތު ޝިހާމް ވިދާޅުވެއްޖެއެވެ.

ވަޒީރު ވިދާޅުވީ މިއަމާޒަށް ވާޞިލުވުމަށް ސަރުކާރުން އެކި ޕްރޮގްރާމްތައް ހިންގަވަމުންގެންދަވާކަމަށެވެ.

ފެމެލީ ޕްރޮޓެކްޝަން އޮތޯރިޓީން ބާއްވާ މަދަނީ ޖަމުޢިއްޔާތަކުގެ މަހާސިންތާ ހުޅުވުމުގެ ރަސްމިއްޔާތުގައި އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢައިޝަތު ޝިހާމް ވިދާޅުވީ، ސަރުކާރުގެ ސިޔާސަތުތައް ބައްޓަންކުރަމުންދަނީ މުޖުތަމަޢުގެ އެކަކު އަނެކަކަށް ކުރާ އަނިޔާ މަދުކުރުމަށް ކަމަށެވެ. އަދި ރާއްޖޭގެ ވެއްޓަކީ އެންމެނަށްވެސް އަމާން ރައްކާތެރި އަދި އެއްވެސް މީހަކު ބާކީނުކޮށް އުފާވެރި ވެއްޓަކަށް ހެދުމަކީ ސަރުކާރުން ޚާއްސަ އިސްކަމެއްދެއްވާ ކަމެއްކަން ފާހަގަކުރެއްވިއެވެ.

މިގޮތުން ކުރެވޭ އެންމެ މުހިއްމު މަސައްކަތަކީ ދުރާލާ ޢާއިލާތަކުގައި ހުންނަ މައްސަލަތައް ދެނެގަނެ، އޭގެ ސަބަބުން ޢާއިލާގެ އެއްވެސް މެމްބަރަކު ނުރައްކަލަށް ނުވަތަ އަނިޔާއަށް ހުށައެޅުމުގެ ކުރިން އެހީތެރިކަން ފޯރުކޮށްދެވޭނެ މަގުފަހިކުރުމަކީ އަދުގެ ސަރުކާރުގެ މިސްރާބުކަމަށް ވަޒީރު ވިދާޅުވިއެވެ.

"އެންމެ މުހިއްމު އެއް މަސައްކަތަކީ، ދުރާލާ އާއިލާތައް ބާރުވެރި ކުރުން. އެއީ އާއިލާއެއްގެ ތެރޭގައި ހަމަނުޖެހުމާއި، ދަތިކަމާއި، ދެންވެސް އެއާއިލާގެ މެމްބަރުންގެ ރައްކައުތެރިކަމާއި އަމާންކަމަށް ނުރައްކާވެދާނޭ ހާލަތެއް އައިސްފާނޭ ފަދަ އާއިލާތައް ފާހަގަކޮށް، އެފަރާތްތަކަށް ދައުލަތުގެ ހުރިހާ މުއައްސަސާތައް ގުޅިގެން އެކުގައި އެހީތެރިވެ، ރައްކައުތެރި އަމާން އައްސޭރިއަކަށް ގެނެސްދިނުން." ވަޒީރު ޑރ. ޢައިޝަތު ޝިހާމް ވިދާޅުވިއެވެ.

ދައުލަތުގެ އެހީތެރިކަމަށް ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް ޚާއްސަ 2 ޕްރޮގްރާމެއް ސަރުކާރުންދަނީ ހިންގަވަމުންނެވެ. މިގޮތުން މިއަހަރުގެ މިހާތަނަށް 5 އަތޮޅެއްގައި 37 ރަށެއްގައި އިބަމަ ޤާއިމުކޮށް، 194 ހިއްސާދާރުން ތަމްރީނުކޮށް، ނާޒުކު ޙާލަތްތަކުގައި ތިބި މީހުންނާއި އަނިޔާގެ ޝިކާރައަށްވެފައިވާ މީހުންނަށް ބޭނުންވާ އެހީތެރިކަންދަނީ ފޯރުކޮށްދެމުންނެވެ.

މީގެއިތުރުން ސަރުކާރުން ރައްޔިތުންގެ ޙާލު ގާތުން ބެލުމަށްޓަކައި "ހާލު ބެލުން" ޕްރޮގްރާމް އިފްތިތާޙުކޮށް ގެބިސީތަކަށް ދިޔުމުގެ މަސައްކަތްދަނީ އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ފަރާތުން ގެންދަވަނީ ކުރައްވަމުންނެވެ. މިގޮތުން 12 އަތޮޅެއްގެ 53 ރަށެއްގައި ޙާލު ބެލުން ޕްރޮގްރާމް މިހާތަނަށްވަނީ ކުރިއަށްގެންގޮސްފައެވެ. އަދި މީގެތެރެއިން 22 ރަށެއް އެއްކޮށް ނިމިފައިވާއިރު، ހުޅުމާލެއާއި ވިލިމާލެ ހިމެނޭހެން 8027 ގެއަކަށް ޒިޔާރަތްކޮށް މަޢުލޫމާތުވަނީ އެއްކޮށްފައެވެ.

ވަކި ޖިންސަކަށް ވީތީ ކުރާ އަނިޔާއާއި ދެކޮޅަށް މަސައްކަތް ކުރާ 16 ދުވަހުގެ ކެމްޕޭން ފާހަގަކުރުމުގެ ގޮތުން މިއަހަރު ކުރިޔަށް ގެންދާ އެންމެ ބޮޑު އެއް ޙަރަކާތަކީ، ފެމިލީ ޕްރޮޓެކްޝަން އޮތޯރިޓީއާއި ޔުނިސެފް ގުޅިގެން ކުރިއަށްގެންދާ މަދަނީ ޖަމުޢިއްޔާތަކުގެ މަހާސިންތާއެވެ. މި މަހުގެ 25 އިން 26ގެ ނިޔަލަށް ކުރިޔަށްގެންދާ މިމަހާސިންތާގައި ރާއްޖޭގެ ސަރަޙައްދުން 15 މަދަނީ ޖަމުޢިއްޔާ ބައިވެރިވާކަމަށް ފެމިލީ ޕްރޮޓެކްޝަން އޮތޯރިޓީން ވިދާޅުވެއެވެ.